Khiavdim 35:20-29
Nqe cim:
“Cov Yixalayees tej pojniam thiab txivneej uas txaus siab hlo, puavleej nqa lawv tej khoom tuaj fij pub rau tus Tswv ua tej haujlwm uas tus Tswv tau samfwm rau Mauxes kom lawv ua ntawd” (Khiavdim 35:29).
Lus nug rau sawvdaws xav:
– Haiv neeg Yixalayees fij dab tsi rau tus Tswv?
– Cov lo lus twg tau hais txog ntau lwm hauv ntu Vajluskub no?
– Tej hom neeg twg txaus siab fij qhov txhia chaw rau tus Tswv?
– Peb tab tom fij txhua yam rau tus Tswv los ntawm lub siab li cas?
Haiv neeg Yixalayees mloog tej uas Mauxes qhia, cov neeg uas txaus siab lawv maj nroos nqa lawv tej khoom tuaj fij ua lub tsev ntaub pub rau tus Tswv los nyob nruab nrab hauv lawv. Lawv fij txaus nkaus txhua yam uas cheemtsum siv ua lub tsev ntaub, tej roj tsw qab uas siv los pehawm, cov povthawj tej tsoo tsho hnav, tej cuabyeej uas muab nyiaj muab kub nchuav, tej ntaub xov xiav xov liab, plaub tshis, tawv yaj, pobzeb muaj nqis, ntoo kubtwm thiab cov roj uas tsa meejthawj…
Cov lo lus uas hais ntau hauv ntu Vajluskub no yog: “txaus siab hlo”, “txaus siab muab”, “tsis hais pojniam lossis txivneej”, tau hais ntau hais mus hais los uas yog hais txog tus cai fij khoom. Txhua tus txivneej pojniam, tsis hais Xibfwb, cov tswv cuab thiab thawjcoj puavleej muaj sijhawm zoo fij yam uas yus muaj los ntawm txaus siab thiab tas siab pub rau tus Tswv. Peb pom tau cov Yixalayees sib koom siab ntawm kev fij qhov txhia chaw ua tus Tswv tes haujlwm. Vajtswv yog tus Tswv ntuj Tswv teb, Nws hais tib lo lus xwb txhua yam muaj tshwm tuaj, Nws tsis ntaus nqis hais tias peb fij khoom rau Nws ntau lossis tsawg, tiamsis Nws saib peb lub siab fij qhov txhia chaw rau Nws. Vajtswv haiv neeg muaj lub siab hlub tus Tswv thiab lawv xav kom Nws nrog lawv nyob. Lawv paub meej hais tias: “Peb tsuas muab tej uas yog Koj li rov rau Koj xwb” (I Xwmtxheej Vajntxwv 29:14b).
Los ntawm Vajtswv haiv neeg kev fij khoom rau tus Tswv, ua rau peb pom txog qhov tseemceeb ntawm tej feem hauv tus Tswv lub cev. Yog txhua tus puavleej fij nyiaj, fij kub, fij pobzeb muaj nqis ces lub tsev ntaub yuav tsis muaj lwm yam uas siv ua kom zoo ntxiv. Yog cov coj tsis fij ua qauv ces cov ntseeg yuav tsis kam fij tas siab. Yog li ntawd, tus Tswv ua rau cov Yixalayees txhua tus txaus siab fij txhua yam uas lawv muaj sib txawv tuaj koom ua tus Tswv lub tsev ntaub. Kev ua tus Tswv tes haujlwm, cheemtsum muaj kev sib koom tes ntawm txhua hom neeg txhua tus neeg, txawm yog muab tej yam me xwb los yeej muaj nqis thaum siv ua haujlwm hauv tus Tswv lub tsev. Kev fij khoom rau tus Tswv yog ib yam koob hmoov uas tus Tswv pub rau txhua tus ntseeg, ua tes haujlwm ntawd qhia tshwm peb kev sib txuas nrog tus Tswv thiab Nws haiv neeg. Kev fij khoom uas muaj nqis yog thaum peb txaus siab fij yam yus muaj rau tus Tswv.
Thov Vajtswv,
Tus Tswv, nyuam yaus ua Koj tsaug rau txhua yam uas Koj muab pub rau nyuam yaus! Thov Koj pab kom nyuam yaus tso siab rau Koj thiab txaus siab hlo fij txhua yam uas Koj cheemtsum los ua Koj tes haujlwm hauv lub ntiajteb no. Amees.
Tus Tswv xav kom peb txaus siab fij dab tsi pub rau Nws hnub no?
Nyeem Vajluskub hauv peb lub xyoo: Malakaus 5
Kênh Youtube BHKTHN:
