Yakaunpaus 5:10
Nqe cim:
“Cov kwvtij, nej yuav tsum ua siab ntev ib yam li cov cev Vajtswv lus uas tus Tswv tau txib los qhia sawvdaws. Txawm yog lawv raug kev tsimtxom heev npaum li cas los lawv tseem ua siab ntev nyiaj tej kev tsimtxom ntawd” (Yakaunpaus 5:10)
Lus nug rau sawvdaws xav:
– Cov cevlus tau ua siab ntev li cas thiab ua siab ntev ua dabtsi?
– Peb kawm tau dabtsi dhau tus qauv ua siab ntev ntawm lawv?
Phau ntawv Yakaunpaus qhia peb ntau zaj kawm muaj nqis txog lub neej ntseeg hauv tej kev sim siab ntawm kev ua siab ntev. Yakaunpaus 5:10, peb kawm cov cevlus tus qauv tiv kev txomnyem thiab ua siab ntev ua haujlwm.
Yakaunpaus tsis hais meej ib tug cevlus twg, tiamsis paub tseeb hais tias nws tabtom xav txog cov cev lus hauv Vajluskub qub, thiab Yauhas Npatitus. Lawv yog cov neeg “uas tus Tswv tau txib los qhia”. Ib txwm thaum hnov txog lo lus “cev lus”, ntau tus xav txog tej lus qhia ua ntej txog yam tseem yuav muaj los. Tseeb tiag, muaj qee tus cevlus tau Vajtswv qhia kom nws hais ua ntej txog yam yuav muaj los, tiamsis cov cevlus txhua tus, lawv tes haujlwm yog tus neeg hais lus rau Vajtswv, tshaj tawm Vajtswv cov lus rau tibneeg. Feem ntau hauv Vajtswv tej lus kom cov cevlus tshaj tawm yog nqua hu Vajtswv haivneeg tso kev txhaum tseg, hloov kev ua neej. Ntawd yog tej lus ntuas, lus ceebtoom, lus txwv uas “tsis xav mloog”. Vim li ntawd, feem coob cov cevlus raug tawmtsam thiab saib zoo li yeebncuab, luag tsis txais yuav, raug ntxub, raug tsimtxom… Muaj qee tus cev lus raug ntaus, muaj qee tus raug kaw thiab muaj qee tus tseem raug tua tuag (Mathais 5:12; 23:31, 37). Txawm li ntawd los, lawv yeej txaus siab tiv kev txomnyem, thiab ua siab ntev ua tes haujlwm uas Vajtswv cob rau lawv ua, vim lawv muaj lub siab ncaj ncees rau Vajtswv tus uas hu lawv los ua Nws tes haujlwm.
Peb cov ntseeg Yexus, peb txhua tus tau Vajtswv xaiv thiab hu los ua cov Vajtswv menyuam, peb yog cov “tus Tswv tau txib los qhia” qhov tseeb ntawm tus Tswv rau lwm tus. Vajtswv muab tes haujlwm qhia Txoj Moo Zoo cob rau peb txhua tus ntseeg, kom peb nqua hu tibneeg txhua tus tso kev txhaum tseg, los txais yuav Tswv Yexus. Peb zoo li cov cevlus hnub thaud, tej lus peb qhia tej zaum tibneeg ntiajteb yuav tsis txais yuav. Tsis tas li ntawd xwb, qee leej uas hnov peb qhia tej zaum lawv yuav ntxub thiab tsimtxom peb thiab. Tiamsis Vajtswv twb nyob nrog thiab pub dag zog rau cov cevlus ua Nws tes haujlwm hnub thaud, Nws yeej yuav nyob nrog peb cov txhua tus ua Nws tes haujlwm thiab. Yog li ntawd, peb cia li xyaum cov cevlus tus qauv, tso siab plhuav rau Vajtswv, ncaj ncees ua Nws tes haujlwm, kub siab lug qhia Txoj Moo Zoo rau tibneeg txhua tus, hauv txhua lub sijhawm. Tej nqi zog ntawm cov cevlus hnub thaud thiab peb cov ua Vajtswv haujlwm niaj hnub nimno, tsis yog tau hauv lub ntiajteb no xwb tiamsis yuav zoo tshaj ntau npaug nyob hauv Vajtswv lub tebchaws uas ci ntsia iab.
Thov Vajtswv,
Vajtswv, nyuam yaus ua Koj tsaug rau tus qauv zoo ntawm cov cevlus kev ua siab ntev tiv txomnyem ua Koj tes haujlwm. Thov Koj pab nyuam yaus kawm raws li lawv tus qauv, tso siab tagnrho rau Koj txoj kev tswj, thiab ncaj ncees tshaj tawm Txoj Moo Zoo. Txawm ntsib teebmeem thiab kev txomnyem los thov Koj pab kom nyuam yaus ua taus siab ntev. Vim nyuam yaus paub hais tias lub sijhawm uas Koj yuav rov los twb ze heev lawm. Nyuam yaus tuav Tswv Yexus Khetos lub npe thov, Amees.
Peb puas ua siab ntev tiv kev tsimtxom, kev txomnyem vim ua Vajtswv haujlwm lawm tau?
Nyeem Vajluskub hauv peb lub xyoos: Yakaunpaus 3
Kênh Youtube BHKTHN:
