I Lu Pơtao 13:1-3
“Yua kơ Kră Yang ‘Bok Kei-Dei iĕm thoi kơ ŭnh soh chhông păng jơ̆ Kră Yang ‘Bok Kei-Dei băt kơ gar.” (Bơtho Khôi Juăt 4:24)
Nơ̆r jet tơchĕng pơwao:
- Yua kơ kiơ bơngai pơtruh nơ̆r ‘Bok Kei-Dei năm truh tơ Bêtel sư chrih kơ chơ nang soi na ưh kơ chrih kơ pơtao Jêrôbôam?
- Yua kơ tơdrong kiơ pơtao wă rôp bơngai pơtruh nơ̆r ‘Bok Kei-Dei?
- Lu bơ̆n kăl kơ pơm thoi yơ hăm nơ̆r ‘Bok Kei-Dei?
Wă kơ kơjăp lăm tơdrong pơgơ̆r lăm char lu sư, pơtao Jêrôbôam đei tơdrong kơtul dêh sư dan rơmo pơm păng maih dan ‘bơ̆t anih Bêtel hăm Đan, pơm ăn kơ kon pơlei pơla pơm yoch hăm ‘Bok Kei-Dei, na ‘Bok Kei-Dei wơh minh ‘nu bơngai pơtruh nơ̆r ‘Bok Kei-Dei đơ̆ng dêh Juđê wă năm roi tơdrong phak pơrăm đơ̆ng ‘Bok Kei-Dei. Kơplah bơngai pơtruh nơ̆r Kră Yang truh tơ Bêtel na sư chrih kơ chơnang soi ăn trŏ kơ sư chrih kơ pơtao Jêrôbôam ră noh bơih tơdrong đơ̆ng ‘Bok Kei-Dei khan Kră Yang sư hơchăng lê̆ pơtao Jêrôbôam bơih yua kơ sư pơm glăi hăm tơdrong pơgơ̆p hăm Kră Yang. Păng tơdrong chrih kơ chơnang soi noh jơ̆ tơdrong kơkuh mă pơtao Jêrôbôam đei pơm noh jơ̆ ưh kơ yua.
Nơ̆r pơma pơtruh lê̆ hơdrol âu đei ‘bar tơdrong gô truh, gô truh tơ hơnăp păng truh hloi dang ei. Gah tơdrong wă truh tơ hơnăp gô đei minh ‘nu pơtao lĕch đơ̆ng adrĕch adrŭng pơtao Đa-wit anăn sư Jôsia gô pơrăm lê̆ anih kơkuh đơ̆ng pơtao Jêrôbôam pơjing , wă khan dôm tơdrong gah tơdrong lui đêl sư pơm noh gô pơrăm đĭ yua kơ tơdrong sư kơ kuh noh jơ̆ tơdrong kơkuh “lôch” (trong 2). Păng 300 sơnăm đơ̆ng rŏng, nơ̆r đei khan lê̆ hơdrol ‘nâu trŏ ‘blep tơpă (II Pơtao 23:15-16). Pơm thhoi yơ tơdah ưh kơ đơ̆ng ‘Bok Kei-Dei lei na bơngai pơtruh nơ̆r ‘Bok Kei-Dei âu mah roi hloi anăn bơngai mă wă pơrăm lê̆ tơdrong kơkuh ‘bok pơtao Jêrôbôam ‘nâu! Gah dang ei, “’Nâu tơdrong tơ’bôh hlĭch mă Kră Yang đei khan bơih: Chơnang soi gô pơchah tơnuh gô tơsĭ huŏng đĭ tơ teh.” (trong 3). Kiơ̆ kơ khôi juăt, chơnang soi kăl kơ pơm rơ goh hăm tơnuh kăl kơ tuh hŭt lê̆ tơnaih hơtaih (Lêwi 6:10-11). Tơdrong tơnuh huŏng tơteh noh jơ̆ tơ’bôh ăn chơ nang soi âu ‘mê̆ ‘mach dêh.
Hmach dêh pơtao Jêrôbôam ưh kơ chu mơ̆ng nơ̆r ‘Bok Kei-Dei păng ưh kơ tơbral tơdrong yoch, tơplơ̆ kơ tơdrong noh, sư tă kơ blĕk păng wă ‘maih rôp ‘bok mă khan lê̆ hơdrol (trong 4). Tơdrong âu tơ’bôh ăn: Mă mônh, sư ưh kơ mơ̆ng nơ̆r ‘Bok Kei-Dei đei chrih pơma kơ sư. Mă khan bơngai pơtruh nơ̆r ‘Bok Kei-Dei âu roi hơđăl hloi kơ bơngai mă wă pơrăm tơdrong sư pơm âu, sư wă lui ngeh liơ yua kơ dêh char pah tu sư pơgơ̆r oei pran dêh tơpă! Mă ‘bar, pơtao sư lăng bơngai pơtruh nơ̆r ‘Bok Kei-Dei âu oei ‘lơ̆p tăm, yua kơ đơ̆ng rŏng noh đei pơma tơ’bôh kơ minh ‘nu bơngai pơtruh nơ̆r ‘Bok Kei-Dei kră bơih, păng trŏ blep thoi nơ̆r bơngai pơtruh nơ̆r ‘Bok Kei-Dei đei chrih âu tă kơ 300 sơnăm păng tơdrong pơkeh noh tă kơ đơ̆ng minh ‘nu pơtao đơ̆ng gah Bơbah. Tơdrong tih hloh ‘nâu jơ̆ yua kơ tơdrong pơang akâu kơdih. Kơplah bơngai pơtruh nơ̆r ‘Bok Kei-Dei đơ̆ng gah bơbah truh tơanih Bêtel wă tơbơ̆p pơtao Jêrôbôam kơplah sư oei pơyơ̆r tơmam soi, ăn sư tơdrong trŏ kơ tơdrong âu jơ̆ lu ‘bok soi ră, tơdrong pơyơ̆r tơmam soi noh ‘bok pơtao ưh kơ gơh pơyơ̆r. Tơdrong âu tơ’bôh ăn ‘bok pơtao âu pơang akâu kơdih dêh.
Chăl dang ei, lu bơ̆n kăl kơ kơchăng mă tơpă yua kơ lu bơ̆n ‘bônh dêh kơ “ưh kơ ‘maih mơ̆ng” Nơ̆r Kră Yang mă lei “tă kơ ‘bônh kơ pơma” dôm nơ̆r ‘blĕk klai tơplơ̆ kơ Kră Yang ‘Bok Kei-Dei, phŏ kơnh “’bônh kơ blĕk” hăm nơ̆r ‘Bok Kei-Dei. Kăl kơ băt ‘blĕk klai kơ nơ̆r ‘Bok Kei-Dei ‘noh jơ̆ minh tơdrong ưh kơ gơh pơm tơpă (Yakơ 1:19-21).
Ơ Kră Yang, apinh Ih ăn kơ inh đei jơhngơ̆m pơyom iŏk đon ala păng chu yom kơ nơ̆r Kră Yang đei bơtho khan. Apinh Ih ăn kơ inh băt tơbral dôm tơdrong inh đei pơm ưh kơ trŏ hăm nơ̆r Ih đei tơ’bôh kơ inh. Yua anăn Kră Yang Yêsu Krist, Amen.
Lu bơ̆n hăm chu iŏk đon ala mơ̆ng nơ̆r Kră Yang păng chu kiơ̆ dôm tơdrong thoi ‘Bok Kei-Dei wă ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Hơriso 70-71
Kênh Youtube BHKTHN:
https://www.youtube.com/c/bhkthn
