Klei Aê Diê Blŭ: II Klei Yăl Dliê 20:14-17
Êlan kliăng: “Diih amâo srăng bi blah ôh; dăp bĕ kahan diih, dôk sa anôk, leh anăn kăp dlăng klei Yêhôwa dưi hlăm klei ñu bi blah brei kơ diih, Ơ phung Yuđa leh anăn phung dôk hlăm ƀuôn Yêrusalem. Đăm huĭ ôh, leh anăn đăm êdu ai ôh; mgi nao bi tuôm hŏng diñu bĕ, leh anăn Yêhôwa srăng dôk mbĭt hŏng diih” (II Klei Yăl Dliê 20:17)
Klei êmuh ksiêm mĭn: Ya klei brei ƀuh Aê Diê mđing hmư̆ leh anăn thâo klă klei phung Yuđa dôk găn? Ya mta phŭn brei diñu đăm huĭ ôh? Ya bruă Aê Diê brei diñu ngă? Si drei tui hriăm klei Mtao Jôsaphat bi hmô tơdah rŭng răng, huĭ hyưt?
Tơdah phung roh ksŭng ngă, mtao hŏng phung ƀuôn sang Yuđa kwưh akâo kơ Aê Diê snei “… hmei amâo mâo klei ktang ôh bi blah hŏng phung lu lĭn anei hriê ngă kơ hmei. Hmei amâo thâo ôh ya srăng ngă, ƀiădah ală hmei dôk dlăng kơ Ih” (êlan 12). Wĭt lač klei kwưh akâo anăn, Mngăt Myang Yêhôwa trŭn dôk ti Y-Jahasiêl, jing sa čô mnuih Lêvi hưn mdah Klei Aê Diê Blŭ. Klei hưn êlâo mñă wĭt mta phŭn diñu huĭ hyưt jing “kyua phung lu lĭn anei”, brei ƀuh Aê Diê mđing hmư̆ klei wah lač leh anăn thâo klă boh klei diñu. Aê Diê lač hŏng diñu “đăm huĭ ôh, leh anăn đăm êdu ai ôh” kyua klei bi blah anei amâo djŏ jing kơ diñu ôh ƀiădah jing mơ̆ng Aê Diê, jing Ñu srăng bi blah kơ digơ̆ (êlan 15). Dua blư̆ Ñu ƀuăn “Yêhôwa srăng dôk mbĭt hŏng diih” (êlan 17), klei anei ăt thiăm ai ktang čiăng kơ diñu đăm huĭ ôh.
Aê Diê lač brei diñu ba kahan leh anăn dăp bi blah êlâo kơ phung roh leh anăn “kăp dlăng” klei Yêhôwa Aê Diê bi mtlaih. Ñu amâo lač ôh kơ digơ̆ ur driâo, čŏk hia, ăt kăn lač brei đuĕ dăp rei amâodah duah anôk mdăp čiăng dlăng si Aê Diê bi mtlaih. Aê Diê lač brei diñu dôk hlăm klei bi blah leh anăn kăp dlăng klei Ñu bi mtlaih kyua anei jing klei Aê Diê bi blah kơ diñu, diñu srăng dưi kluôm dhuôm kyua klei myang Aê Diê amâo djŏ ôh kyua phung lĭng kahan ktang kjăp. Leh anăn čiăng dưi dôk kăp dlăng ti anăp phung roh, brei diñu mâo klei đăo knang kluôm dhuôm hlăm klei khăp Aê Diê brei kơ diñu, leh anăn đăo hlăm klei myang Ñu jing Pô “jing khua kơ jih jang ƀuôn ala mtao phung găp djuê mnuih? Hlăm kngan Ih mâo klei myang leh anăn klei ktang, snăn amâo mâo sa čô dưi bi kdơ̆ng hŏng Ih ôh” (êlan 6).
Mâo lu mmông drei ăt mâo phung roh ktang wang jŭm dar, amâodah dŭm klei dleh dlan ngă kơ drei msĕ si luč klei čang hmăng. Năng ai anăn jing klei dleh dlan hlăm klei mă bruă kơ Aê Diê, hlăm ngăn prăk, hlăm bruă amâodah hlăm klei bi mguôp hŏng phung găp djuê… Drei ăt ƀuh pô amâo lŏ mâo ai ktang leh anăn amâo thâo ya bruă ngă ôh. Klei rŭng răng, huĭ hyưt tơl amâo dưi ngă ya mta bruă. Hlăm boh klei anăn, êlâo hĭn brei drei “dlăng kơ Aê Diê” msĕ si Mtao Jôsaphat kwưh akâo, đăo sĭt Ñu srăng mđing hmư̆ leh anăn bi mtlaih hlue si hdră Ñu. Tơdah drei myơr klei drei tuôm kơ Ñu, brei drei ăt mâo klei đăo čiăng “đăm huĭ ôh, leh anăn đăm êdu ai ôh”, leh anăn “kăp dlăng klei Yêhôwa Aê Diê bi mtlaih” jing Pô dôk mbĭt nanao hŏng drei.
Ya klei dleh dlan ngă kơ diih huĭ tơl amâo dưi dôk ñăt čiăng ƀuh klei Aê Diê bi mtlaih?
Wah lač: Ơ Khua Yang, tơdah hlăm klei rŭng răng, huĭ hyưt ngă kơ kâo amâo dưi dôk ñăt kăp dlăng klei Ih bi mtlaih, akâo kơ Aê Diê pap brei kơ kâo leh anăn thiăm brei klei đăo kơ kâo čiăng kâo đăo knang leh anăn jao jih kơ Ih.
Dlăng Klei Aê Diê Blŭ hlăm tlâo thŭn: Y-Markôs 1:40-2:22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
