Klei Aê Diê Blŭ: Klei Čŏk Hia 2:13-22
Êlan kliăng: “Kgŭ ur hia bĕ êjai mlam, tơdah arăng dơ̆ng gak mlam! Tuh ai tiê ih msĕ si êa ti anăp Yêhôwa! Yơr kngan ih phă Ñu čiăng akâo klei hdĭp kơ phung anak ih, digơ̆ djiê hwăt kyua êpa ti akŏ grăp êlan dơ̆ng.” (Klei Čŏk Hia 2:19)
Klei êmuh ksiêm mĭn: Si knuih phung roh tơdah ƀuh klei ênguôt hnĭng mơ̆ng Yêrusalem? Ya klei brei phung ƀuôn sang Aê Diê ngă tơdah tuôm hŏng klei bi kmhal anei? Ya klei drei khăng ngă tơdah tuôm hŏng klei ênguôt hnĭng, rŭng răng?
Khua pô hưn êlâo Y-Yêrêmi rŭng răng kơ klei ênguôt hnĭng mơ̆ng djuê ana tơdah ƀuh klei “Phung hlăk ai leh anăn phung mduôn dôk đih mđrăm mbĭt hlăm ƀruih ti êlan dơ̆ng; phung mniê êra leh anăn phung êkei êdam kâo êbuh djiê leh hŏng đao gưm.…”,“…phung kâo pŭ ti pha leh anăn čiêm rông, phung roh bi mdjiê leh” (êlan 21-22). Klei ñu rŭng răng bi êdah hlăm lu klei êmuh “…Ya kâo dưi lač kơ ih?… Hŏng kâo dưi bi msĕ ih, hlei pô dưi bi hlao ih…”. Klei anei bi êdah ai tiê ñu êpa hmao čiăng ngă sa mta klei kơ phung ƀuôn sang Aê Diê ti anăp klei ênguôt hnĭng anei, ƀiădah mơ̆ng lu klei êmuh anăn brei ƀuh ñu amâo dưi ngă sa mta ôh wăt tơdah dôk bi mĭn, klei ktrŏ hŏng klei ênguôt hnĭng djuê ana.
Mdê hŏng klei Khua pô hưn êlâo Y-Yêrêmi ƀuh hlăm ai tiê jing phung găn hlăm êlan klông, phung roh ƀuh boh klei ênguôt hnĭng phung ƀuôn sang Aê Diê dôk găn amâo djŏ knŏng amâo pap ôh ƀiădah lŏ pah kngan, mƀhơi, “…diñu kriêt êgei”, leh anăn lŏ lač diñu dưi leh kluôm ênŭm hŏng Yêrusalem hlue si ai tiê diñu čiăng, čang hmăng leh mơ̆ng sui (êlan 15-16). Klei ênguôt hnĭng lŏ mâo êbâo klei ênguôt hnĭng hĭn hlăm boh klei djiê êka anăn amâo mâo ôh hlei pô nao čuă êmuh, bi juh, ƀiădah lŏ tŭ klei arăng mưč mač, mƀhơi tơdah ƀuh klei rai luč mơ̆ng djuê ana pô. Khădah snăn, klei čang hmăng amâo luč ôh tơdah Khua pô hưn êlâo Y-Yêrêmi ktrâo atăt phung ƀuôn sang Aê Diê ƀuh hdră sa anăn đru diñu lŏ bi mrâo, anăn jing brei ur kwưh hŏng Aê Diê leh anăn đăm brei ală pĭt mdei ôh ƀiădah ƀlĕ êa ală jih hruê leh anăn mlam, “Ai tiê phung ƀuôn sang ur kraih kơ Yêhôwa!”, “Yơr kngan ih phă Ñu” (êlan 18-19). Jih jang klei anăn lač kơ rup sa čô mnuih bi êdah ai tiê kmhal klei soh ti anăp Aê Diê. Êngao kơ ñu, phung khua pô hưn êlâo mgưt amâo hưn klei sĭt nik ôh, jih jang jing klei mplư luar sơăi anăn amâo dưi lŏ bi mrâo phung ƀuôn sang Aê Diê ôh, amâo dưi “ba phung mnă wĭt ôh” (êlan 14).
Tơdah tuôm hŏng klei rŭng răng, ênguôt hnĭng, drei khăng hia kơ klei pô găn ƀiădah wơr bĭt hĕ bruă brei ngă sa anăn jing nao kơ Khua Yang čiăng akâo klei pap brei mơ̆ng Aê Diê. Khua Yang srăng yua klei truh čiăng mtô bi hriăm, ƀuah mkra drei. Brei nao hŏng Khua Yang čiăng akâo kơ Ñu mtrang mngač leh anăn atăt drei thâo ya srăng ngă hlăm klei truh čiăng amâo êdu ai, luč klei čang hmăng. Anăn jing klei hdĭp thâo mĭn hĭn.
Ya klei hriăm hruê anei mđĭ ai drei tơdah tuôm hŏng klei dleh dlan hlăm klei hdĭp?
Wah lač: Ơ Aê Diê Pô bŏ hŏng klei pap! Akâo kơ Ih đru kâo thâo knŏng Aê Diê jing Pô sa anăn djăp klei myang pap brei, bi mrâo, đru kâo găn jih klei truh, ênguôt hnĭng kâo dôk tuôm. Akâo kơ Ih đru kâo êran nao hŏng Ih akâo kơ klei đru mơ̆ng Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Hêbrơ 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
