Kôlôssê 3:12-14
“Lu bơ̆n âu boih ‘Bok Kei-Dei ‘mêm mơnat, na rơih iŏk bơ̆n, wă kơ bơ̆n jing kon Sư; na bơ̆n athei băt ‘mêm mơnat kơ đe lei-lăi, pơm ‘lơ̆ng kơ đe thoi lu bơngai gơh găt.” (Kôlôssê 3:12)
Nơ̆r jet tơchĕng pơwao:
– ‘Bok Pôl roi tơ’bôh lu tơdrong ‘lơ̆ng ayơ wă kơ bơngai lui pơm kiơ̆?
– Hơdai lăm akâu ‘Bok Krist, lu bơ̆n kăl kơ arih hơdai băl thoi yơ?
– Bơngai lui kơ Kră Yang gô thoi yơ dah kon pơlei Kră Yang băt ‘mêm mơnat dih băl?
Khul Bơngai Lui ưh kơ trŏ kơ pơma kơ anih bơngai lui akŭm đĕch ôh, mălei noh anih tơpôl đei hŏk pơhrăm pơm ‘lơ̆ng thoi ‘Bok Krist. ‘Bok Pôl đei tơ’blŏk gah tơdrong ăn đĕch gơh rơih: Bơngai lui đơ̆ng Kră Yang ‘Bok Kei-Dei rơih iŏk jing ‘lơ̆ng păng ‘mêm kơeng (trong 12a). ‘Nâu bơih pơm hơnă wă kơ bơ̆n arih: Lu bơ̆n ưh kơ trŏ wă adrin na gơh jô̆ lu bơ̆n, mălei arih phara yua kơ Kră Yang ‘mêm kơ bơ̆n. Đơ̆ng noh Sư krao: “na bơ̆n athei băt ‘mêm mơnat kơ đe lei-lăi, pơm ‘lơ̆ng kơ đe thoi lu bơngai gơh găt.” (trong 12b). Lu tơdrong ‘lơ̆ng âu ưh kơ sĭ đei kơdih đĕch ôh, mălei ưh kơ đơ̆ng “pơm ‘lơ̆ng” rim năr kư̆m thoi lu bơ̆n rơih hơbăn ao hrŭk, lu bơ̆n kăl kơ rơih iŏk pơma dơnuh ‘lơ̆ng trŏ thoi ‘Bok Krist. Lu tơdrong ‘lơ̆ng âu kăl dêh lăm bơngai lui. Jơhngơ̆m ‘mêm mơnat tơgŭm lu bơ̆n hiơ̆k lu bơngai rơdu tơrăn. Tơdrng iơ̆m dim tơ’bôh đơ̆ng nơ̆r pơma păng pơm tơ’bôh adar adeh gơh gơ̆t tơgŭm kơ bơ̆n ưh kơ đei pơang, iĕm athei pơm ‘lơ̆ng ling lang thoi bơngai iơ̆m dim jô̆ kơ đe bơngai ‘lơ̆ng hloh kơ iĕm (Philip 2:3). Tơdrong gơh găt gô tơgŭm pơm ‘lơ̆ng kơ đe kơplah đei pơma tơhil băl. Tơdrong iŏk đon ala lĕch đơ̆ng pơtơ̆p pơjuăt wă kơ pơhrăm pơm kơ tơdrong lui wơ̆ ‘lŏ păng jơhngơ̆m chang gô Kră Yang (Rôm 5:4). Lu tơdrong ‘lơ̆ng noh pơm kơ bơngai lui jing arih hiôk hơđơ̆ng păng ‘bĕnh tơdrong ‘mêm mơnat pơm kơ lơ bơngai năm tơ Kră Yang.
‘Bok Pôl bơtho pơtrơp dơ̆ng: “Mă tơduă buăl bơ̆n bơngai lui pơm ưh kơ lăp hăm bơ̆n, bơ̆n hơhrĕng đĕch ‘nĕ kơ jô̆ yo. Kră Yang Yêsu ưh pă jô̆ yo kơ bơ̆n boih, na bơ̆n kư̆m lei-lăi ‘nĕ kơ jô̆ yo kơ buăl bơ̆n.” (trong 13). Ưh kơ đei bơngai lui ayơ tơ ala teh âu ‘lơ̆ng ngăl yua kơ kon bơngai ưh kơ ‘lơ̆ng tôm. Tơdrong phara, pơm hơwơ̆l dih băl dah mă pơm băl sơ’ngon tơdrong noh ưh kơ weh wer ôh. Mălei minh tơdrong pơm kơ bơngai lui wơ̆ ‘lŏ ưh kơ sĭ khan ưh kơ đei tơdrong tơhil băl ôh, mălei băt kơ mơnat ưh kơ jô̆ yo dih băl. Băt mơnat noh bơih arih tơpăt păng ‘mêm mơnat dih băl. ‘Bok Kei-Dei ưh kơ lăng pơhơi ôh tơdrong yoch, mălei Sư ăn tơdrong ‘mêm lăm ‘Bok Krist, kư̆m thoi noh, mă bơ̆n tơ’bơ̆p hăm tơdrong glăi lu ‘nhŏng oh bơ̆n tơpăt tơpă, mălei ‘bĕnh tơdrong ‘mêm, mưh băt mơnat, lu bơ̆n oei arih lăm Tơdrong ‘Nao ‘Lơ̆ng hăm tơdrong tơ’bưh đơ̆ng lu bơ̆n hăm bơngai cheng bơ̆n.
Tuch luch âu, ‘bok Pôl tơlĕch nơ̆r gĭt kăl dêh: “Kăl tơpă tơdrong ‘mêm mơnat dih băl; dah bơ̆n đei tơdrong ‘mêm mơnat dih băl boih, bơ̆n gô ‘bôh tôm tơdrong bơ̆n pơm ‘lơ̆ng.” (trong 14). Tơdrong ‘mêm bơih hơnă wă kơ bơ̆n tơguăt dih băl hăm tơdrong ‘lơ̆ng nai, mưh đei tơdrong ‘mêm. Bơngai lui jing arih đei pôm jơhngơ̆m đon, pơklaih, păng wơ̆ ‘lŏ. Nơ̆r Kră Yang lăm năr ‘nâu krao pơtơm bơ̆n lăng kơdih. Lu bơ̆n hăm oei arih trŏ kơ anih Kră Yang ăn ưh? Athei pơm dôm tơdrong ‘lơ̆ng đơ̆ng ‘Bok Krist rim năr; athei mơnat păng pơjing tơdrong pôm jơhngơ̆m đon lăm bơngai lui.
Ơ Kră Yang, apinh Ih tơgŭm inh hrŭk iŏk tơdrong tơpăt, jơhngơ̆m ‘mêm mơnat đơ̆ng Ih, păng pơhrăm iŏk tơdrong tơguăt băl mă hơđăl lăm tơdrong ‘mêm wă pơjing bơngai lui kơ Kră Yang pran kơjăp, wơ̆ ‘lŏ. Krao khan yua anăn Kră Yang Yêsu Krist, Amen.
‘Bai pơhrăm ‘nâu tơ’blŏk kơ lu bơ̆n kăl kơ pơhrăm iŏk tơdrong ‘lơ̆ng ayơ lăm Kră Yang?
Đŏk Sơ̆p Hla bơar ‘Bok Kei-Dei lăm pêng sơnăm: Jop 5
Kênh Youtube BHKTHN:
