Galati 3:15-20
“mă khan bơ̆n bơngai dang lôch yua kơ tơdrong yoch, mă-lei dang ei bơ̆n kư̆m dang Sư tơiung lu bơ̆n thoi Yêsu Krist boih. Bơ̆n gơh klaih đơ̆ng tơdrong yoch yua kơ Sư mơnat ăn.” (Êphêsô 2:5)
Nơ̆r jet tơchĕng pơwao:
– ‘Bok Pôl yua ‘bai bơtho ayơ lăm sơ̆p hla bơar nơ̆r ‘Bok Kei-Dei năr ‘nâu?
– Tơdrong juăt chih hơmet ‘măn kơ bơngai Galati đei tơdrong kiơ wă pơsĭt?
– Nơ̆r pơkă ‘noh đei chih hơmet adrol kơ đei khôi juăt ba ăn kơ bơ̆n tơdrong pơlung kiơ?
Đơ̆ng rŏng kơ pơma bơtho kơ lu bơngai lui Galati, păng đơ̆ng adrĕch adrung ‘bok Abraham (Galati 3:1-14), ‘bok Pôl pơma gah tơdrong juăt đei chih roi hla bơar ‘măn mŭk tơmam kon bơngai wă kơ oei bơwei hơnơ̆ng. Kiơ̆ kơ tơdrong juăt, mưh đei chih hla bơar ‘măn mŭk tơmam dah chih roi kơ tơdrong pơgơ̆p lei na dah đei pơthim nơ̆r dah sut nơ̆r noh glăi hăm tơdrong juăt bơih (trong 15). Kư̆m thoi noh, Kră Yang đei pơgơ̆p hăm Abraham păng adrĕch adrung sư, noh lăm ‘Bok Krist, yua kơ đơ̆ng ih na inh wă tơgŭm tôm kơ khul bơngai oei tơ ala teh. (Galati 3:8), “Kră Yang ‘Bok Kei-Dei pơkă kơ Abraham păng đĭ đăng lu bơ̆n kon sâu sư sơ̆, khan wă tơgŭm lu bơ̆n, Sư wă tơgŭm tơpă. Na đơ̆ng rŏng kơ ‘Bok Kei-Dei pơkă thoi noh sơ̆, truh tơ puăn hrĕng pêng-jĭt sơnăm, na đei Môis pơkă ăn kơ yă ‘bok bơ̆n tơdrong juăt ‘Bok Kei-Dei dơ̆ng. Mă ‘Bok Kei-Dei ăn kơ Môis pơkă ăn kơ bơ̆n tơdrong juăt đơ̆ng rŏng noh, Sư ưh kơ achăng lê̆ tơdrong Sư pơkă hơdrol khan wă tơgŭm bơ̆n noh ôh.” (trong 17 BTTHĐ).
Lăm tơdrâu trong lăm nơ̆r ‘Bok Kei-Dei ‘nâu, ‘bok Pôl pơma pơđăm wơ̆t nơ̆r “Nơ̆r pơkă”. ‘Nguaih kơ noh, gah lu bơngai chih nơ̆r “nơ̆r pơkă” dah “pơgơ̆p” lăm âu ưh kơ trŏ Abraham ‘bok kơdră ôh, ‘noh ‘Bok Kei-Dei: “Tơdrong ‘Bok Kei-Dei pơkă hăm Abraham” (trong 16) “Kră Yang ‘Bok Kei-Dei pơkă kơ Abraham păng kon sâu sư sơ̆.” (trong 17). Ưh kơ trŏ kơ ‘bok Abraham pơgơ̆p pơkă hăm ‘Bok Kei-Dei ôh, mălei đơ̆ng ‘Bok Kei-Dei pơgơ̆p hăm sư, păng Kră Yang kư̆m ưh kơ wă pơgŏ athei lu sư chu kiơ̆ (Blŭng a 13-15). Mălei ‘nâu bơwei tơdrong pơgơ̆p Kră Yang mơnat ăn đĕch.
Yua kơ tơdrong pơgơ̆p ‘Bok Kei-Dei pơkă hăm Abraham noh tơdrong pơgơ̆p Kră Yang mơnat ăn đĕch. Thoi noh ưh kơ đei pơma kơ tơdrong juăt ôh. Tơdrong juăt đei pơthim lăm tơdrong glăi kon bơngai đĕch kơplah oei chang gô “’Bok Krist” (trong 19) Tơdrong juăt đei đơ̆ng rŏng kơ nơ̆r pơgơ̆p ưh kơ đei pơm kơ kon bơngai bơ̆n truh tơdrong hơgăt wă mơ̆t lăm tơdrong pơgơ̆p mă ‘Bok Kei-Dei đei pơkă adrol sơ̆.
Bơnê kơ Ih Kră Yang đei pơgơ̆p hăm Abraham mă ưh kơ đei nơ̆r kăl kơ chu kiơ̆ thoi yơ. Chơt hiôk tơpă kơplah bơ̆n băt đon lui ‘bok Abraham păng kon sâu sư Kră Yang rơih păng tuh pŭn hiôk adrol kơ đei tơdrong juăt. Kơthơ gơih ăn kơ bơngai lui tơ pơlei Êphêsô, ‘bok Pôl đei tơ’blŏk tơdrong tơpăt sĭt thoi âu: “mă khan bơ̆n bơngai dang lôch yua kơ tơdrong yoch, mă-lei dang ei bơ̆n kư̆m dang Sư tơiung lu bơ̆n thoi Yêsu Krist boih. Bơ̆n gơh klaih đơ̆ng tơdrong yoch yua kơ Sư mơnat ăn.” (Êphêsô 2:5). Minh tơdrong ‘lơ̆ng hiôk dêh păng đei pơlung tơiung lu bơ̆n. Yua kơ bơ̆n băt bơ̆n gơh klaih adrol kơ bơ̆n chu Kră Yang dah pơm kơ Sư lăp đon. Thoi noh bơ̆n chu Kră Yang jing tơ’bôh jơhngơ̆m bơ̆n băt bơnê păng hiôk dêh. Apinh Kră Yang tơgŭm bơ̆n arih hiôk chơt păng băt bơnê kơ Sư rim năr yua kơ tơmam apah Sư ăn đĕch kơ rim ‘nu bơ̆n noh tơdrong dŏng pơklaih.
Ơ Kră Yang, inh bơnê kơ Ih yua kơ Ih bơlang tơpang ti Ih dŏng pơklaih inh adrol kơ inh pơm kiơ̆ nơ̆r Ih bơtho. Apinh Ih tơgŭm inh arih chơt hiôk păng băt bơnê kơ Ih dŏng pơklaih ăn đĕch kơ inh, wă kơ inh arih kiơ̆ thoi Ih lăp đon lăm rim năr, krao khan yua anăn Kră Yang Yêsu Krist, Amen!
Bơ̆n hăm tam rơngei đơ̆ng tơdrong gleh đơ̆ng bơ̆n pơm wă kơ Kră Yang lăp đon ưh?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 14
Kênh Youtube BHKTHN:
