KleiAê Diê Blŭ: Y-Êsai 53:5-9
Êlan kliăng: “Jih jang drei msĕ si biăp klah đuĕ leh, grăp čô drei wir tui hlue êlan ñu pô; leh anăn Yêhôwa dưm leh ti Ñu klei wê jih jang drei.” (Y-Êsai 53: 6).
Klei êmuh ksiêm mĭn: Ya mta klei khua pô hưn êlâo Y-Êsai hưn mdah kơ klei Khua Yang tŭ kyua drei? Si drei thâo săng drei mâo hlăm knăm bi hdơr Klei Khua Yang Tŭ Klei knap Mñai hruê anei? Ya klei drei ƀuăn rơ̆ng hŏng Khua Yang jing Pô tŭ klei knap mñai kyua drei?
Tơdah hưn mdah kơ klei knap mñai Yang Mêsi, khua pô hưn êlâo Y-Êsai kñăm ktang kơ klei Ñu khut khat gĭr tŭ, Khua Yang tŭ klei “arăng bi êka” jing klei bi čhŏ, “bi brăm mčah” jing klei kpĭ msĕ si boh kriăk ƀâo hlăm mnơ̆ng arăng djiêt mă êa. Jing Aê Diê Pô ti dlông hĭn, Pô Doh Jăk ƀiădah tŭ ư gui klei soh ktrŏ drei. Brei drei lŏ wĭt kơ war mnga Gêtsêmanê, kơ anôk Pilat phat kđi, kơ čư̆ Gôlgôtha… čiăng dôk mĭn kơ klei khăp prŏng prĭn Khua Yang Yêsu pioh leh kơ drei: Ñu tŭ giê nhuăt čăm, tŭ klei arăng mư̆č mač bi hêñ ƀiădah amâo ha ƀăng êgei ôh, Ñu tŭ klei arăng ktư̆ juă leh anăn phat kđi soh ƀiădah tŭ gĭr jih. Tơdah Pilat hưn kơ Khua Yang Yêsu amâo mâo klei soh ôh “… čiăng kơ diih dưi thâo kâo amâo ƀuh ôh sa mta klei soh hlăm gơ̆” (Y-Yôhan 19:4b), snăn phung ƀuôn sang ur kraih “pơ̆ng Ñu ti kyâo bi kal, pơ̆ng Ñu ti kyâo bi kal!” (Y-Yôhan 19:6). Arăng pơ̆ng Khua Yêsu ti kyâo bi kal hŏng msei kđĭn mbĭt hŏng dua čô knĕ (Y-Luk 23:33) bi sĭt klei khua pô hưn êlâo Y-Êsai lač leh “Arăng pioh brei msat kơ Ñu mbĭt hŏng phung ƀai”, wăt tơdah Khua Yang Yêsu “amâo tuôm ngă klei jhat ƀai dưn” (êlan 9).
Tơdah dôk bi kƀĭn hlăm Knăm Bi Hdơr Klei Khua Yang Yêsu Tŭ Klei Knap Mñai, brei drei mñă kơ drei pô Khua Yang Yêsu pô yơh gui hrô klei soh drei, Ñu mơak tŭ klei Aê Diê Ama mđua jih jang klei soh mnuih ti dlông Ñu. Brei drei ksiêm mĭn, hrô kơ klei drei pô yơh djŏ tŭ klei pơ̆ng msei kđĭn kyua klei soh drei pô ƀiădah Khua Yang Yêsu tŭ brei kơ drei leh. Klei khăp prŏng prĭn anăn drei amâo dưi lŏ tla wĭt ôh, snăn ya drei ngă tơdah dôk bi kƀĭn hlăm Knăm Bi Hdơr Klei Khua Yang Yêsu Tŭ Klei Knap Mñai? Lu hlăm phung drei hia tơdah dlăng klei mkra mdah rup Khua Yang tŭ klei ruă knap, ƀiădah Khua Yang Yêsu lač leh hŏng phung mniê Yêrusalem hlăk digơ̆ hia kơ Ñu hlăm Y-Luk 23:28 snei “… đăm hia kơ kâo ôh, ƀiădah hia kơ diih pô leh anăn kơ phung anak diih”. Khua Yang Yêsu čiăng drei hia kăp ksiêm drei pô kyuadah drei mă tŭ leh klei bi mtlaih ƀiădah si ngă drei dôk hdĭp năng hŏng klei bi mtlaih anăn mơ̆? Khua Yang čiăng drei hia kơ phung drei khăp hơiêng kyua diñu ka mă tŭ Khua Yang jing Pô bi mtlaih kơ diñu. Khua Yang čiăng drei hia kơ djuê ana Việt Nam kyua ênoh mnuih mă tŭ klei bi mtlaih adôk ƀiă êdi. Adôk mâo mmông găl kơ drei kmhal kơ klei soh leh anăn lŏ wĭt, adôk mâo mmông găl kơ drei hưn klei bi mtlaih kơ phung riêng gah drei.
Si drei wĭt lač kơ klei khăp prŏng prĭn Khua Yang Yêsu?
Wah lač: Ơ Khua Yang, Pô tŭ leh klei knap mñai kyua kâo, akâo kơ Ih đru kâo thâo hdơr knga kơ Ih nanao, dôk hdĭp bi mơak kơ Khua Yang, leh anăn hưn nanao klei bi mtlaih kơ lu mnuih. Khua Yang tŭ klei knap mñai kyua kâo.
Dlăng Klei Aê Diê Blŭ hlăm tlâo thŭn: Y-Yôp 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com.
Kênh Youtube BHKTHN:
