Tus Tswv Cov Lus Tabpov – 23/3/2022

749

 

Yelemis 31:35-40

Nqe cim:

Yog leejtwg ntsuas tau saum nruab ntug, lossis ntsuas tau nruab tivtxwv, ces kuv thiaj tso tau cov Yixalayees tseg, txawm yog lawv ua txhaum los kuv tsis tso lawv tseg. Kuv yog tus Tswv uas hais li ntawd (Yelemis 31:37).

Lus nug rau sawvdaws xav:

  • Ntu Vajluskub hnub no qhia txog Vajtswv tus yamntxwv twg?
  • Tus Tswv siv lo lus “ntsuas nruab ntug, tivtxwv” xav hais txog yam dabtsi?
  • Peb tau Vajtswv ntuas li cas thaum peb paub Vajtswv txojkev hlub lawm?

Ib tsoom cov mloog txhua tus,

Vajtswv lub npe hu ua tus Tswv uas muaj hwjchim loj kawg nkaus, yog ib lub npe uas hais txog Vajtswv muaj hwjchim kav ib puas tsavyam, qhia tshwm Vajtswv yog tus tsim lub ntuj lub ntiajteb thiab teeb txhua yam nyias nyob muaj nyias chaw uas raws li tus cevlus Yelemis hais tias: Tus Tswv ua lub hnub ci pomkev rau nruab hnub, ua lub hli thiab tej hnubqub ci pomkev rau hmo ntuj. Nws do dej hiavtxwv ntas nphau pes nphwv(nqe 35). Vajtswv coglus rau Nws haivneeg hauv nqe 36 hais tias thaum twg tej uas Nws teeb hauv lub ntuj lub teb tsis muaj nyob ces thaum ntawd lawv mam li tsis yog Nws haivneeg. Qhov ntawd yog cov lus tabpov hais tias yuav tsis muaj hnub Vajtswv muab haivneeg uas Nws xaiv cia lawd tso tseg, vim Nws hais tias Kuv yog tus Tswv, kuv yeej tsis hloov li; yog li ntawd nej cov uas yog Yakhauj cov xeebntxwv tseem tsis tau tu noob (Malakis 3:6).

Hauv nqe 37 tus Tswv hais ntxiv hais tias, nyob hauv ntiajteb no leejtwg ntsuas tau saum nruab ntug thiab hauv nruab tivtxwv? Yeej tsis muaj leejtwg ntsuas tau li. Yog li ntawd, tus Tswv yeej tsis muab Nws haivneeg tso tseg li txawm yog lawv tau ua ntau yam yuam kev los xij, tus Tswv yuav pub rau Nws haivneeg muaj sijhawm tig los lees txim thiab Nws rov txhim kho lawv lub neej dua. Vajtswv yuav pub kom muaj tus ciam tshiab rau lub Tuamtsev txij ntua ntawm lub chaw tsomfaj Hananees sab hnubpoob mus txog ntua ntawm lub Roojvag Cegkaum. Lub nroog tus ciam sab hnubpoob pib qhov ntawd mus txog rau saum lub roob Nkalej thiab nkhaus mus cob rau ntawm Nkau-as. Thoob plaws lub hav uas luag faus tuag thiab pov liamsim, thiab tej teb uas nyob raws ntug Hav Kiloos mus txog rau ntawm lub Roojvag Nees mus rau sab hnubtuaj, yuav yog kuv qhov chaw tseemceeb. Yuav tsis muaj leejtwg rhuav lossis ua kom lub nroog no puastsuaj li lawm(nqe 38-40). Txawm yog muaj tej qhov chaw hauv tus Tswv cov lus cog tseg paub tsis meej los tus Tswv tej lus qhia paub hais tias, yuav muaj ib qhov chaw dawbhuv uas Vajtswv tshwj tseg ua qhov chaw rau haivneeg uas Nws hlub tau pehawm Nws.

Yexus Khetos, Nws yeej zoo Nws li qub; nag hmo thiab hnub no Nws zoo licas, Nws yeej zoo li ntawd mus ibtxhis li(Henplais 13:8). Vajtswv muab Nws txojkev hlub nyob mus ibtxhis hlub haivneeg uas Nws xaiv tseg thiab Nws kuj muab txojkev hlub ntawd los hlub peb txhua tus ib yam nkaus (Yauhas 3:16; Loos 5:8). Cia li los caug tus Tswv thaum peb tabtom muaj kev qaug zog thiab tsis sib haum, cia Nws txojkev hlub ua lub zog pab kom peb hla dhau txhua yam, peb coglus ua lub neej tshiab pub rau Nws.

 

Thov Vajtswv,

Tus Tswv uas yog kev hlub! Nyuam yaus ua Koj tsaug vim Koj muab Koj txojkev hlub nyob mus ibtxhis tsis hloov los hlub nyuam yaus. Thov Koj pab kom nyuam yaus txhob khiav tawm ntawm Koj mus tiamsis cia nyuam yaus niaj hnub nyob rawv hauv Koj txojkev hlub, kev saib xyuas thiab kev tsomkwm. Amees.

Ib tsoom cov mloog uas hmov thiab tshua,

Yam dabtsi ua rau peb txav mus nyob ze rau ntawm Vajtswv?

Nyeem Vajluskub hauv peb lub xyoo: Nehemis 13:6-31

Phab Xa Suab Lus nrog rau Phab Cob Qhia Tus Ntseeg koom tes txhim muaj.

Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com

Tshooj Youtube BHKTHN: https://www.youtube.com/c/bhkthn

Bài trướcThông Báo V/v Trại Ban Điều Hành Thiếu Niên Tp.HCM Năm 2022
Bài tiếp theoKlei Ƀuăn Rơ̆ng Mơ̆ng Yêhôwa Kơ Phung Kahan – 23/3/2022