III Xwmtxheej Vajntxwv 20:5-17
Nqe cim:
“…Tus Tswv uas yog peb cov yawgkoob tus Vajtswv, Koj nyob saum ntuj kav tagnrho txhua haiv neeg hauv ntiajteb no. Koj yog tus muaj fwjchim, muaj zog loj zog nchav, thiab tsis muaj leejtwg yuav tawm tsam yeej Koj” (II Xwmtxheej 20:6).
Lus nug rau sawvdaws xav:
– Vajntxwv Yehausafas thiab cov pejxeem ua dab tsi?
– Vajntxwv lees paub Vajtswv yog tus zoo li cas?
– Vajntxwv siv lub vimchiv dab tsi los thov tus Tswv pab cawm?
– Peb tig saib thiab tos leejtwg thaum ntsib teebmeem?
Vajntxwv Yehausafas tsa ncauj thov “lawv cov yawgkoob tus Vajtswv” (nqe 5-6) qhia txog kev sib txuas ntawm tus Tswv thiab nws haiv neeg. Vajntxwv lees paub Vajtswv yog tus tswj kav txhua yam hauv ntiajteb thiab tsis muaj leejtwg yuav tawmtsam yeej nws lub fwjchim. Vajntxwv lees paub hais tias, Vajtswv tsis yog lawv cov yawgkoob tus Vajtswv xwb, tiamsis tseem yog lawv tus Tswv ib yam nkaus (nqe 7). Tus Tswv yog tus pub lub tebchaws no rau Nws haivneeg “ Anplahas cov xeebntxwv”. Lawv tau txais lub tebchaws ua lawv tug, los nyob hauv lub tebchaws thiab ua lub tuamtsev teev tiam Vajtswv. Qhov chaw ntawd yog thaj chaw lawv los nrhiav tus Tswv, thov tus Tswv pab cawm thaum ntsib teebmeem.
Thaum no, twb taubhau nrog yeebncuab, vajntxwv nrog rau pejxeem los thov tus Tswv pab. Vajntxwv rov hais txog keebkwm tus Tswv pab haiv neeg Yixalayees tawm nram tebchaws Iziv los, uas tus Tswv tsis pub lawv los txeeb peb lub tebchaws ntawd. Vajtswv haiv neeg mloog lus uas li tus Tswv hais. Tiamsis, tamsim no cov neeg hauv tej teb chaws ntawd tsis nco Vajtswv haiv neeg txiajntsig puam chawj, tseem ho txhij tubrog tuaj tua Vajtswv haiv neeg, Vajtswv yuav tsis rau txim rau cov neeg ntawd lov? (nqe 12). Vajtswv teb vajntxwv thiab nws cov pejxeem tej lus thov, txhawb lawv lub zog los ntawm Yahaxiyees tej lus hais tias, “tus Tswv nrog nraim nej” (nqe 17) thiab pab lawv tua yeej lawv cov yeebncuab (nqe 24).
Qhov no qhia rau peb pom hais tias, Vajtswv muaj kev sib txuas nrog nws haiv neeg. Tus Tswv twb hlub nws haiv neeg yav dhau los lawm, yog Nws haiv neeg cia siab ntsoov rau tus Tswv ces, Nws yeej yuav hlub lawv thaum uas lawv mloog Nws lus. Lawv cov yawgkoob yog Vajtswv li phoojywg, ces lawv yeej yog tus Tswv li phoojywg thaum lawv muaj kev sib txuas zoo nrog tus Tswv thiab paub mloog tus Tswv lus (Yauhas 15:14). Vajntxwv kuj tsa suab thov Vajtswv los ntawm lub siab dawb huv, paub nws tus kheej thiab nws cov pejxeem tab tom nyob ntawm Vajtswv sab, tsis ua yam txhaum uas tawm tsam tus Tswv. Vajntxwv thov Vajtswv nrog saib qhov uas nws haiv neeg ua ncaj thiab lawv cov yeebncuab ua tsis ncaj rau lawv.
Thaum ntsib teebmeem tuaj raug, vajntxwv thiab nws tej pejxeem lees paub tus Tswv yog tus yuav pub tau kev kaj siab thiab cawm lawv dim kev nyuaj siab, yog tus yuav tu plaub ntug ncaj ncees rau lawv. Lawv thov Vajtswv pab thiab tau tus Tswv txhawb zog hais tias; “nej tsis txhob qaug zog lossis ntshai cov tubrog coob ntawd… rau qhov Vajtswv yog tus yuav tua lawv…” (nqe 15). Tus Tswv yog tus uas mus pab lawv ntaus rog, thiab tua lawv cov yeebncuab. Thaum ntsib teebmeem nyuaj siab, peb yuav tsum xyaum vajntxwv Yehausafas tus qauv, kom txhob saib rau tej kev txhawj ntshai tiamsis saib ntsoov rau tus Tswv uas muaj fwjchim (nqe 6) thiab tos ntsoov tus Tswv kev pab cawm (nqe 12).
Thov Vajtswv,
Tus Tswv, thov pab nyuam yaus txhob pheej tig saib rau tej teebmeem, tiamsis tig saib ntsoov Koj los ntawm lub siab dawb huv thov Koj pab cawm. Ntseeg hais tias Koj yuav pab cawm nyuam yaus raws li Koj siab nyiam. Amees.
Peb puas tas kev cia siab thaum tig saib tej teebmeem uas tuaj raug lub neej?
Nyeem Vajluskub hauv peb lub xyoo: Malakaus 1:1-39
Kênh Youtube BHKTHN:
