Klei Aê Diê Blŭ: Rôm 14:13-23
Êlan kliăng: “Snăn brei drei tui duah klei dưi bi truh klei êđăp ênang leh anăn klei dưi bi mđĭ hdơ̆ng phung drei” (Rôm 14:19)
Klei êmuh ksiêm mĭn: Ya Khua ƀĭng kna Y-Pôl lač kơ mnơ̆ng ƀơ̆ng huă? Hŏng ya êlan phung đăo tui duah klei dưi bi truh klei êđăp ênang leh anăn klei dưi bi mđĭ hdơ̆ng phung đăo? Ya klei brei drei bi mlih hĕ čiăng amâo bi têč hnêč kơ pô mkăn?
Klei ƀơ̆ng čĭm hlô mnơ̆ng čhŏ leh anăn ƀơ̆ng mnơ̆ng arăng myơr leh kơ rup yang jing klei bi tăng prŏng snăk ti krah phung đăo. Khua ƀĭng kna Y-Pôl pô tuôm djă pioh leh klei bhiăn kăm ƀơ̆ng ktang snăk, ƀiădah ară anei ñu lač: “Hlăm Khua Yang Yêsu, kâo thâo, amâo mâo mnơ̆ng jing čhŏ hjăn gơ̆ pô ôh; ƀiădah hlei pô mĭn kơ mnơ̆ng anăn jing čhŏ, gơ̆ jing čhŏ kơ pô anăn” (êlan 14). Khua Yang Yêsu ăt mtô kơ phung ƀĭng kna Ñu msĕ snăn mơh (Y-Markôs 7:15-23). Khua ƀĭng kna Y-Pôl lač: “Kyuadah ƀuôn ala mtao Aê Diê amâo djŏ jing klei ƀơ̆ng huă mnăm ôh, ƀiădah klei kpă ênô, klei êđăp ênang, leh anăn klei hơ̆k mơak hlăm Yang Mngăt Jăk” (êlan 17). Kyuanăn, tơdah drei bi ênguôt kơ phung ayŏng adei drei kyua mnơ̆ng ƀơ̆ng, anăn jing drei amâo lŏ êbat hlăm klei khăp ôh kyuadah drei bi têč hnêč leh kơ digơ̆ (êlan 15-16). Tơdah drei tui duah klei kpă ênô, klei êđăp ênang, klei hơ̆k mơak hlăm Yang Mngăt Jăk snăn jih jang klei mdê mkăn msĕ si djă pioh klei bhiăn ƀơ̆ng mnăm, djă pioh hruê Saƀat amâodah hruê knăm…jih klei anăn amâo lŏ yuôm ôh. Brei grăp čô drei tui duah klei dưi bi truh klei êđăp ênang leh anăn klei dưi bi mđĭ hdơ̆ng drei (êlan 19). Drei amâo srăng dưi bi mđĭ leh anăn ngă klei bi hmô jăk ôh hdơ̆ng drei tơdah drei knŏng čhĭn kơ klei bi mneh msao, phat kđi kơ bruă amâo mâo yuôm, bi kčŭt hdơ̆ng drei kyua mdê klei mĭn.
Čiăng dưi ngă klei anăn, brei phung đăo gưt kơ dŭm hdră êlan ti tluôn anei: Tal sa, djă pioh klei đăo pô: “Klei đăo ih mâo leh, brei ih djă pioh knŏng kơ ih pô ti anăp Aê Diê. Jăk mơak yơh hlei pô amâo mâo ôh klei kčŭt čiăng phat kđi kơ ñu pô kyua klei ñu ngă” (êlan 22). Tơdah hlei pô đăo kơ ñu amâo dưi ƀơ̆ng ôh čĭm hlô mnơ̆ng čhŏ amâodah mnơ̆ng arăng myơr leh ti knưl ngă yang snăn đăm ƀơ̆ng ôh. Hlei pô đăo jih jang mnơ̆ng amâo jing čhŏ hjăn gơ̆ pô ôh snăn bi mni bĕ kơ Aê Diê leh anăn ƀơ̆ng. “Snăn thâodah diih ƀơ̆ng huă mnăm, amâodah ya klei diih ngă, ngă bĕ jih čiăng bi guh kơang kơ Aê Diê” (I Kôrantô 10:31).
Tal dua, đăm phat kđi amâodah bi têč hnêč kơ pô mkăn ôh. (êlan 13). Hdơr bĕ, Aê Diê phat kđi tui si klei đăo grăp čô mnuih. Grăp čô srăng klam mă jih jang bruă ñu ngă leh. Hrô kơ klei phat kđi pô mkăn, brei drei ksiêm dlăng kơ drei pô. Răng kơ klei drei srăng bi têč hnêč kơ phung ayŏng adei. Tơdah klei drei ƀơ̆ng mnăm jing klei bi têč hnêč kơ pô mkăn snăn đăm ngă ôh.“Jih jang mnơ̆ng kâo mâo klei dưi ngă sơăi,” ƀiădah amâo djŏ jih jang mnơ̆ng ôh jing tŭ dưn. “Jih jang mnơ̆ng kâo mâo klei dưi ngă sơăi,” ƀiădah jih jang mnơ̆ng amâo đru hriê kơ prŏng ôh” (I Kôrantô 10:23).
Si ngă bruă drei ngă leh anăn klei drei blŭ dưi bi mđĭ klei đăo leh anăn jing klei bi hmô jăk mơ̆ hdơ̆ng drei?
Wah lač: Ơ Khua Yang, pap brei kơ kâo đa kyuadah kâo khăng phat kđi leh anăn bi têč hnêč kơ phung ayŏng adei kâo. Brei bĕ kơ kâo mâo klei khăp, klei thâo mĭn čiăng kơ kâo ngă tui si klei Ih mtă, thâo mĭn bi nik ya klei dưi ngă amâodah ya klei amâo dưi ngă ôh čiăng dưi bi mđĭ klei đăo kâo pô leh anăn klei đăo phung ayŏng adei kâo msĕ mơh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
