Yauhas 16:7-13
Nqe cim:
“Tus Pab uas yog Vaj Ntsujplig tus Dawbhuv uas kuv thov kom Leej Txiv txib los, nws yuav qhia txhua yam rau nej thiab pab kom nej nco txhua yam uas kuv tau qhia rau nej lawm.” (Yauhas 14:26)
Lus nug xav:
– Nyob hauv Vajluskub, Vajtswv pheej rau txim rau cov neeg ua txhaum licas?
– Vaj Ntsujplig qhia rau txhua tus paub txog txojkev txhaum, txojkev ncaj ncees thiab Vajtswv txojkev txiav txim los ntawm tej haukev twg?
– Peb ua lub neej licas thaum kawm paub hais tias Vaj Ntsujplig yog Tus Qhia Qhov Tseeb?
Nyob hauv Vajluskub Qub, Vajtswv tus uas ncaj ncees pheej ceebtoom ua ntej thiab rau txim tam sim rau cov neeg ua txhaum: Xws li, Adas thiab Evas raug ntiab tawm hauv lub vaj Edees; ob tug uas yog Nadas thiab Anpihus tuag kiag tam sim ntawd thaum nkawd ua saib tsis taus tus Tswv tej lus qhia tseg (Levis Kevcai 10:1-2)… Mauxes hais tias tus Tswv ua qhia tshwm Nws txojkev ncaj ncees thiab dawbhuv, tus Tswv hais tias: “Cov uas ua kuv tes haujlwm yuav tsum saib taus kuv ua yog tus dawbhuv; thiab kuv yuav qhia kuv lub tshwjchim rau kuv haivneeg” (Levis Kevcai 10:3). Nyob hauv Vajluskub Tshiab, kuj muaj ob niam txiv uas yog Ananias thiab Xafilas raug kev txiav txim tamsid (Tes Haujlwm 5:5). Tiamsis Vaj Ntsujplig yog Tus Nplig Siab, Tus Qhia Qhov Tseeb, Nws yuav qhia rau neeg ntiajteb zeem paub txog txojkev txhaum los ntawm lub siab ntev thiab puv npo txoj koob hmoov hlub. Vaj Ntsujplig yog Tus Qhia Qhov Tseeb, Nws yuav ua tes haujlwm ntawd dhau ntawm ntau phab li nram qab no:
Qhov xubthawj, Vaj Ntsujplig qhia rau neeg ntiajteb zeem paub txog txojkev txhaum (nqe 8). Lo lus “qhia rau” tsis yog tsuas hais txog kev “rau txim” xwb, tiamsis tseem muaj ntsiab hais tias “ua rau tibneeg pom qhov txhaum kom hloov siab lees txim”. Vaj Ntsujplig siv tej yam hauv tibneeg nruab siab los qhuab ntuas kom txhua tus hloov siab lees txim thaum pom lawv txojkev txhaum (Loos 2:15). Txojkev txhaum tsis yog qhov uas ua txhaum Vajtswv Txoj Kevcai xwb, tiamsis tseem yog qhov uas tsis ntseeg Tswv Yexus raws li Tswv Yexus hais tias “vim lawv tsis ntseeg Kuv”. Vim Vaj Ntsujplig yog Tus uas ua rau neeg zeem paub txog txojkev txhaum, yog li ntawd Tswv Yexus thiaj li kom cov thwjtim yuav tsum tos kom txais tau Vaj Ntsujplig lub hwjchim tso mam li mus ua timkhawv txog Nws (Tes Haujlwm 1:8).
Qhov ob, Vaj Ntsujplig qhia rau txhua tus paub txog tus Tswv txojkev ncaj ncees (nqe 10). Txojkev ncaj ncees ntawd tsuas muaj nyob hauv Tswv Yexus tej lus qhia thiab Nws lub neej xwb (Mathais 12:18; Lukas 23:47). Thaum tus Tswv rov mus cuag Leej Txiv, Vaj Ntsujplig yuav hloov Nws chaw qhia kom lawv rov nco txog Nws tej lus qhia. Los ntawm Vaj Ntsujplig, tus ntseeg Tswv Yexus thiaj li tau suav hais tias yog neeg ncaj ncees: “Yav tas los nej cov muaj qee leej ua ib yam nkaus li ntawd, tiamsis nimno Yexus Khetos twb ntxuav nej lub txim thiab muab nej pub rau Vajtswv lawm. Peb tus Tswv Yexus Khetos thiab Vajtswv tus Ntsujplig twb coj nej los nrog Vajtswv sib raug zoo lawm” (I Kauleethaus 6:11).
Qhov peb, Vaj Ntsujplig tseem qhia tibneeg paub txog Vajtswv txojkev txiav txim yav dhau los thiab tseem yuav tshwmsim tuaj. Qhov no pab txhua tus tsim dheev, hloov siab lees txim thiab npaj txhij rau hnub tus Tswv txiav txim.
Vaj Ntsujplig yog Tus Qhia Qhov Tseeb tabtom nyob hauv peb lub siab, pab peb ua lub neej ncaj ncees thiab zeem paub txog txojkev txhaum thiab txojkev txiav txim kom peb tso siab qub tseg, ua lub neej haum tus Tswv siab txhua hnub. Dhau qhov ntawd peb kuj vamkhom Vaj Ntsujplig lub hwjchim pab ua timkhawv txog Tswv Yexus kom coob leej paub tus Tswv, ntseeg Nws thiaj li tau txais kev cawmdim.
Thov Vajtswv,
Leej Txiv uas ncaj ncees! Thov pab nyuam yaus ua lub neej raws li Koj Txojlus qhia los ntawm kev zeem paub hais tias Koj yog tus uas ncaj ncees thiab yuav txiav txim rau txhua yam haujlwm uas nyuam yaus tau ua thiab txhua lo lus uas nyuam yaus tau hais. Nyuam yaus tuav Tswv Yexus Khetos lub npe thov, Amees.
Puas muaj txojkev txhaum twg uas Vaj Ntsujplig tabtom ntuas peb? Peb tabtom daws qhov kev txhaum ntawd licas?
Nyeem Vajluskub hauv peb lub xyoos: Tshwmsim 22
Kênh Youtube BHKTHN:
