Yaxayas 53:5-9
Nqe cim:
“Peb txhua tus zoo li tej yaj uas yuam kev lawm; peb sawvdaws nyias mus nyias ib txojkev raws li nyias lub siab nyiam, tiamsis tus Tswv muab peb lub txim uas tsimnyog peb raug tso rau nws ris” (Yaxayas 53:6).
Lus nug rau sawvdaws xav:
- Tus cev lus Yaxayas hais txog tus Tswv raug txomnyem vim peb zoo li cas?
- Hauv rooj kevcai nco txog Yexus raug txomnyem peb muaj kev xav li cas?
- Peb yuav cog lus li cas rau tus Tswv uas raug txomnyem vim peb los lawm?
Ib tsoom mloog txhua tus,
Thaum hais txog tus Mexiyas raug kev txomnyem, tus cev lus Yaxayas xav hais txog tus Tswv muaj nplooj siab tiv nyiaj qees yam tuaj raug, Nws“raug ntaus nqaij ntuag ntshav nrog” zoo ib yam li tauv txiv hmab nyeg uas luag muab tsuam kom ntsoog saum lub chaw tsuam. Nws yog Vajtswv tus uas loj thiab yog tus uas Dawbhuv tiamsis Nws yeem los ris peb tibneeg lub txim txhaum. Peb cia li rov xav txog thaum Yexus nyob hauv lub vaj Khexemanes, ntawm phimlaj lub rooj txiav txim thiab ntawm roob khaulakhauthas…kom peb rov nco txog txojkev hlub loj kawg nkaus uas tus Tswv Yexus tau muab pub rau yus. Nws raug nplawm, raug luag ua saib tsis taus, tiamsis Nws tsis hais ib los, Nws raug qhuab yuam, raug txiav txim tsis ncaj tiamsis Nws ua ib siab tiv huv tibsi. Thaum Phimlaj tawm suab txog Tswv Yexus hais tias, “…kuv tsis pom nws ua ib qho txhaum uas txaus txiav txim rau nws li.” (Yauhas 19:4b), ces tej neeg sawvdaws qw nrov nrov hais tias, “muab nws ntsia rau saum ntoo khaublig! Muab nws ntsia rau saum ntoo khaublig!” (Yauhas 19:6). Tswv Yexus raug muab ntsia rau saum ntoo khaublig nrog ob tug tubsab (Lukas 23:33) muaj tiav raws li tus cev lus Yaxayas tau hais tseg, “Txawm yog nws yeej tsis tau ua ib qho txhaum thiab nws lub qhovncauj yeej tsis tau hais ib lo lus dag li los lawv cia li muab nws coj mus faus nrog cov neeg txhaum…” (nqe 9).
Thaum tuaj koom kevcai nco txog Yexus raug txomnyem, peb yuav tsum los tshawb peb lub siab kom paub meej tus Tswv Yexus twb raug txomnyem vim peb lub txim txhaum, Nws txaus siab cia Leejtxiv muab tibneeg tej kev txhaum rau Nws ris. Peb yuav tsum nco ntsoov hais tias vim peb tej kev txhaum Tswv Yexus thiaj raug ntsia rau saum tus ntoo khaublig this peb. Txojkev hlub uas loj kawg nkaus li ntawd, peb yuav tsis muaj zaug ua pauj tau, yog li peb yuav ua cas thaum peb ua Kevcai Nco Txog Yexus Raug Txomnyem? Muaj qee leej quaj thaum saib yeeb yam txog zaj xwm Yexus raug txomnyem lossis saib tej duab uas Yexus raug txomnyem…, tiamsis Tswv Yexus hais rau cov pojniam hauv nroog Yeluxalees hauv Lukas 23:28 hais tias: “…Nej tsis txhob quaj kuv, tiamsis cia li quaj nej thiab nej tej menyuam”. Tus Tswv xav kom peb paub rov los quaj thiab xav txog peb tus kheej vim peb twb tau txais kev cawm dim lawm tiamsis puas ua lub neej phim yog tus nyob hauv txojkev cawm dim lawm tau? Tus Tswv xav kom peb quaj rau peb tej kwvtij, tej txheeb ze uas lawv tsis tau ntseeg Yexus ua lawv tus Tswv cawm seej. Tus Tswv kuj xav kom peb quaj rau peb haiv neeg, vim cov uas tau los txais kev cawm dim lawm tseem tsawg heev. Tseem muaj sijhawm rau peb txhua tus los lees txim yam peb ua tsis tau yog thiab tseem tshuav sijhawm rau peb qhia txog kev cawm dim rau tej neeg ib ncig ntawm peb.
Thov Vajtswv,
Tus Tswv, Koj tau raug txomnyem tuag saum ntoo khaublig vim nyuam yaus lub txim txhaum. Thov Koj pab nyuam yaus paub nco ntsoov Koj txiajntsig, ua lub neej rau Koj txaus siab thiab qhia txog Koj txojkev cawm dim rau lwm tus. Amees.
Ib tsoom cov mloog uas hmov thiab tshua,
Peb pauj Tswv Yexus tej txiajntsig uas Nws hlub peb zoo li cas?
Nyeem Vajluskub hauv peb lub xyoo: Yauj 21
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
