Klei Aê Diê Blŭ: Klei Mphŭn Dơ̆ng 14:1-12
Êlan kliăng: “Diñu mă msĕ mơh Y-Lot anak adei Y-Abram mbĭt hŏng jih ngăn drăp gơ̆, pô anăn dôk ti ƀuôn Sôdôm” (Klei Mphŭn Dơ̆ng 14:12)
Klei êmuh ksiêm mĭn: Si ngă klei bi blah hdơ̆ng phung mtao? Ya klei djŏ tuôm mâo klei bi blah anăn hŏng klei đăo phung ƀuôn sang Aê Diê? Si klei bi hriăm drei mâo kơ klei yuôm hlăm grăp klei drei čuăn ruah?
Klei Mphŭn Dơ̆ng kdrêč 14 čih yăl dliê kơ klei bi blah hdơ̆ng phung mtao. Êjai pluh dua thŭn, êma čô mtao mơ̆ng ƀuôn Sôđôm, ƀuôn Gômôrơ, ƀuôn Atma, ƀuôn Sôbôim leh anăn ƀuôn Sôar mŭt mtao Y-Kêdôr -Lômer ƀuôn Êlam sơăi. Ƀiădah truh ti thŭn pluh tlâo diñu ngă klei bi kdơ̆ng. Mtao ƀuôn Êlam bi kƀĭn phung tĭng kơ ñu jing pă čô mtao jhŏng ktang mơ̆ng čar ngŏ hriê bi blah hŏng êma čô mtao ngă klei bi kdơ̆ng anăn. Diñu ngă klei bi blah ti tlung Siđim. Boh knhal tuč kơ klei bi blah anăn jing mtao ƀuôn Sôđôm leh anăn ƀuôn Gômôrơ amâo mâo klei dưi ôh, leh anăn diñu êran đuĕ. Phung dưi hlăm klei bi blah mŭt hlăm ƀuôn Sôđôm leh anăn Gômôrơ tlĕ mă ngăn drăp leh anăn mnơ̆ng ƀơ̆ng huă.
Êlan 12 brei thâo ya ngă êjai čih yăl dliê kơ klei đăo Y-Abram pô čih hră Klei Mphŭn Dơ̆ng čih hĕ kơ klei bi blah hdơ̆ng phung mtao: “Diñu mă msĕ mơh Y-Lot anak adei Y-Abram mbĭt hŏng jih ngăn drăp gơ̆, pô anăn dôk ti ƀuôn Sôdôm.” Y-Lot, jing anak adei Y-Abram, pô ruah leh kdrêč lăn jăk hĭn tui si ală ñu dlăng jing anôk dôk hdĭp, ară anei tuôm hŏng klei jhat. Tui si Klei Mphŭn Dơ̆ng 13:12, leh bi ktlah hŏng awa ñu, jing Y-Abram, Y-Lot “bi mđuĕ anôk sang čhiăm ñu nao truh ti ƀuôn Sôđôm”, hlăm klei blŭ phŭn jing “mdơ̆ng sang čhiăm giăm ƀuôn Sôđôm”, mơ̆ng anôk dôk giăm ƀuôn Sôđôm, ƀrư̆ hruê Y-Lot ƀrư̆ nao kbưi hĭn, ară anei ñu “dôk ti ƀuôn Sôđôm” yơh, jing leh sa čô mnuih ƀuôn sang ƀuôn prŏng bŏ hŏng klei soh leh anăn măk ƀai ti anăp ală Khua Yang. Tơdah ƀuôn Sôđôm mâo klei bi blah hdơ̆ng phung mtao, snăn wăt tơdah Y‑Lot čiăng hĕ amâodah hơăi, ñu ăt srăng tŭ klei jhat mbĭt hŏng phung mnuih ƀuôn sang ƀuôn Sôđôm mơh.
Klei phung roh mă Y-Lot mbĭt hŏng jih jang ngăn drăp ñu čiăng bi hdơr kơ drei klei yuôm bhăn hlăm klei drei čuăn ruah. Y-Lot ruah dôk giăm ƀuôn Sôđôm leh anăn hdĭp hlăm ƀuôn Sôđôm kyuadah ñu čiăng mâo klei hdĭp jăk hĭn, klei hdĭp ti anăp mâo klei rơ̆ng kjăp hĭn. Ƀiădah klei ñu mă tŭ jing knŏng klei knap mñai. Sĭt nik, amâo mâo pô thâo klă ôh si klei hdĭp ti anăp srăng jing leh anăn amâo mâo sa anôk êđăp ênang ôh ti lăn ala anei. Boh nik nak anôk dôk hdĭp hlăm klei soh, sĭt nik Khua Yang srăng bi kmhal, tơdah amâo bi kmhal hŏng êlan anei srăng bi kmhal hŏng êlan mkăn lĕ, tơdah amâo bi kmhal ară anei hin srăng bi kmhal ti mmông mkăn lĕ. Klei knap mñai Y-Lot tŭ ară anei jing boh mơ̆ng klei ñu ruah leh êlâo tinăn. Klei anei bi hriăm drei brei drei răng hlăm jih jang klei drei ruah. Đăm čuăn ngă tui si klei drei ƀuh ti êngao kyua klei tŭ dưn ti anăp ôh. Hdơr bĕ, amâo mâo ôh sa anôk êđăp ênang leh anăn jăk mơak mđơr hŏng klei dôk hlăm klei Khua Yang kiă kriê răng mgang. Akâo Khua Yang đru drei hriê giăm Khua Yang hĭn leh anăn duah klei kpă ênô Ñu.
Si ngă drei dôk “giăm ƀuôn Sôđôm”, “dôk ti ƀuôn Sôđôm” hĕ amâodah dôk hlăm klei Khua Yang kiă kriê?
Wah lač: Ơ Khua Yang, mâo lu blư̆ kâo ruah tui si klei ƀuh ti êngao kyua klei tŭ dưn ti anăp, hrô kơ klei ktrâo atăt mơ̆ng Khua Yang. Pap brei kơ kâo leh anăn đru kâo thâo, knŏng hlăm Ih yơh kâo dưi mâo klei êđăp ênang sĭt. Đru kâo thâo weh đuĕ mơ̆ng jih jang “ƀuôn Sôđôm” ênuk anei leh anăn hriê kơ Ih giăm hĭn grăp hruê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yôp 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
