Tơdrong Pơđơ̆k 25:4-5; Galati 5:19-25
“Lu bơ̆n bơngai lui kơ Kră Yang Yêsu Krist đĭ hŭt lê̆ boih dôm lu tơdrong mă đon bơ̆n juăt kơ tơchĕng pơm tơdrong kơnê̆, dang lĕ kơ bơ̆n pơ̆ng dôm tơdrong noh tơ ‘long pơglang. Yang Bơhngol ‘Lơ̆ng ăn kơ bơ̆n jing kon ‘Bok Kei-Dei, na bơ̆n kư̆m athei ăn kơ Sư pơgơ̆r bơ̆n khŏm khŏm mơ̆n.” (Galati 5:24-25)
Nơ̆r jet tơchĕng pơwao:
– Lĕch đơ̆ng tơdrong tuh hling tơmam gĭt kăl noh kiơ?
– Yua kơ kiơ athei hŭt lê̆ lu bơngai pơm kơnê̆ đơ̆ng anăp pơtao?
– Lăm kơplah tuh hling tơmam gĭt, Bơngai Lui athei hŭt lê̆ dôm tơdrong kiơ?
Đơ̆ng rŏng kơ pơma pơư pơang păng tơdrong pơgơ̆r ‘bok pơtao (Pơđơ̆k 25:1-3), Pơtao Sôlômôn pơma ‘bơm tơdrong pơlong kơplah sư yua iŏk tơdrong gơh hơgei kơdih pơgơ̆r kon pơlei. ‘Bar nơ̆r Pơđơ̆k ‘nâu đei chih kiơ̆ kơ nơ̆r đe pơđơ̆k tuh hling tơmam gĭt păng hơmet ming teh đak.
Tuh hling hu wă kơ rơgoh noh bơih minh tơdrong hling hơmet, iŏk tŭk lê̆ tơmam ưh pă yua wă kơ tơmam noh jing gĭt. Pơtao Sôlômôn yua rup bơngai hling hơmet hu, rơih hŭt lê̆ lu tơmam ưh ko yua noh lê̆ pha na hu noh rơgoh jing gĭt hloh, na pơm lu tơmam đe pơhrôp gĭt. Tơdrong rang hơdah đơ̆ng hu pơm kơ đe wă dêh păng gĭt thoi yơ noh kư̆m nhen thoi minh teh đak hiôk rơnŭk ăn kơ kon pơlei rơngei hiôk. Pơma kiơ̆ kơ đe jang lăm teh đak, tơdrong jang hơmet ming đei tơ’bôh kiơ̆ kơ đe lăng bơngai jang kơnê̆ đe gô hŭt tŭk wă kơ teh đak, noh rơngei anih kơjăp ‘lơ̆ng. “Iŏk lê̆ lu bơngai pơm kơnê̆ đơ̆ng anăp pơtao (trong 5). Yua kơ lu sư oei jê̆ pơtao, lu bơngai awih awăn, apinh jet pơtao, kơlih kơ thoi noh na ưh kơ đei ‘bơm kơ tơdrong pơtao drơ̆ng dah đei tơchĕng hơmet tơdrong tơ anăp. Dah lu sư bơngai tơnăp, tơpăt păng hơgei, lei na pơtao gô pơgơ̆r đei rơnŭk rơnua, teh đak gô kơjăp ‘lơ̆ng tơplơ̆ dơ̆ng, dah lu bơngai jang kơ pơtao tă kơ bơngai kơnê̆ ngăl, gô chông ba pơtao năm tơ tơdrong yoch păng teh đak gô pơchag răm.
Mă khan băt ră kơ tơdrong hơmet ming noh ‘lơ̆ng, mălei athei pŭ iŏk pơmat, tơdrong đe hur hơmet lăm ŭnh tŏ dêh, tŭk lê̆ lu tơmam ưh kơ yua, gah kon bơngai đe gô hơmet chu drơ̆ng tŭk lê̆, tơdrong hiong hiach, pŭ iŏk pơmat wă kơ ‘lơ̆ng rơgoh, ‘lơ̆ng dêh, pơma gah bơhngol. Chăl arih bơngai lui kăl kơ tuh hling hơmet wă kơ rơgoh, ‘lơ̆ng rŏ, jing minh ‘nu bơngai ‘lơ̆ng tơpăt, đei yua ăn kơ Kră Yang. Lăm tơdrong tuh hling hơmet wă kơ kon pơlei Kră Yang achăng lu tơdrong kiơ̆ kơ jơhngơ̆m đon sư kơdih thoi kơ: “19 Lu bơngai mă tơchĕng kiơ̆ kơ jơhngơ̆m đon sư kơdih, lu sư pơm tôm tơdrong thoi lu tơ ala âu: Sư ngôi pơyô kư̆ kă, sư ưh kơ gơh wei jơ̆ng ti kơdih; 20 sư oei kơkuh kơ yang so, sư pơm pơjâu chă sol đe; sư kơnam băl tơdrong, sư tôn teh băl, sư tơgar băl, sư hil kơ đe, sư kret, sư kuă kơ jang hơdai đe, sư wă tơklah kiơ̆ tơdrong sư kơdih, 21 sư ‘nhĕng kơ đe, sư suai sik pơm kư̆ kă, sư pơm lơ tơdrong kơnê̆, lơ tơdrong noh nai dơ̆ng. Inh wă pơma dơ̆ng kơ iĕm thoi inh roi boih kơ iĕm sơ̆: Dôm lu bơngai pơm thoi noh ưh kơ gơh oei hơdai tơ dêh char ‘Bok Kei-Dei ôh ning-mônh.” (Galati 5:19-21). Dah bơ̆n ưh kơ hơmet ming, ưh kơ lăp đon “Lu bơ̆n bơngai lui kơ Kră Yang Yêsu Krist đĭ hŭt lê̆ boih dôm lu tơdrong mă đon bơ̆n juăt kơ tơchĕng pơm tơdrong kơnê̆, dang lĕ kơ bơ̆n pơ̆ng dôm tơdrong noh tơ ‘long pơglang.” (Galati 5:24), lei na lu bơ̆n ưh kơ rơgoh, ưh kơ gơh oei hơdai tơ dêh char ‘Bok Kei-Dei ôh ning mônh. Kư̆m ưh kơ đei khul tơpôl bơngai lui pran kơjăp, ưh kơ pơư anăn Kră Yang. Apinh Kră Yang tơgŭm đĭ jơhngơ̆m gơnang kơ Yang Bơhngol ‘Lơ̆ng na arih, păng pơkă pơkăm yak kiơ̆ Yang Bơhngol ‘Lơ̆ng, hơmet ming chăl arih rim năr wă kơ jing minh tơmam gĭt gơh yua ‘lơ̆ng trŏ kơ Kră Yang wă.
Ơ Kră Yang, inh bơnê kơ Ih yua kơ Ih đei pŭ iŏk tơdrong pơmat yua kơ inh. Apinh Ih tơgŭm kơ inh chu iŏk tơdrong Ih bơtho pơjĭ, achăng tŭk tơdrong kơnê̆ wă kơ ‘lơ̆ng rơgoh rim năr. Apinh Ih tơgŭm inh pơkă pơkăm yak kiơ̆ Yang Bơhngol ‘Lơ̆ng, ưang anăn Ih. Krao khan yua anăn Kră Yang Yêsu Krist, Amen.
Lu bơ̆n apinh Kră Yang tơgŭm bơ̆n achăng tơdrong kơnê̆ ayơ lăm năr ‘nâu?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 7
Kênh Youtube BHKTHN:
