Klei Aê Diê Blŭ: Rôm 8:9-17
Êlan kliăng:“Ƀiădah tơdah sĭt Yang Mngăt Jăk Aê Diê dôk hlăm diih, diih amâo dôk hdĭp tui si kđeh ôh, ƀiădah tui si Yang Mngăt Jăk. Hlei pô amâo mâo Yang Mngăt Jăk Krist amâo jing dŏ Krist ôh” (Rôm 8:9)
Klei êmuh ksiêm mĭn: Hlei jing phung hdĭp tui si Yang Mngăt Jăk? Si ngă – ngă čiăng thâo kơ sa čô mnuih mâo Yang Mngăt Jăk dôk hlăm ai tiê? Si ngă phung đăo kơ Krist srăng hdĭp čiăng dưi bi mơak kơ Khua Yang?
Klei jing yang đar anak mnuih leh lĕ hlăm klei soh jing bi kdơ̆ng hŏng Aê Diê, ênưih snăk ngă tui si klei ai tiê pô tluh kyuadah klei soh ăt dôk kă. Knŏng hlei pô mâo leh klei bi mtlaih mơ̆ng săng đai klei soh yơh dưi mâo klei čiăng leh anăn ngă tui si klei Aê Diê čiăng. Mnuih hdĭp tui si Yang Mngăt Jăk jing mnuih jing leh dŏ Khua Yang Yêsu, bi tui leh hŏng êrah Ñu tuh ti kyâo bi kal, Aê Diê amâo lŏ yap klei soh ñu ôh, mâo klei Yang Mngăt Jăk lŏ bi kkiêng mrâo leh anăn Ñu mă bruă hŏng klei êngiê hlăm klei hdĭp mrâo pô anăn (êlan 9-10, 14-15).
Tơdah sa čô mnuih thâo kral kơ ñu pô jing mnuih soh dôk krăm hlăm klei soh, tŭ ư kmhal hĕ kơ klei soh, jih ai tiê mă tŭ Khua Yang Yêsu jing Pô Bi Mtlaih leh anăn jing Khua kơ klei hdĭp ñu, hlăk anăn mtam Yang Mngăt Jăk srăng mŭt dôk hlăm ai tiê pô anăn, bi êdah klei myang čiăng đru pô anăn lŏ bi kkiêng mrâo leh anăn bi mlih mrâo hlăm klei jing doh jăk. Mnuih anăn srăng mâo klei čiăng ngă klei bi mơak kơ Khua Yang hĭn kơ klei ngă tui si klei kđeh ñu pô čiăng (êlan 9), mă tŭ Mngăt Myang mjing drei anak rông Aê Diê; amâo lŏ huĭ kơ klei Aê Diê bi kmhal ôh ƀiădah jhŏng hriê giăm kơ Aê Diê leh anăn iêô kơ Ñu Aba! Ama! Yang Mngăt Jăk yơh srăng atăt gai jih jang klei mnuih anăn čiăng leh anăn čuăn ngă hlăm klei hdĭp (êlan 14-15).
Wăt tơdah Yang Mngăt Jăk dôk hlăm ai tiê phung đăo kơ Krist dưn, ƀiădah Ñu amâo mjing drei jing mnuih măi kăp ngă tui si klei Ñu mtrŭn ôh. Klei mĭn êngiê Aê Diê brei leh kơ grăp čô drei ăt dôk dưi yua. Klei pô čiăng leh anăn klei soh ăt dôk hlăm ai tiê grăp čô mnuih dôk kăp mmông găl srăng lŏ kgŭ plah mă klei dưi kiă kriê mnuih anăn. Kyuanăn yơh, brei drei knang kơ Yang Mngăt Jăk bi mdjiê hĕ bruă soh asei mlei drei ngă, čiăng lač bi mdjiê hĕ jih jang bruă jhat asei mlei kđeh ngă, knuih soh hđăp čiăng dưi hdĭp hŏng knhuah hdĭp mrâo tui si Yang Mngăt Jăk atăt gai leh anăn dưi jing anak Aê Diê (êlan 13-14). Jing anak, phung drei ăt jing phung dưn ngăn mơh, leh anăn kyuadah drei jing phung dưn ngăn, drei srăng tŭ klei knap mñai mbĭt hŏng Khua Yang Yêsu mơh ktuê êlan tui hlue Ñu (êlan 17). Drei srăng tŭ klei arăng ngă jhat kyua Anăn Khua Yang, srăng tuôm hŏng klei bi blah plah klei jăk hŏng klei jhat hlăm asei mlei drei pô, tŭ klei knap tơdah drei mă bruă kơ phung ayŏng adei leh anăn kơ jih jang mnuih. Ƀiădah srăng mă tŭ ngăn dưn mơ̆ng Aê Diê, tŭ klei guh kơang mbĭt hŏng Ñu hlăm Ƀuôn Jăk hlŏng lar.
Si ngă drei thâo kral mơ̆ klei Yang Mngăt Jăk atăt gai, bi hriăm, ƀuah mkra hlăm klei hdĭp grăp hruê?
Wah lač: Ơ Yang Mngăt Jăk, Pô dôk hdĭp hlăm ai tiê kâo! Kâo čiăng mâo klei hdĭp dưi bi mơak kơ Ih sĭt. Akâo Khua Yang đru kâo bi mdjiê jih bruă soh asei mlei ngă, jhŏng tŭ klei knap mñai mbĭt hŏng Khua Yang Yêsu čiăng kơ kâo dưi bi knal klei myang Ih dôk mă bruă hlăm klei hdĭp kâo grăp hruê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Hêbrơ 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
