Klei Aê Diê Blŭ: Galati 4:1-11
Êlan kliăng: “Leh anăn kyuadah diih jing phung anak, Aê Diê tiŏ hriê leh Yang Mngăt Jăk Anak Ñu mŭt dôk hlăm ai tiê drei, lač, “Aba, Ama!” (Galati 4:6)
Klei êmuh ksiêm mĭn: Ya Khua ƀĭng kna Y-Pôl lač kơ klei jing phung Galati mphŭn dô leh anăn ară anei hin? Ya klei jing mrâo ba hriê kơ diñu? Ya jing klei mdê prŏng ênuk mnuih hdĭp ti gŭ klei bhiăn leh anăn ti gŭ ênuk klei pap?
Khua ƀĭng kna Y-Pôl lŏ bi êdah klei mdê kơ klei jing leh anăn klei tŭ dưn drei mâo êjai drei jing hđeh, čiăng lač êjai hdĭp ti gŭ klei bhiăn hŏng tơdah “hruê bi kčah truh leh”, čiăng lač hdĭp ti gŭ klei pap (êlan 2-3). Tal êlâo hĭn, ñu brei ƀuh tĭng kơ klei dưn ngăn, êjai anak jing hđeh amâo yap mdê ôh hŏng hlŭn hlăm gŏ sang, gơ̆ amâo dưi yua dŏ ngăn leh anăn ngă tui si gơ̆ pô čiăng ôh (êlan 1-2). Ƀiădah lĕ, hlăm ênuk klei đăo leh anăn klei pap, drei mâo klei jing mrâo, anăn jing, jing “anak rông ba” Aê Diê (êlan 5,7). Ya ngă knŏng jing anak rông ba lĕ? Tui si phung mblang Klei Aê Diê Blŭ, pruê̆ blŭ “jing anak rông ba” hlăm Klei Bi Mguôp Mrâo lŏ mblang jing “dưi yap jing msĕ si anak êkei êdam leh.” Klei anăn čiăng lač hlăm gŏ sang Aê Diê, drei jing sa čô anak mâo jih klei dưi kơ sa čô anak êkei êdam leh, jing sa čô “pô dưn ngăn” hŏng klei Aê Diê pap (êlan 7), dưi yua klei mdrŏng ama ñu, leh anăn dưi ngă jih jang klei tui si klei dưi kơ sa čô pô dưn ngăn.
Klei tŭ dưn tal dua tơdah drei dôk ti gŭ klei pap tui si Khua ƀĭng kna Y-Pôl lač leh jing: “Aê Diê tiŏ hriê leh Yang Mngăt Jăk Anak Ñu mŭt dôk hlăm ai tiê drei, lač, “Aba, Ama!” (êlan 6). Klei jăk hĭn drei mâo mơ̆ng klei jing anak rông ba jing Aê Diê tiŏ hriê Yang Mngăt Jăk mŭt dôk hlăm ai tiê drei. Leh anăn kyua mâo Yang Mngăt Jăk hdĭp hlăm ai tiê drei snăn drei amâo lŏ dôk ti gŭ klei gĭt gai mơ̆ng klei bhiăn “đăm ngă snei”, “đăm ngăn snăn” ôh, ƀiădah drei dưi ngă hŏng klei êngiê tui si klei ktrâo atăt mơ̆ng Yang Mngăt Jăk.
Hruê anei, mâo mơ̆ mmông drei ƀuh jing dleh snăk tơdah tui duah si klei Aê Diê čiăng êlâo kơ drei ngă sa mta bruă, leh anăn čiăng snăk Klei Aê Diê Blŭ čih klă ya klei drei srăng ngă čiăng kơ drei amâo lŏ suăi dôk mĭn ôh? Tơdah mâo pô mĭn msĕ snăn, klei Khua ƀĭng kna Y-Pôl lŏ wĭt lač jing: Aê Diê brei leh kơ drei sa klei jăk hĭn mkă hŏng klei ktrâo brei hŏng hră mơar, anăn jing Yang Mngăt Jăk! II Kôrantô 3:6 čih snei: “Ñu brei hmei năng dưi ngă bruă jing dĭng ktang kơ klei bi mguôp mrâo, amâo djŏ ôh hŏng hră, ƀiădah hŏng Mngăt Myang. Kyuadah hră bi mdjiê, ƀiădah Mngăt Myang brei klei hdĭp.” Brei grăp čô drei dôk mơak bĕ hlăm klei mdrŏng, klei êbeh dlai mơ̆ng klei jing anak rông ba, đăm hdĭp tui si klei čih hlăm hră mơar ôh ƀiădah hdĭp tui si Yang Mngăt Jăk hdĭp hlăm drei.
Si ngă drei dôk hdĭp hŏng klei brei mdê kơ phung hdĭp hlăm ênuk dôk ti gŭ klei pap mơ̆?
Wah lač: Ơ Khua Yang, kâo lač jăk kơ Ih kyua jih klei mdrŏng amâo mâo knhal Ih brei leh kơ kâo. Đru kâo hdĭp tui si Yang Mngăt Jăk čiăng kâo hdĭp mơak hlăm klei Ih kiă kriê, atăt gai grăp hruê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
