Kalatias 4:1-11
Nqe cim:
“Vajtswv txib Vajtswv tus Tub tus Ntsujplig los nyob hauv peb lub siab, sawvdaws thiaj pom hais tias, peb yog Vajtswv cov menyuam, tus Vaj Ntsujplig ntawd yog tus uas qhia peb hu Vajtswv hais tias, ‘Anpas, kuv Txiv.’” (Kalatias 4:6).
Lus nug rau sawvdaws xav:
– Timthawj Paulus hais li cas txog cov neeg Kalatias lub meejmom ua ntej thiab tamsim no?
– Lub meejmom tshiab ua rau lawv tau yam dabtsi?
– Qhov txawv ntawm cov neeg coj kevcai thiab cov neeg koob hmoov hlub yog dabtsi?
Timthawj Paulus rov hais ntxiv txog qhov kev sib txawv ntawm lub meejmom thiab qhov tau thaum “tseem yau”, txhais tau tias nyob hauv txoj kevcai thiab “lub sijhawm Vajtswv teem cia” uas yog nyob hauv txoj koob hmoov hlub (nqe 2-3). Thawj qhov, Paulus qhia paub qhov uas tau txais qubtxeeg qubteg, tus menyuam thaum tseem yau kuj zoo li tus tubtxib hauv tsevneeg, tsis tau cai txiav txim siab siv tej qubtxeeg qubteg hauv tsev (nqe 1-2). Dua li ntawd, nyob rau tiam kev ntseeg thiab koob hmoov hlub, peb muaj lub meejmom tshiab uas yog tau “ua Vajtswv cov menyuam” (nqe 5, 7). Vim li cas yog “menyuam tu”? Raws li cov tub txhais Vajluskub, lo lus “ua Vajtswv menyuam” muaj lub ntsiab hais tias “tau muab coj los tso ua tus tub hlob.” Qhov no txhais tias peb qhov chaw nyob hauv Vajtswv tsevneeg yog tus tub uas txaus peevxwm tau txais txhua yam, “tau ib puas tsav yam uas Vajtswv khaws cia rau Vajtswv cov tub.” (nqe 7), muaj cai siv Leej Txiv txojkev npluanuj thiab ua txhua yam li tus tub.
Qhov muaj nqis thib ob ntawm lub meejmom tshiab thaum nyob hauv txoj koob hmoov hlub, tau Timthawj Paulus hais tias: “Vajtswv txib Vajtswv tus Tub tus Ntsujplig los nyob hauv peb lub siab, sawvdaws thiaj pom hais tias, peb yog Vajtswv cov menyuam,…peb hu Vajtswv hais tias, ‘Anpas, kuv Txiv.’ (nqe 6). Qhov zoo tshaj ntawm lub meejmom uas tau ua menyuam yog Vajtswv txib Vaj Ntsujplig los nyob hauv peb lub siab. Thiab vim Vaj Ntsujplig nyob hauv peb lub siab, peb thiaj tsis ua neej nyob hauv txoj cai hais tias “tsis txhob” lawm, peb tau ywjpheej nyob hauv Vaj Ntsujplig txojkev coj.
Nimno, puas muaj ib zaug twg peb pom tau tias nyuaj thaum yus nrhiav kev ua raws li Vajtswv lub siab nyiam, thiab peb xav kom Vajluskub sau meej ntsig txog yam uas peb pom tias nyuaj ntawd? Yog leejtwg pom tau li ntawd, ces lo lus teb uas Timthawj Paulus hais yog: Peb tau txais yam zoo uas yog Vajtswv tej lus qhia lawm, ntawd yog Vaj Ntsujplig qhia peb! Tsab ntawv II Kauleethaus 3:6 hais tias: “Vajtswv yog tus pub tswvyim rau peb qhia txoj kevcai tshiab, tsis yog txoj kevcai uas sau rau hauv ntawv, tiamsis yog Vaj Ntsujplig; txoj kevcai uas sau rau hauv ntawv ua rau neeg raug kev ploj kev tuag, tiamsis Vaj Ntsujplig ua rau neeg tau txojsia.” Peb txhua tus cia li txaus siab rau yam uas yus muaj, lub meejmom ua Vajtswv menyuam, tsis txhob ua neej raws li kevcai qhia, tiamsis ua raws li Vaj Ntsujplig qhia.
Thov Vajtswv,
Vajtswv, ua Koj tsaug vim Koj yog tus uas muaj txhua yam. Thov Koj pab kom nyuam yaus ua neej raws li Vaj Ntsujplig qhia kom niaj hnub uas raws li Koj qhia, kom nyuam yaus tau txais tej uas Koj pub. Nyuam yaus tuav Yexus Khetos lub npe thov, Amees.
Peb puas tabtom ua neej nyob hauv txoj koob hmoov hlub uas peb tau txais?
Nyeem Vajluskub hauv peb lub xyoo: Yaxayas 14
Kênh Youtube BHKTHN:
