Blŭng a 14:1-12
“Lu ayăt kư̆m rôp Lot, mon Abram, mă sư oei tơ Sôđôm păng iŏk đĭ-đăng mŭk tơmam sư, chĕp ba hloi.” (Blŭng a 14:12)
Nơ̆r jet tơchĕng pơwao:
– Tơdrong tơblah lăm lu pơtao thoi yơ?
– Đei ‘bơm kiơ kơ tơdrong lui kon pơlei Kră Yang?
– Đei tơ’blŏk kơ bơ̆n thoi yơ gah tơdrong kăl đơ̆ng rim tơdrong rơih iŏk?
Sơ̆p Hla bơar Blŭng a 14 roi tơdrong tơblah lăm lu pơtao. Lăm mơjĭt ‘bar sơnăm, pơđăm ‘nu pơtao đơ̆ng pơlei Sôđôm, Gômôrơ, Atma, Jeboim, păng soa tă kơ lăp đon ngăl kơ Kêtrôlaôme, pơtao Êlam. Mălei truh sơnăm mă mơjĭt pêng, lu sư hil plơ̆ iung blah dơ̆ng, wă tơblah, pơtao Êlam krao lu pơtao ‘noh puăn ‘nu pơtao pran đơ̆ng gah hơlĕch wă tơblah hăm pơđăm ‘nu pơtao. Tơdrong tơblah tơ thŭng Siđim. Tơdrong tơblah lu pơtao Sôđôm, Gômôrơ thuơ răm, kơdâu hlĕnh. Gah lu bơngai kĕ jei mơ̆t tơ pơlei Sôđôm păng Gômôrơ wă tơgar iŏk mŭk tơmam păng phe ‘ba.
Trong 12 tơbăt yua kơ kiơ oei chih roi tơdrong lui ‘bok Abram lei na khan bơngai chih tă tơmơ̆t lăm tơdrong tơblah lu pơtao: “Lu ayăt kư̆m rôp Lot, mon Abram, mă sư oei tơ Sôđôm păng iŏk đĭ-đăng mŭk tơmam sư, chĕp ba hloi.” (trong 12). ‘Bok Lot mon ‘bok Abram, sư đei rơih anih teh ‘lơ̆ng hloh kiơ̆ kơ măt sư lăng wă pơm teh jang sa, dang ei tă đei tơdrong truh krê hơmơt. Kiơ̆ kơ Sơ̆p Hla bơar Blŭng a 13:12, đơ̆ng rŏng kơ weh đơ̆ng mih sư ‘bok Abram, Lot “Lĕch đơ̆ng bơsŭn năm tơ Siđôm” na “pơm bơsŭn jê̆ Sôđôm”. Đơ̆ng anih oei jê̆ Sôđôm, ‘bok Lot sư rai năm ataih păng “oei tơ Sôđôm”, jing kon pơlei lăm pơlei tih ‘bĕnh tơdrong yoch păng pơm kơnê̆ ‘bơ̆t anăp Kră Yang. Păng kơplah lu pơtao wă blah pơlei Sôđôm, lei na Lot mă khan ‘maih dah ưh kư̆m pŭ hơdai hăm kon pơlei lăm pơlei ‘noh.
Tơdrong đe rôp Lot păng tơgar iŏk đĭ đăng mŭk tơmam sư, tơ’blŏk kơ bơ̆n tơdrong kăl wă rơih iŏk. ‘Bok Lot rơih iŏk arih jê̆ pơlei Sôđôm păng arih tơ lăm noh yua kơ ‘maih wă kơ đei tơdrong arih ’lơ̆ng hloh, tơdrong arih tơ anăp đei bơwei ‘lơ̆ng hloh. Mălei tơdrong sư đei iŏk noh tă kơ tơdrong truh. Rơđah hơđăl hloh, ưh kơ đei bu băt lê̆ adrol păng ưh kơ đei anih ayơ lăm teh đak gơh hơđơ̆ng. Măloi sư anih arih lăm tơdrong yoch, Kră Yang gô phak tơpă, ưh kơ phak tơdrong âu mălei kư̆m phak tơdrong nai, ưh kơ jơ ‘nâu kư̆m jơ nai. Tơdrong truh mă ‘bok Lot đei tơ’bưh jơ ‘nâu noh lĕch đơ̆ng tơdrong sư rơih iŏk đơ̆ng hơdrol. Tơdrong ‘nâu tơ’blŏk kơ rim ‘nu lu bơ̆n athei pơ’lơ̆ng đơ̆ng dôm tơdrong bơ̆n rơih iŏk ăn kơ kơdih bơ̆n. ‘Nĕ kơ rơih iŏk kiơ̆ kơ măt bơ̆n lăng gah ‘nguaih, kiơ̆ kơ tơdrong đei yua kơplah jơ ‘noh. Athei ‘blŏk ưh kơ đei anih ayơ hiôk hơđơ̆ng păng pŭn hiôk hloh kơ tơdrong ‘Bok Kei-Dei oei hơdai pơgơ̆r păng wei lăng bơ̆n. Apinh Kră Yang ăn kơ bơ̆n năm jê̆ Sư păng chă tơdrong ‘lơ̆ng tơpăt Sư.
Ơ Kră Yang, lơ wơ̆t inh rơih iŏk kiơ̆ kơ măt lăng gah ‘nguaih, đei yua kơplah jơ ‘noh đĕch, tơplih kơ tơdrong chơ chă tơdrong Kră Yang chông tơ’bôh kơ bơ̆n. Apinh Ih mơnat kơ inh păng tơgŭm inh băt thoi âu, lăp minh ‘nu Kră Yang đĕch inh đei tơdrong hiôk hian tơpă. Apinh Kră Yang tơgŭm inh băt weh ataih kơ “Sôđôm” dang ei păng năm tơ Kră Yang rim năr rai jê̆ hloh. Krao khan yua anăn Kră Yang Yêsu Krist, Amen.
Bơ̆n arih oei “jê̆ Sôđôm,” oei lăm Sôđôm dah oei arih lăm tơdrong pơgơ̆r păng đơ̆ng Kră Yang bơwei?
Đŏk Sơ̆p Hla bơar ‘Bok Kei-Dei lăm pêng sơnăm: Jop 9
Kênh Youtube BHKTHN:
