Klei Aê Diê Blŭ: Kôlôs 3:12-14
Êlan kliăng: “Snăn kyuadah diih jing phung Aê Diê ruah leh, jing phung doh jăk leh anăn phung Aê Diê khăp, hơô bĕ klei thâo pap, ai tiê jăk, klei luă gŭ, klei êdu êun, leh anăn klei gĭr.” (Kôlôs 3:12)
Klei êmuh ksiêm mĭn: Ya mta knuih khua ƀĭng kna Y-Pôl hưn mdah čiăng brei phung đăo hơô? Hlăm sa asei mlei Yang Krist, si brei drei dôk dơ̆ng ƀơ̆ng huă hdơ̆ng drei? Si Phung Sang Aê Diê Khua Yang srăng jing tơdah grăp čô phung anak ƀuôn sang Aê Diê hơô ai tiê khăp?
Phung Sang Aê Diê amâo knŏng jing anôk nao mguôp bi kƀĭn grăp hruê kăm ôh, ƀiădah wăt jing anôk êpul êya mkŏ mjing hŏng knuih Yang Krist mơh. Khua ƀĭng kna Y-Pôl mñă kơ klei pap klei čuăn ruah: Phung đăo kơ Krist jing phung Aê Diê ruah, mjing doh jăk leh anăn khăp snăk (êlan 12a). Klei anei jing atur kơ jih jang êlan hdră dôk hdĭp: drei amâo gĭr ktưn čiăng dưi mâo klei tŭ ư ôh, ƀiădah dôk hdĭp mdê kyuadah mâo Khua Yang khăp leh. Mơ̆ng anăn yơh, ñu iêô mthưr: “Hơô bĕ klei thâo pap, ai tiê jăk, klei luă gŭ, klei êdu êun, leh anăn klei gĭr” (êlan 12b). Jih jang knuih anei amâo mâo hjăn pô ôh, ƀiădah hŏng klei čŏng čiăng bi mâo “hơô bĕ” grăp hruê. Msĕ si klei ruah čhiăm ao čŭt hơô, brei drei ruah msĕ mơh knhuah dôk dơ̆ng ƀơ̆ng huă tui si hnơ̆ng čuăn Yang Krist. Jih jang knuih anei čiăng snăk mâo hlăm Phung Sang Aê Diê. Ai tiê thâo pap đru drei mđing uêñ kơ mnuih êdu awăt. Klei jăk klei pap bi êdah hŏng klei blŭ leh anăn bruă ngă êdu êun. Klei luă gŭ đru drei amâo mpŭ kơ drei pô, amâo yap drei pô dlông hĭn kơ mnuih mkăn (Philip 2:3). Klei êdu êun đru bi êđăp bi êdu klei amâo thâo bi djŏ hdơ̆ng pô. Klei tŭ gĭr bi mjing klei hriăm mjuăt čiăng mâo anôk kơ klei đăo đĭ hriê kơ prŏng leh anăn ai tiê knang kơ Khua Yang (Rôm 5:4). Jih jang knuih anei bi mjing kơ Phung Sang Aê Diê jing anôk hơĭt ênang leh anăn bŏ hŏng klei pap, hrip lu mnuih hriê kơ Khua Yang.
Khua ƀĭng kna Y-Pôl ăt lŏ mtă mtăn: “Bi tŭ hdơ̆ng diih, leh anăn tơdah sa čô mâo klei hŏng mnuih mkăn, bi pap brei hdơ̆ng diih” (êlan 13). Amâo mâo ôh Phung Sang Aê Diê ti lăn ala jing klă kluôm kyuadah anak mnuih amâo klă kluôm ôh. Klei mdê, klei thâo săng čhuai amâodah klei bi ruă êka jing klei dleh tlaih. Ƀiădah klei bi mjing sa Phung Sang Aê Diê đĭ hriê kơ prŏng amâo djŏ ôh amâo mâo klei amâo thâo bi djŏ, ƀiădah jing klei thâo bi pap brei. Klei bi pap brei yơh jing anôk klei kpă ênô leh anăn klei thâo pap bi tuôm mbĭt. Aê Diê amâo dlăng hơăi mang klei soh ôh, ƀiădah Ñu brei klei pap brei klei soh găn hŏng Yang Krist. Msĕ snăn mơh, drei mâo klei iêô mthưr dôk ti anăp klei soh wê ayŏng adei drei hŏng klei sĭt kpă, ƀiădah ăt brei bŏ hŏng klei pap. Tơdah pap brei klei soh, drei dôk hdĭp Klei Mrâo Mrang Jăk hlăm klei bi mguôp drei pô hŏng phung riêng gah.
Knhal tuč, khua ƀĭng kna Y-Pôl hưn mdah klei yuôm hĭn: “Ƀiădah êgao hĭn kơ jih klei anăn, brei diih hơô klei khăp, kyuadah klei khăp bi mguôp jih jang mnơ̆ng hlăm klei jăk klă” (êlan 14). Klei khăp jing atur bi đuôm jih jang knuih mkăn. Tơdah mâo, Phung Sang Aê Diê jing anôk mâo klei bi mguôp jing sa, bi hlao leh anăn đĭ hriê kơ prŏng. Klei Aê Diê Blŭ hruê anei iêô mthưr drei ksiêm wĭt drei pô. Si ngă drei dôk hdĭp djŏ năng hŏng anôk Khua Yang brei leh mơ̆? Hơô bĕ knuih Yang Krist grăp hruê; kăp pap brei klei soh leh anăn mkŏ mdơ̆ng klei bi mguôp sa hlăm Phung Sang Aê Diê.
Ya knuih Khua Yang brei drei lŏ mjuăt hriăm thiăm mơ̆ng klei hriăm anei?
Wah lač: Ơ Khua Yang, đru kâo thâo hơô klei kpă ênô, klei thâo pap, leh anăn hriăm thâo bi mguôp suôr tliêr hlăm klei khăp, čiăng rŭ mdơ̆ng Phung Sang Aê Diê Khua Yang jing kjăp ktang, đĭ kyar. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
