Chivkeeb 14:1-12
Nqe cim:
“Lauj, uas yog Anplas tus kwv Halas tus tub, nws nyob hauv lub nroog Xaudoos, lawv thiaj ntes tau nws thiab huab nws tej cuabtam coj mus lawm dulug” (Chivkeeb 14:12)
Lus nug xav:
– Kob rog ntawm cov vajntxwv tshwm muaj zoo li cas?
– Puas ntsig txog tus Tswv haivneeg txojkev ntseeg?
– Peb kawm tau yam twg txog qhov tseemceeb ntawm qhov kev xaiv?
Chivkeeb tshooj 14 hais txog kob rog ntawm cov vajntxwv. Ntu sijhawm kaum ob xyoos, tsib tug vajntxwv kav cov nroog Xaudoos, Kaumaulas, Amas, Xenpauyees thiab Xau-as puavleej poob mus ua vajntxwv Khedaula-au-mes uas kav lub nroog Elas cov pejxeem. Tiamsis hla mus rau xyoo kaum peb, lawv rov tig ntxeev siab tawmtsam. Kob rog no tshwm muaj nyob hauv lub Hav Xidees. Thaum kawg cov vajntxwv kav Xaudoos thiab Kaumaulas swb rog, tso tes khiav. Sab uas yeej rog thiaj mus rau hauv lub nroog Xaudoos thiab Kaumaulas huab tej khoom txhua yam thiab tej zaub mov huvsi.
Nqe 12 qhia paub qhov vimchiv uas vim li cas tabtom sau txog Anplahas ntsug kev ntseeg es tus sau cia li muab kob rog ntawm cov vajntxwv los hais: “Lauj, uas yog Anplas tus kwv Halas tus tub, nws nyob hauv lub nroog Xaudoos, lawv thiaj ntes tau nws thiab huab nws tej cuabtam coj mus lawm dulug”. Lauj, yog Anplas tus kwv tus tub, nws xaiv feem av zoo raws li nws lub qhovmuag pom ua neej, nimno nws tabtom ntsib kev nyuaj siab. Raws li Chivkeeb 13:12, tomqab uas Lauj tso nws txiv hlob Anplas, Lauj “nyob hauv lub nroog Xaudoos”, raws li hauvpaus lus “nyob ze nroog Xaudoos”. Ntawm qhov nyob ze Xaudoos, Lauj yim hnub yim mus ze thiab cia li mus nyob kiag hauv lub nroog Xaudoos, ua kiag ib tug pejxeem nyob hauv lub nroog uas puv npho kev txhaum thiab kev phem kev qias tabmeeg Vajtswv. Thiab thaum lub nroog Xaudoos raug cov vajntxwv tuaj tua, ces Lauj txawm yog xav thiab tsis xav los yeej yuav raug tsov rog zoo li cov pejxeem nyob hauv lub nroog ntawd.
Qhov uas Lauj raug ntes thiab raug huab tas txhua yam qhia rau peb txog qhov tseemceeb ntawm txojkev txiav txim siab xaiv. Lauj xaiv mus nyob ze lub nroog Xaudoos thiab nyob hauv lub nroog Xaudoos vim nws xav kom tau lub neej zoo, ruaj khov rau lub neej tom ntej. Tiamsis yam uas Lauj tau txais ces yog kev puastsuaj. Tseeb tiag, lub neej yav tom ntej tsis muaj leejtwg paub ua ntej thiab tsis muaj ib qhov chaw twg nyob hauv ntiajteb no ruaj khov li. Qhov chaw uas ua kev txhaum loj tus Tswv yeej yuav rau txim, tsis yog yam no los yeej yuav yog lwm yam, tsis yog lub sijhawm tamsim no los yeej yuav txog ib lub sijhawm twg xwb. Tej kev puastsuaj uas Lauj ntsib yog nqi zog ntawm txojkev txiav txim siab xaiv ua ntej thaud. Yam no qhia rau peb txhua tus yuav tau ua tib zoo saib tej uas peb xaiv ua. Tsis txhob txiav txim siab xaiv raws li peb lub qhovmuag pom, raws li qhov tau tamsim. Yuav tsum nco ntsoov hais tias tsis muaj qhov chaw twg ruaj khov thiab kaj siab npaum nyob hauv Vajtswv txojkev tswj kav thiab tsomkwm li. Thov Vajtswv cia peb mus nyob ze Nws thiab nrhiav Nws txojkev ncaj ncees.
Thov Vajtswv,
Vajtswv, ntau zaus nyuam yaus txiav txim siab xaiv ua raws li yam uas pom ntawm lub qhovmuag, tau tamsim xwb tsis cia Koj coj qhia. Thov Koj zam txim rau nyuam yaus thiab qhia kom nyuam yaus zeem paub, tsuas yog Koj xwb thiab yog qhov chaw ruaj khov. Thov pab kom nyuam yaus paub txav deb cov “nroog Xaudoos” tiam no thiab nyob ze tus Tswv txhua hnub. Nyuam yaus tuav Tswv Yexus Khetos lub npe thov, Amees.
Peb tabtom ua neej nyob “ze nroog Xaudoos”, “nyob hauv nroog Xaudoos”, los yog tabtom nyob hauv tus Tswv txojkev tswj kav thiab tsomkwm?
Nyeem Vajluskub hauv peb lub xyoo: Yauj 9
Kênh Youtube BHKTHN:
