Mathiơ 5:14-16
“Lu iĕm athei pơchrang hơdah kơ đe tơdrong hơdah lu iĕm thoi noh mơ̆n, na đe băt kơ tơdrong iĕm pơm ‘lơ̆ng, na đe bơnê hăm ư-ang kơ ‘Bă bơ̆n tơ plĕnh ti.” (Mathiơ 5:16)
Nơ̆r jet tơchĕng pơwao:
– Kră Yang yua ‘bar tơdrong wă bơtho gah tơdrong hơdah?
– Kon pơlei Kră Yang kăl kơ pơchrang tơdrong tơpăt Kră Yang lăm teh đak âu thoi yơ?
– Lu bơ̆n kơnhăm pơchrang wă pơm kiơ?
Kră Yang Yêsu oei bơtho tơblang kơ lu bơngai kiơ̆ Sư. Kră Yang pơtih kon pơlei Sư “tơdrong hơdah kơ teh đak” (trong 14). Sư yua ‘bar tơdrong pơtih thoi rup wă kơ ‘bônh kơ hlôh: minh pôm pơlei oei kơpal kông ưh kơ layơ hlơp păng minh pôm ŭnh kơđeng iŏk rĕo klơ̆p lê̆ (trong 15). Pơlei tih kơjung đei ŭnh pơchrang hơdah đơ̆ng ataih, ŭnh kơđeng wă kơ hơdah ưh kơ iŏk rĕo klơ̆p lê̆, mălei athei atol ‘bơ̆t anih wă kơ pơchrang jơ̆p jang ‘bôh hơdah. ‘Bar tơdrong tơ’bôh ‘nâu wă tơ’blŏk kơ đon lui lu bơ̆n ưh kơ wă ôn hlơp dah iŏk ôn lê̆ tơ nai, tơplơ̆ kơ noh dơ̆ng, kăl kơ tơ’bôh wă kơ lơ bơngai ‘bôh.
Ŭnh hơdah kư̆m dai pơchrang tơdrong tơpăt păng hơdah dôm tơdrong kiơ oei ôn. Tơdrong hơdah gô puh lê̆ tơdrong măng mu. Yua kơ thoi noh, mưh kon pơlei Kră Yang jơ̆ “hơdah” lei na athei pơchrang tơdrong ‘lơ̆ng păng tơpăt Kră Yang. Wă khan mưh lu bơ̆n arih tơpăt păng ‘lơ̆ng tôm, lu bơ̆n oei pơchrang tơdrong hơdah Kră Yang ‘Bok Kei-Dei. ‘Bơ̆t tŏk bŏk dêh char jơ̆ anih druh kiơ̆ tơdrong kơnê̆ lăng jing hmă đĕch. Bơngai lui kơ Kră Yang arih tơpăt gô jing pơm kơ đe băt jơ̆p. Phŏ đĭ đăng kon bơngai ưh kơ lăp đon drơ̆ng, mălei sĭt tơpă lu sư gô băt kơnăl minh tơdrong kiơ noh phara ‘biơ̆. Na đơ̆ng noh, tơdrong hơdah kư̆m gô ba ăn kơ lu sư tơdrong rơnŭk rơnua păng pơchrang hơdah. Lu tơdrong pơm ‘lơ̆ng, iơ̆m dim păng ‘bĕnh tơdrong mơnat, bơ̆jang păng hiơ̆k bơngơ̆t kơ bơngai nai, lu bơ̆n oei tơ’bôh tơdrong tơpăt păng tơdrong ‘mêm ‘Bok Kei-Dei. Kră Yang Yêsu bơtho tơdrong kơnhăm wă pơchrang: “Lu iĕm athei pơchrang hơdah kơ đe tơdrong hơdah lu iĕm thoi noh mơ̆n, na đe băt kơ tơdrong iĕm pơm ‘lơ̆ng, na đe bơnê hăm ư-ang kơ ‘Bă bơ̆n tơ plĕnh ti.” (trong 16). Tơdrong kơnhăm ưh kơ trŏ wă pơm kơ đe băt kơ bơ̆n, mălei pơtơm đe nai năm tơ Kră Yang. Chăl arih lu bơ̆n jing minh nơ̆r pơm kơdranh, wă pơư anăn Kră Yang ‘Bok Kei-Dei. Bơngai lui kơ Kră Yang athei pơchrang hơdah tơdrong tơpăt păng tơdrong ‘mêm mơnat Kră Yang kơ lăm teh đak âu. Phŏ phŏ yua kơ hli na bôl buăl ưh kơ ‘maih ngôi hơdai bơ̆n, hli kơ đe chrih na lu bơ̆n rơih iŏk ngăn hreh păng druh kiơ̆ kơ bơngai lơ, ưh kơ pơ̆n tơ’bôh tơdrong hơdah dŏng pơklaih jơ ‘nâu, Kră Yang Yêsu tơ’blŏk tơdrong ôn klĕnh kơ tơdrong hơdah gô tơhiong lê̆ tơm tơdrong kơnhăm mă Sư oei hơdai noh.
“Jơ̆ tơdrong hơdah” ưh kơ trŏ khan bơ̆n ‘lơ̆ng tôm. Mălei wă khan lu bơ̆n âu hơmet jơhngơ̆m wă kơ ‘Bok Krist pơchrang lăm chăl arih bơ̆n rim năr. Kon pơlei Kră Yang lăm bơngai lui kăl kơ băt lu bơ̆n âu jơ̆ tơdrong hơdah kơ lăm teh đak âu, păng bơngai lui kơ Kră Yang nhen thoi đe pơchrang hơdah wă ba lơ bơngai jrok trong na wih tơ Kră Yang.
Ơ Kră Yang, apinh Ih tơ’blŏk kơ inh ling lang ‘blŏk kơ inh jing hơdah kăl kơ pơchrang tơdrong tơpăt păng tơdrong ‘mêm Kră Yang lăm teh đak, apinh Ih tơgŭm inh wang bơ̆jang hơdai bơngai lui wă kơ jing hơdah pơm kơ lơ bơngai năm tơ Kră Yang. Krao khan yua anăn Kră Yang Yêsu Krist, Amen.
Lu bơ̆n oei pơchrang tơdrong kiơ kơ teh đak đơ̆ng tơdrong arih bơ̆n rim năr?
Đŏk Sơ̆p Hla bơar ‘Bok Kei-Dei lăm pêng sơnăm: Jop 6
Kênh Youtube BHKTHN:
