Tơdrong Pơđơ̆k 27:21
“Anih ‘buh hu wă rơgoh, tơnuh ŭnh soh maih wă kơ hlăng; Mă-lei đe lăng jơhngơ̆m bơngai thoi đe bơnê kơ sư noh.” (Tơdrong Pơđơ̆k 27:21)
Nơ̆r jet tơchĕng pơwao:
– Pơtao Salômôn wă pơma tơdrong kiơ kơplah sư đei pơting kơ tơdrong ư-ang noh jơ̆ nhen thoi tơdrong ‘buh hu maih gĭt?
– Tơdrong ư-ang tơgŭm bơ̆n lăng kơdih akâu bơ̆n thoi yơ?
– Lu kon Kră Yang kăl kơ đei nơ̆r pôk pơ-ư dih băl păng sơng iŏk nơ̆r pơ-ư noh hăm tơdrong thoi yơ?
Hu păng maih kăl kơ đei ‘buh lăm ŭnh wă hŭt lê̆ lu teh klep, păng tơdrong gĭt sư gô đei rai dêh đơ̆ng ‘buh tơ ŭnh noh. Pơtao Salômôn yua tơdrong âu wă pơting kơ tơdrong pôk pơ-ư kŭm nhen thoi pơlong lăng lăm jơ-hngơ̆m bơngai thoi yơ. Bơ̆n đei tơdrong thoi yơ kơplah đei bơngai pôk pơ-ư lăm jơ-hngơ̆m bơ̆n đei tơdrong tơchĕng thoi yơ noh jơ̆ bơ̆n bơngai thoi noh. Nơ̆r pơđơ̆k âu đei tơ’blŏk ăn kơ bơ̆n tơdrong đe pôk pơ-ư noh jơ̆ nhen thoi thưk pơtŏ đơ̆ng plĕnh pơdah kơ tơdrong đon lui bơ̆n thoi yơ, wă kơ bơ̆n băt kơ kơdih kâu bơ̆n.
Mă mônh, tơdrong pôk pơ-ư băt kơ lăm jơ-hngơ̆m bơ̆n tơpă thoi yơ. Nơ̆r pơ-ư ‘bơm lăm jơ-hngơ̆m bơ̆n, na đơ̆ng đe pơ-ư noh bơ̆n gô tơlĕch ăn kơ bơngai nai băt kơ bơ̆n dan akâu bơ̆n kơdih dang yơ. Tơdah jơ-hngơ̆m bơ̆n tơ tŏ nhen thoi hu maih mă đe ưh tam mă ‘buh, oei đei teh klep lăm tơdrong kret tơsen. Kơplah bơ̆n đei jơ-hngơ̆m hiôk yua kơ đe pơ-ư, lu bơ̆n đei yua kơ đơ̆ng đe pơ-ư noh khan bơ̆n bơngai thoi yơ bơih. Mă lei tơdah chăl arih bơ̆ dan bơ̆n lăm Kră Yang Yêsu Krist, lei jơ̆ mă khan đe pơ-ư kơ bơ̆n ưh kơ pơm kơ bơ̆n đei tơdrong pơ ang mă lei ba ăn kơ bơ̆n rai iŏk đon ala, yua kơ bơ̆n băt kơ dôm tơdrong mơnat noh jơ̆ đơ̆ng Kră Yang ‘Bok Kei-Dei (I Kôrintô 4:3-5), păng bơ̆n đei yua jơ âu jơ̆ đơ̆ng Kră Yang song ăn đĕch ưh kơ sĭ đơ̆ng kon bơngai ôh.
Mă ‘bar, nơ̆r pôk pơ-ư pơ long lăng jơ-hngơ̆m bơ̆n wă pơm tơdrong kiơ. Lu bơ̆n bơ̆jang yua kơ wă kơ đe nai pôk pơ-ư, dah mă wă kơ lăp đon kơ Kră Yang? Nơ̆r pôk pơ-ư nhen thoi ‘bai pơlong lăng dôm tơdrong ‘lơ̆ng bơ̆n pơm noh jơ̆ bơ̆n pơm tơ’bôh kơ bơngai nai lei mă đơ̆ng lăm jơ-hngơ̆m đei tơplih tơpă đơ̆ng Kră Yang Kră Yang Yêsu Krist. Lu bơ̆n bơngai lui kăl kơ đei kơnhăm kơ tơdrong pôk pơ-ư đơ̆ng Kră Yang: “Na yŏng sư khan: ‘Ơ dăm, ih jang kơ inh ‘lơ̆ng tơpă, ih ưh kơ lê̆ ôh dôm tơdrong jang inh. Yua kơ ih jang ‘lơ̆ng, na mă khan tơdrong jang ih iĕ, inh gô ăn kơ ih jang tơdrong tih hloh dơ̆ng. Na dang ei bĕ ba oei hơdai hiôk chơt hăm inh yŏng ih.”(Mathiơ 25:21), dah tơdrong kơnhăm trŏ, lei jơ̆ dôm tơdrong bơ̆n wă pơm noh jơ̆ pơyơ̆r dôm tơdrong ư-ang ăn kơ ‘Bok Kei-Dei.
Mă pêng, tơdrong đe pôk pơ-ư pơlong lăng bơ̆n hăm wơ̆ tơ̆l lăm tơdrong lui ưh. Nhen thoi maih đe ‘buh lăm ŭnh, bơngai mă wơ̆ tơ̆l gah bơhngol gô tơjur akâu jăn sư kơdih păng gơnang kơ Kră Yang hloh dơ̆ng, ưh kơ đei jơ-hngơ̆m ngĭl ngŭl dah đei tơdrong đe pôk pơ-ư dah mă đe chrih, mă lei jơ-hngơ̆m oei dơ̆ng kơjăp yua kơ đei kơnhăm kơ tơdrong pôk pơ-ư đơ̆ng ‘Bok Kei-Dei đĕch ưh kơ wă chă nơ̆r pôk pơ-ư đơ̆ng kon bơngai.
Lu bơ̆n kon Kră Yang kăl kơ đei tơdrong pôk pơ-ư dih băl păng đei pơchŭt dih băl (I Têsalônik 5:11), ‘nĕ kơ đei bơngai bu pôk pơ-ư kư̆ kă wă tơiung tơdrong ưh kơ trŏ. Bơ̆n đei pôk pơ-ư kơ bơngai nai păng sơng iŏk nơ̆r pơ-ư đơ̆ng bơngai noh jơ̆ bơ̆n bơngai thoi yơ. Athei pôk pơ-ư đe nai păng sơng iŏk tơdrong đe pơ-ư hăm jơ-hngơ̆m iŏk đon ala, băt bơnê kơ Kră Yang păng pơyơ̆r tơdrong ư-ang kơ Kră Yang yua kơ Sư jơ̆ Kră Yang ba ăn tơdrong ‘lơ̆ng tôm tơdrong.
Ơ Kră Yang apinh yua đơ̆ng dôm đe pơ-ư ăn kơ inh nhen thoi ŭnh ‘buh pơlong lăng jơ-hngơ̆m inh. Apinh gơ̆t inh lăm tơdrong pơ-ang akâu kơdih păng tơgŭm inh dôm tơdrong inh pơm wă pơ-ư ang kơ Kră Yang đĕch. Apinh ăn kơ inh iŏk jơ-hngơ̆m đon ala thoi Kră Yang Yêsu Krist wă kơ tôm tơdrong jang, inh chă wă kơ Ih lăp đon. Yua anăn Kră Yang Yêsu Krist, Amen.
Pơm thoi yơ wă kơ bơ̆n ling lang tơnăp pơm tơdrong ‘lơ̆ng mă khan đe ưh kơ wă lăng?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Malachi 1
Kênh Youtube BHKTHN:
