Loos 8:9-17
Nqe cim:
“Yog Vajtswv tus Ntsujplig nyob hauv nej lub siab, nej yeej tsis ua raws li nej lub siab qub qhia nej, tiamsis nej ua raws li Vaj Ntsujplig qhia nej. Tus uas tsis muaj Yexus Khetos tus Ntsujplig, tus ntawd yeej tsis yog Yexus Khetos tug” (Loos 8:9)
Lus nug rau sawvdaws xav:
– Leej twg yog tus ua neej raws li Vaj Ntsujplig qhia?
– Ua li cas thiaj paub ib tug tibneeg muaj Vaj Ntsujplig nyob hauv nws lub siab?
– Tus ntseeg yuavtsum ua neej li cas thiaj haum Vajtswv siab?
Tibneeg tus cwjpwm tom qab uas poob rau kev txhaum lawm yog tawmtsam Vajtswv, yoojyim nyiam ua raws li lub siab ntshaw, vim kev txhaum tseem khi rawv. Tsuas yog cov uas tau cawmdim ntawm txoj kev txhaum khi lawm thiaj li xav ua neej raws Vajtswv tej lus qhia xwb. Tus ua raws Vaj Ntsujplig qhia yog Tswv Yexus tug. Yexus tau muab Nws cov ntshav ntws saum ntoo khaublig muas cov ntseeg los ua Nws tug lawm. Thaum ntawd tau Vajtswv suav hais tias tsis muaj txim lawm, vim Vaj Ntsujplig muab tus ntawd yug dua tshiab thiab Vaj Ntsujplig ywjpheej ua haujlwm hauv tus ntawd lub neej (nqe 9-10, 14-15).
Thaum ib tus tibneeg zeem paub hais tias nws yog neeg txhaum tabtom tsau tsawv rau hauv txojkev txhaum, tas siab lees kev txhaum, txaus siab txais yuav Tswv Yexus ua nws tus Tswv Cawmseej thiab ua nws tus Tswv hauv lub neej, ces tamsim ntawd Vaj Ntsujplig los nyob hauv tus ntawd lub siab, pab kom nws muaj lub neej yug dua tshiab tom qab ntawd nws maj mam hloov zuj zus kom muaj lub neej dawbhuv. Tus ntawd nyiam ua raws Vajtswv siab nyiam heev dua li ua raws nws txoj kev ntshaw (nqe 9), thiab tau ua Vajtswv tus menyuam, tsis ntshai Vajtswv kev txiav txim lawm, nws sawv khov kho mus cuag Vajtswv thiab hu Vajtswv ua leej Txiv! Vaj Ntsujplig yog tus uas yuav tswj tus ntawd tej kev ntshaw thiab pab tus ntawd txiav txim siab txhua yam hauv kev ua neej (nqe 14-15).
Txawm hais tias Vaj Ntsujplig muaj hwjchim nyob hauv tus ntseeg lub siab, los Nws yeej tsis muab tus ntseeg hloov zoo yam li tej cuabyeej uas tsis muaj sia. Vim txoj kev ywjpheej uas Vajtswv pub rau tibneeg tseem muaj nyob hauv txhua tus lub neej. Tiamsis lub siab qub lossis kev txhaum tseem pw rawv zov tos, yog muaj sijhawm zoo ces kev txhaum yuav sawv rov los txeeb qhov chaw kav hauv tibneeg lub siab. Vim li ntawd, peb yuavtsum vamkhom Vaj Ntsujplig ua kom tej yam phem ntawm peb sab nqaij tawv tuag mus, peb thiaj muaj lub neej tshiab raws Vaj Ntsujplig ua tus coj kev, peb thiaj ua tau Vajtswv tus menyuam (nqe 13-14). Yog menyuam, peb yeej yuav tau txais tej qubtxeeg qubteg uas zoo vim yog tus txais qubtxeeg qubteg, peb yuavtsum nrog Tswv Yexus tiv kev txomnyem hauv lub neej uas nrog Nws mus (nqe 17). Peb yuav raug tsimtxom vim tus Tswv lub npe, yuav ntsib kev tawmtsam ntawm yam phem thiab yam zoo hauv lub cev, thiab yuav tiv kev txomnyem thaum ua haujlwm pab cawm tibneeg. Thaum kawg peb yuav tau nrog Tswv Yexus tau koobmeej, tau txais tej qubtxeeg qubteg uas Vajtswv npaj tseg hauv Vajtswv lub tebchaws mus ib txhis.
Thov Vajtswv:
Vajtswv Vaj Ntsujplig tus uas nyob hauv nyuam yaus lub siab! Nyuam yaus xav kom muaj lub neej haum Vajtswv siab, thov Vaj Ntsujplig Koj pab rhuav tes haujlwm phem ntawm sab nqaij tawv tuag mus, thiab pub nyuam yaus zoo siab nrog Tswv Yexus tiv kev txomnyem hauv kev ntseeg kom nrog Yexus mus txhua hnub. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb puas pom Vaj Ntsujplig coj kev, qhuab ntuas, ceebtoom thiab qhia peb kev ua neej txhua hnub?
Nyeem Vajluskub hauv peb lub xyoos: Henplais 1
Kênh Youtube BHKTHN:
