I Xamuyees 12:16-25
Nqe cim.
“Tus TSWV kom kuv nco ntsoov thov nws tsis tseg pab nej, yog kuv tsis thov nws pab nej, ces yog kuv ua txhaum rau nws lawm” (I Xamuyees 12:23a)
Lus nug rau sawvdaws xav.
– Xamuyees tau ua dabtsi kom cov pejxeem pom tej kev txhaum loj uas lawv ua?
– Xamuyees muaj nplooj siab taij thov rau nws haivneeg licas?
– Peb kawm tau dabtsi txog Xamuyees tus qauv thov Vajtswv pab lwm tus?
Xamuyees ua tus Tswv haujlwm uas yog ua Tus Povthawj, Tus Cevlus thiab ua Thawjtswj rau cov Yixalayees. Tiamsis tomqab ntawd cov Yixalayees ho taij kom muaj ib tug vajntxwv los kav lawv, lawv tsis yuav Vajtswv ua lawv tus Vajntxwv Loj lawm. Xamuyees qhia rau cov pejxeem pom tias lawv tau “ua txhaum rau tus TSWV lawm” rau qhov lawv thov tsa ib tug vajntxwv los kav lawv. Nyob tabmeeg ntawm cov pejxem, Xamuyees taij thov tus Tswv thiab tus Tswv ua rau xob nroo thiab tso nag los nyob rau lub caij sau qoobloo. “Sawvdaws ntshai tus TSWV thiab Xamuyees kawg li”. Lawv hais kom Xamuyees thov tus Tswv zam txim kom lawv thiaj tsis raug tuag. Ib zaug ntxiv, Xamuyees rub cov Yixalayees nplooj siab rov los rau hauv tus Tswv, qhia kom lawv txhob tso tus Tswv tseg thiab ua Nws haujlwm kawg siab kawg ntsws. Xamuyees qhia rau cov pejxeem rov nco txog qhov uas Vajtswv yog tus xaiv lawv los ua Nws haivneeg thiab Nws yuav tsis tso lawv tseg yog hais tias lawv tsis tso Nws tseg ua ntej.
Txuas ntxiv, Xamuyees qhia rau cov pejxeem txog nws kev npuab siab thiab kev thov Vajtswv pab lawv. Txawm cov pejxeem ua txhaum rau tus Tswv, tsis xav yuav Xamuyees ua tus coj, los nws yeej tsis tso tseg kev thov Vajtswv pab lawv, vim ntawd yog tes haujlwm tus Tswv txib nws ua. Xamuyees kuj qhia rau lawv “paub qhov zoo thiab qhov uas tsimnyog…ua” kom lawv hwm tus Tswv thiab ua Nws haujlwm kawg siab. Dhau qhov ntawd, lawv yuav pom tej haujlwm loj uas tus Tswv ua rau lawv haivneeg. Yog tsis ua li ntawd, yog lawv tawmtsam tus Tswv thiab mus ua txhaum ces lawv thiab lawv tus vajntxwv yuav raug kev puastsuaj.
Txawm tias Xamuyees tsis pom zoo qhov uas cov Yixalayees thov tsa ib tug vajntxwv, los nws yeej tsis tso tseg kev thov Vajtswv pab lawv thiab nws yeej qhuab ntuas kom lawv ua zoo. Txawm cov pejxeem yuav zoo licas los xij, Xamuyees yeej ua ncaj ncees rau tes haujlwm uas tus Tswv tau nqua hu thiab muab cob rau nws ua. Tus Tswv kuj xav kom peb ua ncaj thiab ua siab ntev hauv kev thov Vajtswv pab lwm tus (Efexus 6:18), thiab siv Nws Txojlus los sib pab kom sawvdaws taug txojkev zoo mus cuag tus Tswv.
Xamuyees yog ib tug Cevlus tshwjxeeb txog kev thov Vajtswv rau tus Tswv haivneeg. Tus sau phau Ntawv Nkauj kuj lees hais tias Xamuyees yog tus thov Vajtswv pab cov pejxeem (Ntawv Nkauj 99:6). Txawm yog lub tsamthawj ua rau nws tsis xav thov tus Tswv rau cov pejxeem, los nws yeej ncaj ncees taij thov tus Tswv pab lawv. Xamuyees tsis vim tibneeg lossis vim tsamthawj ua rau nws ua txhaum rau tus Tswv, qhov ntawd qhia tshwm dhau ntawm nws kev thov Vajtswv pab cov pejxeem. Ntawm no yog ib tug qauv zoo rau peb kawm xyaum. Tswv Yexus qhia peb yuav tsum “thov Vajtswv pab” rau cov uas tsimtxom peb (Mathais 5:44). Yog li peb yog kwvtij nyob hauv tus Tswv lub cuabyig, txawm yog peb muaj kev xav sib txawv, los peb tsis txhob tso tseg kev thov Vajtswv sib pab.
Peb koom siab hauv kev thov Vajtswv,
Tus Tswv, Xamuyees tus qauv thov Vajtswv tau txhawb nyuam yaus hauv kev thov Vajtswv sib pab. Thov pub rau nyuam yaus ncaj ncees taij thov pab lwm tus hauv kev ntseeg kom sawvdaws ua tau neej zoo thiab ua Koj tes haujlwm. Nyuam yaus tuav Yexus Khetos lub npe thov, Amees.
Peb puas tso tseg kev thov Vajtswv pab yus tej kwvtij?
Nyeem Vajluskub hauv peb lub xyoos: Lukas 7
Kênh Youtube BHKTHN:
