Nkauj Quaj Ntsuag 2:13-22
Nqe cim:
“Koj sawv tas los sawv dua los quaj thov tus Tswv ib hmos kaj ntug plaws; Cia li qhib koj lub siab thiab thov kom nws hlub tshua koj tej menyuam, Tej menyuam tuag tshaib pawglug ntawm tej ntug kev” (Nkauj Quaj Ntsuag 2:19)
Lus nug rau sawvdaws xav:
– Tej yeebncuab ua li cas thaum pom Yeluxalees tej kev ntxhov siab?
– Yam uas tus Tswv haivneeg yuav tsum ua thaum raug kev txiav txim yog li cas?
– Peb pheej ua dabtsi thaum ntsib tej kev txomnyem, nyuaj siab?
Tus Cevlus Yelemis txhawj xeeb rau nws haivneeg thaum pom “tej laus thiab tej hluas los tuag pawglug rau ntawm tej kev ib yam nkaus, cov tub hluas thiab ntxhais hluas raug yeebncuab muab ntaj tua tuag tas…”, “…Lawv muab cov menyuam uas kuv tu hlob thiab kuv hlub tua povtseg tas” (nqe 21-22). Yelemis kev txhawj xeeb qhia tshwm los ntawm tej lo lus nug hais tias: “…kuv yuav hais li cas rau koj?… Yuav ua li cas kuv thiaj rov nplig tau koj lub siab?”. Tej no qhia pom tus Cevlus Yelemis nplooj siab ntshaw ua ib yam dabtsi rau tus Tswv haivneeg thaum lawv ntsib tej teebmeem no. Tiamsis dhau ntawm tej lus nug no kuj qhia pom hais tias, Yelemis ua tsis tau dabtsi pab lawv hlo li txawm nws lub siab yuav mob heev rau nws haivneeg npaum twg los xij.
Cov uas muaj kev xav txawv tus Cevlus Yelemis ces yog cov neeg dhau kev thiab cov yeebncuab, lawv tsis muaj siab hlub tshua tiamsis tseem “co taubhau nto thiab luag”, “saib tsis taus”, thiab tseem khav hais tias, lawv twb tua yeej lub nroog Yeluxalees raws li lawv tos ntsoov xav pom tej no ntev los lawm (nqe 15-16). Twb mob lawm los tseem raug mob ntxiv thaum tus Tswv haivneeg raug puastsuaj tas tsis muaj leejtwg tuaj xyuas thiab nplig siab, tiamsis tseem raug luag ua qhovmuag qaujles saib tsis tau, raug ntxub, raug thuam thiab raug luag plig. Tiamsis kev cia siab yeej tsis tuag mus thaum tus Cevlus Yelemis taw qhia rau Vajtswv haivneeg pom ncauj kev uas yuav pab tau lawv rov txhim kho tej uas lawv raug yog: “cia li tuaj quaj qw rau tus Tswv” thiab “cia tej kua muag ntws tawm ib yam li tej dej tas hnub tas hmo”, “qhib lub siab” rau tus Tswv, “tsa txhais tes” los thov tus Tswv” (nqe 18-19). Txhua tes haujlwm hais saum no yog qhia txog ib tus neeg ua qhia tshwm nws nplooj siab lees kev txhaum, tig rov los cuag tus Tswv. Dhau li ntawd, cov cevlus cuav tsis qhia qhov tseeb rau sawvdaws, txhua yam tsuas yog lus dag xwb thiaj pab tsis tau tus Tswv haivneeg pom kev txhaum, nthuav tsis tau kev txhaum tawm, coj tsis tau lawv rov los tau lubneej zoo li qub (nqe 14).
Thaum ntsib teebmeem, ntsib kev txomnyem nyuaj siab, peb pheej quaj ntsuag rau tej peb raug tiamsis tsis tshua nco yam yuav tsum ua yog tig rov los cuag tus Tswv, taij thov Nws txoj kev hlub. Vajtswv muaj peevxwm siv tej kev txomnyem los qhuab qhia, qhuab ntuas thiab kho kom peb lub neej zoo tuaj. Cia li tig rov los cuag Vajtswv thov Nws qhib siab thiab taw kev rau peb paub ua yam uas tsimnyog thaum ntsib kev txomnyem, peb thiaj tsis poob siab, tsis qaug zog. Thaum ua li ntawd thiaj yog tus ua neej muaj tswvyim dua ntais.
Thov Vajtswv:
Vajtswv tus muaj kev hlub npluamias! Thov pab kom nyuamyaus paub hais tias Koj tib leeg xwb thiaj yog tus muaj hwjchim zamtxim, thov pab nyuam yaus tiv dhau kev txomnyem nyuaj siab uas nyuam yaus raug. Thov cia nyuam yaus tig los taij thov Koj txojkev pab cawm. Nyuam yaus tuav Cawmseej Tswv Yexus lub npe thov, Amees.
Ib tsoom cov mloog uas hmov thiab tshua,
Zaj kawm hnub no txhawb peb lub zog li cas txog kev twb taubhau nrog teebmeem?
Nyeem Vajluskub hauv peb lub xyoos: Henplais 10
Kênh Youtube BHKTHN:
