II Xwmtxheej Vajntxwv 20:14-17
Nqe cim:
“Nej yuav tsis tau tua lawv. Nej tsuas yog mus txum chaw tos xwb, nej yuav pom hais tias tus Tswv yuav ua kom nej kov yeej. Cov Yudas thiab cov neeg uas nyob hauv lub nroog Yeluxalees, nej tsis txhob poob siab, lossis tsis txhob ntshai. Nej cia li mus, tus Tswv yuav nrog nraim nej” (II Xwmtxheej Vajntxwv 20:17).
Lus nug rau sawvdaws xav:
– Yam dab tsi qhia paub hais tias tus Tswv mloog cov Yudas tej lus thov?
– Vim li cas lawv tsis txhob ntshai?
– Tus Tswv kom lawv ua li cas?
– Peb kawm tau yam dab tsi ntawm vajntxwv Yehausafas thaum muaj kev txhawj ntshai?
Thaum raug yeebncuab tuaj tua, vajntxwv thiab tej pejxeem tuaj thov tus Tswv hais tias;“…rau qhov tsis muaj leejtwg pab peb kom dim ntawm cov tubrog coob coob uas tuaj tua peb. Peb tsis paub yuav ua li cas, tiamsis peb thov koj pab” (nqe 12). Tus Tswv teb lawv tej lus thov, tus Tswv tus Ntsujplig txawm los kav hlo Yahaxiyees, yog ib tug neeg Levis qhia tawm tus Tswv cov lus txhawb lawv lub zog. Tus Tswv cov lus hais txog qhov uas lawv ntshai vim yog; “cov tubrog ntawd coob coob”, tiamsis tus Tswv paub lawv tej kev ntshai thiab teb lawv tej lus thov. Tus Tswv hais tias “nej tsis txhob poob siab, tsis txhob ntshai” rau qhov tsis yog lawv mus ntaus rog tiamsis yog tus Tswv mus ntaus rog rau lawv (nqe 15). Tus Tswv kuj coglus rau lawv hais tias, “tus Tswv yuav nrog nraim nej” (nqe 17), qhov ntawd kuj txhawb lawv lub zog kom tsis txhob ntshai.
Tus Tswv kom cov Yudas cia li tawm mus “txum chaw tos xwb” kom saib Vajtswv tua lawv cov yeebncuab. Tus Tswv tsis kom lawv qw lossis quaj, kuj tsis kom lawv khiav mus lossis nrhiav chaw nkaum, tiamsis kom lawv saib Vajtswv kev pab lawv. Tus Tswv kom lawv yuav tsum npaj nroos yuav ua rog thiab saib ntsoov Vajtswv pab lawv, vim pluav rog ntawd yog tus Tswv mus tua rog rau lawv, lawv yuav yeej rog los ntawm tus Tswv ua txujci tsis yog los ntawm lub dag zog. Thiab kom nyob taus ntawm yeebncuab lub xubntiag, lawv yuav tsum tso siab plhuav rau tus Tswv txoj kev hlub muaj pub rau lawv thiab ntseeg ruaj khov rau Vajtswv lub fwjchim uas “muaj zog loj zog nchav, thiab tsis muaj leejtwg yuav tawm tsam yeej” (nqe 6).
Ntau zaug peb kuj ntsib yeebncuab uas muaj zog tuaj vij peb, lossis ntsib teebmeem nyuaj siab tuaj raug ua rau peb ntsib kev tws. Tej zaum ntsib txomnyem thaum ua tus Tswv haujlwm, tsis muaj noj haus, poob haujlwm lossis raug tus hlub muab tso… ua rau peb qaug zog tsis paub yuav ua li cas. Thaum muaj zoo li ntawd, peb yuav tsum los “thov Vajtswv pab” ib yam li vajntxwv Yehauxafas tau ua los lawm, cia siab hais tias, tus Tswv yuav teb peb tej lus thov thiab pab peb raws li Nws pom zoo. Thaum muab tej teebmeem qhia rau tus Tswv lawm, peb yuav tsum ntseeg thiab cia siab kom “tsis poob siab lossis ntshai”, thiab“tos ntsoov tus Tswv kev pab cawm”.
Thov Vajtswv,
Tus Tswv, yog nyuamyaus muaj kev poob siab txhawj ntshai twg tsis paub los thov Koj pab, thov Koj zam txim thiab pab kom nyuam yaus muaj kev ntseeg txaus kam tso plhuav lub neej rau koj ua tus tswj kav. Amees.
Puas muaj yam kev nyuaj siab twg ua rau koj txhawj ntshai, tos tsis taus tus Tswv kev pab cawm?
Nyeem Vajluskub hauv peb lub xyoo: Malakaus 1:40-2:22
Kênh Youtube BHKTHN:
