Yakơ 3:1
“Ơ lu ‘nhŏng oh, iĕm ‘nĕ ăn lu buăl bơ̆n pơm ‘bok bơtho tơdrong ‘Bok Kei-Dei lơ dêh hŏ. Iĕm băt boih lu nhôn ‘bok bơtho iĕm, dah lu nhôn ưh kơ bơtho khan kơ iĕm pơm mă ‘blep trŏ, ning-mônh ‘Bok Kei-Dei sek tơlang lu nhôn hloh loi kơ lu bơngai nai.”(Yakơ 3:1)
Nơ̆r jet tơchĕng pơwao:
– Thây bơtho jang tơdrong kiơ lăm khul bơngai lui?
– Yua kơ kiơ Yakơ bơtho “iĕm ‘nĕ ăn lu buăl bơ̆n pơm thây bơtho tơdrong ‘Bok Kei-Dei lơ dêh hŏ?”
– Tơ’blŏk kơ bơ̆n thoi yơ gah tơdrong chơt hiôk păng tơdrong hli krê lăm tơdrong jang ‘nâu?
Bơngai pơm thây bơtho đei tơdrong jang gĭt găl lăm hnam akŭm khul bơngai lui. Hăm tơdrong jang hiơ̆k bơtho tơdrong lui, bơtho tơ’bôh nơ̆r Kră Yang, bơngai pơm thây bơtho tơ’bôh păng măt tơdrong tơm kăl lăm đon lui păng hlôh băt gah bơhngol kon pơlei Kră Yang. Roi tơbăt gah tơdrong jang lăm hnam akŭm ‘bok Pôl ngăl roi tơdrong jang “thây bơtho” đơ̆ng rŏng kơ “jơ̆ng ‘bang” păng “bơngai khan lê̆ adrol” (I Kôrintô 12:28; Êphêsô 4:11).
Yua kơ đơ̆ng dôm tơdrong đei ‘bơm gĭt găl đei pơma tơ kơpal thoi noh ưh kơ đei tơdrong kiơ hlĭch kơplah lơ bơngai ‘bôh mơn hiôk păng ‘maih “pơm thây bơtho”. Wă tơbăt lu bơngai ‘maih pơm ‘bok bơtho hăm tơchĕng kơnê̆, ‘bok Yakơ tơbăt: “Iĕm ‘nĕ ăn lu buăl bơ̆n pơm ‘bok bơtho tơdrong ‘Bok Kei-Dei lơ dêh hŏ”. Sư kư̆m tơbăt hơđăl tơdrong: “Iĕm băt bơih lu nhôn ‘bok bơtho iĕm, dah lu nhôn ưh kơ bơtho khan kơ iĕm mă ‘blep trŏ, ning mônh ‘Bok Kei-Dei sek tơlang lu nhôn hloh loi kơ lu bơngai nai.” Tơdrong jang lăm Kră Yang ưh kơsĭ khan mơn hiôk chơt đĕch păng noh tơdrong hiơ̆k pŭ iŏk. Tơdrong jang rai gĭt lei na tơdrong hiơ̆k pŭ iŏk rai trăp tih. Kră Yang Yêsu đei bơtho “Bơngai bu yŏng sư ăn jang tih hloh kơ đe, bơngai noh dah sư ưh kơ chu, yŏng sư gô phak sư kơtang hloh kơ đe”. (Luka 12:48)
Mă khan đĭ kơ bơ̆n ưh kơ đei tơdrong jang bơtho lăm hnam akŭm, mălei rim bơngai tă kơ “pơm thây bơtho” lăm tơdrong jang kiơ nai, hăm lu bơngai thoi kon hơ’lơ̆p lăm hnam dơnŏ, lu khul trưng pơhrăm năr Tơpơh rim khul, păng lu bơngai jum dăr kơ bơ̆n. Kơlih kơ thoi noh, rim ‘nu athei băt bơnê kơ Kră Yang gah tơdrong jang pơm thây bơtho wă tơiung đon lui bơngai nai. ‘Noh bơih minh tơdrong hiôk chơt, minh tơdrong ăn đĕch, mălei kư̆m minh tơdrong hiơ̆k tih dêh kăl kơ rim bơngai athei đĭ jơhngơ̆m mă trŏ.
Băt kơ nơ̆r bơ̆n pơma ưh kơsĭ lăp asong tơdrong bơ̆n đei đĕch ôh na tơ’bôh tơdrong tơm lăm đon lui, bơ̆n athei kơchăng pơ’lơ̆ng lăm nơ̆r bơ̆n pơma, “Hơpiĕt pơma rơngơp ‘noh thoi tơm ‘long arih; mălei đei hơpiĕt lu bơngai kơnê̆ tuĕnh jĭ pơrăm lăm jơhngơ̆m (Tơdrong Pơđơ̆k 15:4). Phŏ bơ̆n ngăl pơma tơlĕch lu tơdrong mă bơ̆n tơchĕng lăm jơhngơ̆m (Luka 6:45). Thoi noh rim năr bơ̆n athei tơmơ̆t lăm jơhngơ̆m bơ̆n ‘bĕnh kơ tơdrong ‘mêm mơnat, tơdrong ‘mêm păng tơdrong tơpăt tơpă đơ̆ng Kră Yang wă kơ hơpiĕt bơ̆n gơh pơma tơlĕch nơ̆r ba tơdrong arih. Ưh kơsĭ bơ̆n pơ’lơ̆ng lăm tơdrong bơ̆n bơtho na pơ’lơ̆ng lăm tơdrong arih hai mơ̆n, yua kơ noh bơih tơdra kơ tơdrong arih wă kơ bơngai lăng lăm tơdrong bơ̆n bơtho trŏ kơ lui dah ưh.
Ơ Kră Yang, inh bơnê kơ Ih yua kơ Ih ăn kơ inh đei jơ năr wă bơtho, bơwei lu bơngai oei jum dăr kơ inh. Apinh Yang Bơhngol ‘Lơ̆ng pơm ‘bok bơtho, bơtho kơ inh rim năr, bơwei tơdrong tơchĕng păng jơhngơ̆m inh, wă dôm tơdrong kiơ lĕch đơ̆ng hơpiĕt inh tơgŭm tơiung ăn kơ bơngai nai, păng wă kơ tơdrong arih inh jing tơ’bôh gah dôm tơdrong kiơ đêl inh đei bơtho, yua anăn Kră Yang Yêsu Krist, Amen!
Bơ̆n hăm pơkă wă adrin pơ’lơ̆ng, trŏ hloh lăm tơdrong jang pơm thây bơtho, păng hăm dôm jơ năr mă Kră Yang ăn kơ bơ̆n bơtho ưh?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 42-43
Kênh Youtube BHKTHN:
