Klei Aê Diê Blŭ: Y-Mathiơ 17:1-8
Êlan kliăng: “Gơ̆ jing klei ktlă klei guh kơang Aê Diê, leh anăn jing rup kdrưh nik hŏng Aê Diê. Gơ̆ krơ̆ng lăn adiê hŏng klei Gơ̆ blŭ myang. Tơdah leh Gơ̆ ngă klei bi doh klei soh mnuih, Gơ̆ dôk gŭ tĭng hnuă kơ Pô Guh Kơang ti dlông.” (Hêbrơ 1:3)
Klei êmuh ksiêm mĭn: Phung khua ƀĭng kna ƀuh ya tlâo klei bi mlih asei mlei Khua Yang Yêsu ti dlông čư̆? Si klei Khua ƀĭng kna Y-Pêtrôs ngă bi êdah klei ñu thâo kơ Khua Yang? Si drei hdĭp čiăng mtrang klei guh kơang Khua Yang kơ grăp čô mnuih?
Năm hruê leh Khua Yang Yêsu lač hŏng phung khua ƀĭng kna, “Sĭt nik kâo lač kơ diih, mâo đa đa dôk tinei amâo srăng djiê ôh êlâo kơ diñu ƀuh Anak Mnuih hriê hlăm ƀuôn ala mtao Ñu” (Y-Mathiơ 16:28), Khua Yang bi êdah leh klei guh kơang Ñu kơ tlâo čô Khua ƀĭng kna Y-Pêtrôs, Y-Yakơ leh anăn Y-Yôhan. Diñu ƀuh tlâo klei bi mlih asei mlei Khua Yang Yêsu.
Tal sa, Khua Yang Yêsu bi mklă tơdah Ñu hơô jih klei guh kơang Ñu mâo, “Ƀô̆ mta Ñu mtrang msĕ si yang hruê, leh anăn ao Ñu jing kô̆ msĕ si klei mngač” (êlan 2). Tal dua, Y-Môis leh anăn Y-Êli bi mklă. Tơdah Khua Yang Yêsu bi mlih asei mlei, mâo Y-Môis bi ala kơ Klei Bhiăn jing klei bi mguôp hđăp; leh anăn Y-Êli bi ala kơ phung khua pô hưn êlâo hưn Yang Mêsi. Mâo dua čô yuôm bhăn anei bi mklă Khua Yang Yêsu jing Yang Mêsi leh anăn Ñu jing Aê Diê bŏ hŏng guh kơang, mbĭt anăn mđĭ klei đăo phung khua ƀĭng kna čiăng kơ diñu dưi klam kyâo bi kal pô tui hlue Khua Yang truh knhal tuč, boh nik jing kơ Khua ƀĭng kna Y-Pêtrôs kyua ñu mrâo lač Khua Yang Yêsu jing “Ih jing Yang Krist, Anak Aê Diê hdĭp”(Y-Mathiơ 16:16). Tal tlâo, Aê Diê Ama bi mklă tơdah Ñu lač, “Anei jing Anak kâo khăp êdimi, hlăm Ñu kâo mâo klei mơak snăk. Brei diih hmư̆ bĕ klei Ñu” (êlan 5). Aê Diê Ama hưn Tal Dua jing Anak Aê Diê hriê ti lăn ala čiăng ngă bruă bi tui anak mnuih mơ̆ng klei Khua Yang Yêsu djiê leh anăn lŏ kbiă lŏ hdĭp.
Khua ƀĭng kna Y-Pêtrôs lač hŏng Khua Yang, “Ơ Khua Yang, jăk yơh drei dôk tinei, tơdah Ih čiăng kâo srăng ngă tlâo boh sang čhiăm tinei, sa boh kơ Ih, sa boh kơ Y-Môis, leh anăn sa boh kơ Y-Êli” (êlan 4). Y-Luk lač thiăm, “Gơ̆ amâo thâo ôh ya klei gơ̆ lač” (Y-Luk 9:33). Klei anei brei ƀuh Khua ƀĭng kna Y-Pêtrôs dôk lĕ hlăm dŭm hdră kčah leh anăn klei mĭn pô hĭn kơ Aê Diê. Ñu knŏng ƀuh klei ti anăp ală mta đuč amâo ƀuh ôh klei kbưi hĭn, knŏng ƀuh Khua Yang guh kơang ƀiădah amâo ƀuh ôh hdră bi tui klei soh mơ̆ng klei Ñu djiê.
Hruê anei, lu blư̆ drei ăt knŏng mđing kơ hdră kčah pô ƀiădah amâo thâo ôh Khua Yang čiăng drei hdĭp si ngă čiăng bi guh kơang Anăn Ñu. Brei hdơr Aê Diê drei dôk kkuh mpŭ jing sa Aê Diê bŏ hŏng guh kơang leh anăn myang. Brei gưt asăp Klei Aê Diê Blŭ, brei đăo kơ Klei Aê Diê Blŭ jing Klei Blŭ hdĭp leh anăn myang, Khua Yang čiăng drei hdĭp bi êdah klei guh kơang Ñu kơ phung riêng gah.
Si hdră drei ngă čiăng bi guh koang Anăn Aê Diê hlăm klei hdĭp pô?
Wah lač: Ơ Khua Yang, akâo kơ Ih đru kâo amâo hdĭp hlue si klei kâo čiăng lăm lui hĕ klei Ih čiăng hlăm klei hdĭp pô. Akâo kơ Ih đru kâo gưt asăp Ih nanao, bi guh kơang Anăn Ih hlăm djăp boh klei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Yap 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
