Klei Aê Diê Blŭ: Y-Mathiơ 23:23
Êlan kliăng: “… Kyuadah diih myơr sa kdrêč hlăm pluh ênoh êč, êya, djam, ƀiădah diih amâo uêñ ôh kơ klei yuôm hĭn hlăm klei bhiăn, jing klei kpă, klei pap, leh anăn klei đăo. Jih klei anăn brei diih gưt, leh anăn đăm lui ôh klei êlâo anăn.” (Y-Mathiơ 23:23)
Klei êmuh ksiêm mĭn: Ya ngă Khua Yang Yêsu ƀuah kơ phung khua čih hră leh anăn kơ phung Pharisi jing phung ai ngăm? Ya mta klei yuôm diñu lui hĕ? Si klei mtô anei ăt djŏ sĭt snăk kơ Phung Sang Aê Diê hruê anei?
Khua Yang Yêsu ƀuah ktang kơ phung khua čih hră leh anăn kơ phung Pharisi, iêô kơ diñu jing “phung ai ngăm” kyuadah diñu knŏng uêñ mĭn kơ rup bi êdah ti êngao (êlan 23a). Diñu hing ang jing phung djă pioh kjăp klei bhiăn, tơl myơr tĭng ênoh sa kdrêč hlăm pluh đa đa mta djam điêt dhiêt msĕ si êč êya. Ti êngao, dlăng kơ diñu kpă ênô snăk. Ƀiădah Khua Yang Yêsu ktrâo hưn mdah mta phŭn: diñu uêñ kơ klei điêt dhiêt čêč drêč, ƀiădah lui hĕ jih “klei yuôm hĭn hlăm klei bhiăn”. Khua Yang kñăm tlâo mta klei yuôm hĭn: “jing klei kpă, klei pap, leh anăn klei đăo” (êlan 23b). Klei kpă jing dôk hdĭp ênuah ênô leh anăn dôk dơ̆ng ƀơ̆ng huă mtăp mđơr hŏng mnuih mkăn. Klei pap jing thâo săng brei kơ mnuih mkăn, thâo pap leh anăn đru phung dôk găn klei kƀah. Klei đăo jing dôk hdĭp sĭt kpă, myơr jih klei hdĭp kơ Aê Diê hlăm jih jang klei truh. Anei yơh jing ênoh yuôm bi êdah ai tiê Aê Diê, ƀiădah phung khua kiă kriê klei đăo dlăng hĕ hơăi mang.
Klei hưn êlâo brei răng anei ăt jing sĭt snăk hŏng Phung Sang Aê Diê hruê anei. Năng ai drei nao Sang Aê Diê nanao, hur har mă bruă, myơr djăp ênŭm, ƀiădah ăt dôk kƀah klei kpă ênô leh anăn klei khăp sĭt. Sa Phung Sang Aê Diê năng ai hur har dlăng ti êngao, ƀiădah kƀah hĕ tlâo mta klei yuôm hĭn anei, snăn ênưih lĕ hlăm klei bi kah phung, bi phat kđi leh anăn uêñ kơ rup ti êngao kyuadah dôk hdĭp hlue soh klei mtrŭt leh anăn klei kñăm čiăng. Năng ai klei blŭ myang doh jăk, ƀiădah klei bi mguôp kƀah klei pap. Năng ai mtô mblang klei sĭt nik, ƀiădah amâo mâo bi êdah ôh klei khăp. Khua Yang Yêsu amâo hngah ôh kơ bruă ngă ti êngao. Ñu lač: “Jih klei anăn brei diih gưt, leh anăn đăm lui ôh klei êlâo anăn” (êlan 23c). Mblang jing klei hdĭp phung đăo kơ Krist brei mâo jih dua: klei gưt klei ngă leh anăn ai tiê mâo klei bi mlih. Jih jang bruă ngă djŏ brei kbiă hriê mơ̆ng ai tiê khăp kơ Khua Yang leh anăn khăp kơ mnuih.
Klei Aê Diê Blŭ hruê anei iêô mthưr grăp čô drei lŏ ksiêm dlăng wĭt klei hdĭp drei pô. Lu blư̆ drei knŏng djă pioh rup ti êngao ƀiădah kƀah klei sĭt mơ̆ng lam ai tiê. Si ngă drei uêñ mĭn kơ klei bhiăn ƀiădah wơr bĭt hĕ klei bi thâo săng brei hlăm klei khăp mơ̆? Sa Phung Sang Aê Diê đĭ hriê kơ prŏng jing anôk bi mguôp ti krah klei sĭt nik leh anăn klei khăp. Anôk anăn tui tiŏ klei kpă ênô, ƀiădah wăt bŏ hŏng klei thâo pap mơh. Anôk anăn dôk hdĭp sĭt suôr amâo djŏ knŏng hlăm klei đăo, ƀiădah wăt hlăm klei dôk dơ̆ng ƀơ̆ng huă hdơ̆ng pô grăp hruê. Anôk anăn amâo djŏ kdrăp bhiăn klei đăo, ƀiădah klei hdĭp mâo klei bi mlih: amâo djŏ rup ti êngao, ƀiădah jing klei khăp bi êdah hŏng bruă ngă. Tơdah klei kpă ênô, klei pap leh anăn klei đăo bi êdah hŏng bruă ngă, Phung Sang Aê Diê srăng jing anôk ba hriê klei bi juh, klei đĭ hriê kơ prŏng leh anăn klei hưn bi sĭt hdĭp kơ lăn ala.
Ya mta klei yuôm hĭn drei wơr bĭt hĕ hlăm knhuah hdĭp grăp hruê?
Wah lač: Ơ Khua Yang, akâo Ih đru kâo amâo lui hĕ ôh klei yuôm hĭn, ƀiădah hur har dôk hdĭp bi êdah jih klei anei grăp hruê, čiăng kơ klei đăo kâo amâo knŏng thâo ƀuh ôh, ƀiădah bi êdah sĭt ai tiê Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
