Khiavdim 40:12-15
Nqe cim:
“Muab lub tsho loj rau Aloos hnav thiab muab nws txhawb meejthawj, nej ua li no thiaj yog nej muab nws tsa ua povthawj ua kuv tes haujlwm” (Khiavdim 40:13).
Lus nug rau sawvdaws xav:
– Kabke tsa Aloos thiab nws cov tub ua Povthawj li cas?
– Ua Vajtswv tus povthawj yog li cas?
– Muaj tej yam twg sib thooj qhov uas peb los ntseeg Tswv Yexus?
Tas nrho txhua yam khoom cuabyeej siv sab hauv thiab sab nraud ntawm lub Tsevntaub tsuas yog thaum tau ywg roj thiaj dhau mus ua dawbhuv xwb. Tiamsis Aloos thiab nws cov tub yuav tsum tau npaj txhua yam uas Vajtswv qhia ua thiab ua kabke txhij txhua, lawv thiaj yuav dawbhuv thiab mus sawv taus ntawm Vajtswv lub xubntiag, ua Nws tes haujlwm (Kevcai 8:1-13).
Ua ntej, lawv yuavtsum tau ntxuav tes taw hauv lub phiab kom huv (nqe 12). Ntawd yog kevcai ntxuav txhua zaus uas yuav mus ntsib Vajtswv, yog cov Povthawj tsis ua li ntawd thaum mus ntsib Vajtswv lawv yuav raug tuag (Khiavdim 30:19-21). Ntxiv mus yog lawv yuav tsum hnav lub tsho dawbhuv. Lub tsho dawbhuv uas tus Povthawj hlob Aloos hnav zoo heev, yog xaws raws li Vajtswv qhia thiab muaj ntau lub ntsiab tseemceeb nyob rau hauv lub tsho ntawd. Lub tsho muaj daim ntaub npog hauv siab dhos kaum ob lub qe zeb uas muaj nqis, txaug kaum ob xeem Yixalayees li npe rau. Muaj daim efaus uas sawv cev rau kaum ob xeem Yixalayees (Khiavdim 28). Ulees thiab Thumees saum daim ntaub npog hauvsiab yog cuab yeej pab lawv nug thiab txuas lus nrog Vajtswv. Qhov uas lub tsho dawbhuv muaj nqis thiab zoo kawg nkaus yog piv txog Vajtswv tus yam ntxwv uas dawbhuv thiab muaj tshwjchim. Tom qab npaj txhua yam tiav lawd, muab cov yuav ua povthawj ywg roj, tsa lawv ua cov Povthawj dawbhuv thiab hnav tej tsho dawbhuv ua Vajtswv tes haujlwm hauv lub Tsevntaub. Yog tus Povthawj twg tsis hnav lub tsho dawbhuv mam mus ntsib Vajtswv tus ntawd yuav raug tuag.
Tus Povthawj tes haujlwm yog sawv cev Vajtswv haiv neeg mus ntsib Vajtswv thiab coj Vajtswv tej lus los hais rau Vajtswv haiv neeg. Dhau ntawd, cov Povthawj yog cov ua haujlwm rau hauv lub Tsevntaub thiab sawv cev Vajtswv haiv neeg ua tej kevcai hauv kev pehawm Vajtswv txhua hnub thiab tej kevcai tshwjxeeb xws li; kevcai theej txhoj, kevcai fij khoom ua Vajtswv tsaug…
Niaj hnub nimno, thaum los ntseeg Tswv Yexus lawm, tau txais yuav Yexus ua peb tus Tswv Cawmseej, Tswv Yexus cov ntshav twb ntxuav peb lub txim txhaum uas raws roj ntsha thiab tej kev txhaum uas peb ua yav tas los lawm. Tswv Yexus muab Nws lub tsho ncaj ncees rau peb hnav lawm, vim li tawd Vajtswv thiaj hu peb yog neeg ncaj ncees, thaum Nws pom peb hnav Nws Leejtub lub tsho ncaj ncees. Peb raug muab cais tawm kom dawbhuv rau Vajtswv lub tebchaws. Peb tau txais Vaj Ntsujplig los nrog peb nyob, qhia peb, coj peb thiab pub rau peb muaj tswvyim, dag zog los ua tau lub neej rau Vajtswv lub npe nrov ncha. Timthawj Petus kuj sau qhia hais tias, tus ntseeg Yexus lawm yog Vajtswv tus Povthawj hlob, yog haiv neeg dawbhuv, yog Vajtswv haivneeg, yog li ntawd, peb tau txoj koob hmoov uas zoo kawg nkaus, tau kawm Vajtswv Txojlus, tau pehawm Vajtswv thiab muaj cai los taij thov Vajtswv pab rau txhua tus, tsis tas li ntawd, peb tseem tau cai qhia Vajtswv kev hlub, kev cawmdim rau txhua tus uas tsis tau paub Vajtswv thiab (1 Petus 2:9).
Thov Vajtswv
Ua Vajtswv tsaug, uas Koj tau xaiv nyuam yaus hauv lub ntiajteb no los ua Koj menyuam, thiab tau ua pejxeem hauv tebchaws Ceebtshej. Thov pab nyuam yaus saib lub luag haujlwm uas Koj pub kom muaj nqis thiab ua tiav tes haujlwm Koj muab cob kom zoo. Amees.
Peb txais txoj koob hmoov tshwjxeeb uas Vajtswv pub, peb puas ua tiav lub luag haujlwm uas yog povthawj lawm tau?
Nyeem Vajluskub hauv peb lub xyoos: Tes Haujlwm 7:20-53
Kênh Youtube BHKTHN:
