Klei Aê Diê Blŭ: Rôm 8:18-22
Êlan kliăng: “Kyuadah jih jang mnơ̆ng hrih leh gĭr dôk čang hmăng kơ hruê phung anak Aê Diê srăng bi êdah” (Rôm 8:19)
Klei êmuh ksiêm mĭn: Khua ƀĭng kna Y-Pôl brei thâo si ngă klei jing jih jang mnơ̆ng ară anei hin? Ya ngă jih jang mnơ̆ng hrih leh gĭr dôk čang hmăng kơ hruê phung anak Aê Diê srăng bi êdah? Ya klei bi hmăi mâo kơ klei bi êngiê jih jang mnơ̆ng mơ̆ng klei drei bi êdah?
Khua ƀĭng kna Y-Pôl mñă brei phung anak čô Khua Yang lŏ hdơr kơ klei yăl dliê kơ klei anak mnuih lĕ hlăm klei soh. Tơdah aê aduôn drei Y-Ađam leh H’Êwơ gao asăp Aê Diê ƀơ̆ng hĕ boh Aê Diê kăm, anak mnuih leh anăn jih jang mnơ̆ng dôk ti gŭ klei anak mnuih kiă kriê mă tŭ leh klei tăm pah (Klei Mphŭn Dơ̆ng 3:17-19). Klei hdĭp êđăp ênang, jăk mơak kơ jih jang mnơ̆ng ruĕ leh! Hlô mnơ̆ng amâo lŏ hdĭp êđăp ênang mbĭt hŏng mnuih ôh, lăn srăng bi čăt êruê ana leh anăn êruê hruĕ tơl anak mnuih tuh êa kơhŏ kơh dưi mâo êsei huă. Ƀrư̆ hruê anak mnuih jing jhat ƀai hĭn êjai, čŏng čiăng ngă klei bi kdơ̆ng hŏng Aê Diê, amâo lŏ kiă kriê jih jang mnơ̆ng tui si bruă klam Aê Diê jao leh ôh, ƀiădah lĕ anak mnuih amâo thâo hơưi ôh, mă yua mnơ̆ng Aê Diê hrih leh hlăm lăn adiê tui si čiăng – čiăng bi hrăp klei diñu pô tluh. Mơ̆ng hruê anăn truh ti ară anei, jih jang mnơ̆ng hrih leh gĭr ur krao kyua klei bi blah čiăng dưi dôk hdĭp, mbĭt hŏng klei anăn ăt găn klei djiê mơh.
Jih jang mnơ̆ng gĭr dôk čang guôn kơ hruê phung anak Aê Diê srăng bi êdah (êlan 19). Jih jang phung đăo kơ Krist sĭt jing phung anak Aê Diê sơăi. Wăt snăn dưn mơh, jih jang mnơ̆ng ăt srăng lŏ dôk guôn tơl truh hruê jih jang phung anak Aê Diê srăng bi êdah. Hdruôm hră Klei Aê Diê Blŭ brei drei thâo snei, “Leh anăn arăng srăng mtô klei mrâo mrang jăk kơ ƀuôn ala mtao anei tar lăn ala jing klei hưn kơ jih jang găp djuê mnuih. Hlăk anăn hruê knhal tuč srăng truh” (Y-Mathiơ 24:14). Hlăm hruê knhal tuč, srăng mâo adiê mrâo leh anăn lăn mrâo, jih jang mnơ̆ng ti lăn ala anei srăng mâo klei bi mlih, srăng bi êngiê mơ̆ng klei tăm pah, klei rai luč, leh anăn klei djiê amâo lŏ mâo klei dưi hŏng digơ̆ (II Y-Pêtrôs 3:13; Klei Bi Êdah 21:1).
Hŏng klei Aê Diê pap, Ñu hrih mjing leh drei leh anăn brei drei hdĭp ti lăn ala anei. Klei drei mâo ƀô̆ mta ti lăn ala anei jing klei jih jang mnơ̆ng čang hmăng leh anăn Aê Diê brei drei jing akŏ klei bi juh kơ jih jang digơ̆. Hlăm klei hdĭp, bruă klam kơ jih jang phung đăo kơ Krist jing kiă kriê jih jang mnơ̆ng (Klei Mphŭn Dơ̆ng 1:26), kyuanăn brei grăp čô drei răng mgang anôk drei dôk hdĭp mtah, doh, leh anăn jăk siam čiăng kơ jih jang mnơ̆ng dưi čăt đĭ. Đăm drei bi rai kmrơ̆ng dliê, trah yao kan, loa hlô dliê tui si drei čiăng ôh. Brei phung đăo bi mđĭ ai hdơ̆ng găp, leh anăn bi hriăm phung anak čô ngă bruă điêt si tô hmô pla ana kyâo, duñ djah hlăm sang leh anăn amâo hwiê djah plă plia ôh. Leh anăn êgao hĭn kơ jih klei anăn, brei drei yua jih jang mmông găl hưn Anăn Khua Yang, čiăng đru bi mguôp mbĭt hlăm klei bi mtlaih jih jang mnơ̆ng.
Si ngă drei dôk hdĭp čiăng dưi ngă tui si klei jih jang mnơ̆ng dôk čang hmăng?
Wah lač: Ơ Khua Yang! Brei bĕ kơ kâo klei Ih khăp, leh anăn brei bĕ kơ kâo klei ktang Ih čiăng kơ kâo dưi jing sa čô dĭng buăl jăk, sĭt suôr leh anăn thâo mĭn kơ Ih, čiăng ba klei bi juh kơ jih jang mnơ̆ng dôk ur krao Ih dưm leh jŭm gah găn kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Hêbrơ 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
