Mathais 17:1-8
Nqe cim:
“Vajtswv lub hwjchim ua rau tus Tub ntawd ci ntsa iab. Nws muaj hwvxyeej ib yam li Vajtswv, nws tej lus uas muaj hwjchim loj kawg nkaus tuav lub ntuj thiab lub ntiajteb. Thaum nws theej neeg lub txhoj tas lawm, nws mus saum ntuj ceebtsheej. Nws mus zaum ntawm Vajtswv tus uas muaj hwchim loj kawg nkaus sab xis.” (Henplais 1:3).
Lus nug rau sawvdaws xav:
– Cov timthawj twb pom peb yam timkhawv twg hais txog Tswv Yexus yog Vajtswv saum lub roob Yexus lub cev hloov?
– Qhov uas Timthawj Petus hais, qhia paub Petus paub Yexus li cas?
– Peb ua neej zoo li cas kom qhia tawm tus Tswv lub tshwjchim rau txhua tus neeg?
Rau hnub tom qab uas Tswv Yexus hais rau cov timthawj, “Kuv qhia tseeb rau nej hais tias, cov neeg uas nyob ntawm no muaj qee leej yuav tsis tau tuag ua ntej uas lawv pom Neeg Leej Tub los ua Vajntxwv” (Mathais 16:28), tus Tswv twb qhia tshwm Nws lub tshwjchim rau peb tus timthawj uas yog Petus, Yakaunpaus thiab Yauhas pom. Lawv pom peb yam timkhawv qhia tias Tswv Yexus yog Vajtswv.
Thib ib, Tswv Yexus hais tias thaum Nws tau lub tshwjchim uas Nws ibtxwm muaj, “Nws lub ntsejmuag ci ib yam li lub hnub, thiab Nws cev ris tsho ci ntsa iab dawb paug.” (nqe 2). Thib ob, Mauxes thiab Eliyas ua timkhawv. Thaum Tswv Yexus lub cev hloov, muaj Mauxes tus uas sawvcev Vajtswv txoj Kevcai uas yog tej lus cog tseg qub; thiab Eliyas tus uas sawvcev rau cov cev Vajtswv lus tshaj tawm tias tus Mexiyas yuav los ua timkhawv. Qhov uas muaj Mauxes thiab Eliyas no yog ua timkhawv qhia tias Tswv Yexus yog tus Mexiyas thiab Nws yog Vajtswv tus uas muaj tshwjchim ci ntsa iab, pab kom cov timthawj muaj kev ntseeg thiab rau siab ntso kwv ntoo khaublig nrog tus Tswv mus txog thaum kawg, tshwjxeeb yog Timthawj Petus, rau qhov nws nyuam qhuav lees tias Tswv Yexus yog “tus Mexiyas uas yog Vajtswv tus uas muaj siab nyob tus Tub.” (Mathais 16:16). Thib peb, Leej Txiv ua timkhawv tias, “tus no yog kuv tus Tub uas kuv hlub, kuv txaus siab rau nws, nej cia li mloog nws lus.” (nqe 5). Vaj Leej Txiv qhia txog lub Zwmtxwv Thib Ob yog Vajtswv tus Tub los hauv ntiajteb ua txojkev cawm dim cawm tibneeg los ntawm Nws txojkev tuag txhiv.
Timthawj Petus thiaj lees hais tias, “tus Tswv, peb tuaj nyob ntawm no zoo kawg li! Yog koj pom zoo, kuv yuav ua peb lub tsev pheebsuab rau ntawm no, ib lub rau koj, ib lub rau Mauxes thiab ib lub rau Eliyas.” (nqe 4). Lukas hais ntxiv, “Petus tsis paub xyov ua cas Petus hais li ntawd.” (Lu-ca 9:33). Qhov no qhia paub tias Timthawj Petus tabtom xav rau nws tej kev npaj thiab nws lub siab xav heev dua tus Tswv. Nws tsuas pom ntawm qhovmuag xwb tsis pom tom ntej, tsuas pom tus Tswv lub tshwjchim ntawd xwb tsis pom tom ntej tus Tswv yuav tuag theej neeg ntiajteb.
Nimno, peb muaj ntau leej tsuas hmov tshua yus qhov kev npaj xwb tsis zeem paub tias tus Tswv xav kom peb ua li cas thiaj ua rau Nws tau ntsejmuag li. Cia li nco ntsoov Vajtswv tus uas peb tabtom pehawm yog tus Vajtswv uas muaj tshwjchim ci ntsa iab thiab muaj hwjchim loj kawg nkaus. Cia li mloog Tswv Yexus tej lus, cia li ntseeg tias Vajtswv Txojlus yog Txojlus zoo li rab ntaj ob sab ntse thiab muaj kuab kawg li, tus Tswv xav kom peb yuav tsum ua neej qhia tawm lub tshwjchim ntawd rau tej neeg nyob ibncig peb.
Thov Vajtswv,
Tus Tswv, thov Koj pab kom nyuam yaus tsis txhob ua raws li nyuam yaus siab nyiam, tiamsis ua raws li Koj nyiam nyob hauv nyuam yaus lub neej. Thov tus Tswv Koj qhia kom nyuam yaus mloog Koj hais, ua rau Koj tau ntsejmuag. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Peb ua rau tus Tswv tau ntsejmuag los ntawm peb lub neej li cas?
Nyeem Vajluskub hauv peb lub xyoo: Teev Npe 21
Kênh Youtube BHKTHN:
