Mathiơ 24:14
“Gô lu bơngai lui kơ Inh bơtho tơdrong ‘nao ‘lơ̆ng ‘Bok Kei-Dei wă pơgơ̆r kon bơngai jơ̆p-jang kơ teh đak ‘mơ̆i na truh năr tôch.”(Mathiơ 24:14)
Nơ̆r jet tơchĕng pơwao:
– Kră Yang Yêsu pơma pơtrơp gah tơdra kiơ kơplah năr wă jê̆ tôch?
– Lăm tơdra ‘noh hei, đei tơdrong kiơ phara kơ hmă?
– ‘Bai pơhrăm’nâu tơ’blŏk kơ bơ̆n wă kơ bơ̆n pŭ iŏk tơdrong jang thoi yơ?
Tơdra tuch luch mă Kră Yang Yêsu pơma’bơm ei gô đei lăm jơhnơr hơtuch,’noh tơdrong jang bơtho Tơdrong ’Nao ’Lơ̆ng wơ̆ hloh, lanh să hloh kơ đĭ-đăng jơhnơr đơ̆ng âu tơrŏng sơ̆. Đơ̆ng năr Kră Yang Yêsu wơh, jao ăn lu jơ̆ng’bang thoi âu: “Iĕm athei năm jơ̆p-jang kơ teh đak bơtho tơdrong ‘nao ‘lơ̆ng kơ đĭ-đăng bơngai” (Markôs 16:15). Lu jơ̆ng hăm Khul Lui, lu kon sâu jơhnơr pơtrơp pơtrơp đơ̆ng rŏng kơ lu sư noh oei ling-lang tơnăp jang bơtho Tơdrong ’Nao ’Lơ̆ng, mă khan lei ră, lăm jơhnơr hơtuch ei kơnh, đe bơtho Tơdrong ’Nao ’Lơ̆ng tơ jơ̆p-jang teh đak, đe chă bơtho noh pran sư,jơ̆p sư tôch’bơ̆t noh bơih, đơ̆ng sơ̆ tam lah‘bôh ôh.
Nơ̆r Kră Yang khan“wă pơm kơdranh ăn kơ đĭ-đăng bơngai”, nơ̆r ‘nâu ưh kơ khan gô đei lơ dêh bơngai lui kơ Kră Yang lei ôh, mă-lei wă khan lơ bơngai tơ jơ̆p-jang teh đak âu gô đei jơ kơtơ̆ng đe bơtho gah Tơdrong ’Nao ’Lơ̆ng dŏng pơklaih, đei jơ băt kơ Kră Yang Yêsu ‘Bok Dŏng Pơklaih. Trŏ kơ thoi tơ kơpal ‘noh hei bơih mơ̆n, gô đei bơngai mơ’nah lui sơng iŏk Tơdrong ’Nao ’Lơ̆ng Kră Yang Yêsu. ’Nâu bơih tơdra tơbăt pran dêh yua kơ khan đei lu Krist hơlĕnh, đei lu ‘bok thây bơtho hơlĕnh, đei tơdrong tơblah wang, đei tơdrong jĭ hơbuh păng đei tơdrong truh răm ơh sơ‘ngon đơ̆ng sơ̆ tam lah đei, tam lah‘bôh; lu bơngai lui tơpă noh chu pŭ đe pơm kơnê̆ kơtang, lu bơngai lui ưh kơ tơpă noh lu sư sơngah achăng tŭk tơdrong lui.v.v. Tơdrong ’Nao ’Lơ̆ng.
‘Bok Krist ’nâu đe oei hơnơ̆ng kơ chă năm bơtho ưh kơ lê̆, yua kơ thoi noh bơih na đĭ-đăng kon bơngai lăm teh đak âu gô ưh kơ đei bu gơh khan: Inh tam lah kơtơ̆ng hloi’mơ̆i tơdrong Kră Yang mơnat dŏng pơklaih’nei. Bơ̆n lăng’nâu bơih jơ trŏ, jơ lăp mă tuch luch, păng tôm ngơ-ngei ăn kơ kon bơngai gơh kơtơ̆ng tơdrong Kră Yang dŏng pơklaih,păng ‘noh bơih tơdrong mơnat ăn đĕch đơ̆ng pơlei’lơ̆ng ti,mơnat tuch luch‘bơ̆t doh bơih. Yua kơ đơ̆ng rŏng kơ’noh hloi bơih jơhnơr chăl Kră Yang mơnat noh gô tôch, jơ năr trŏ wă kơ pơklaih lu sư noh kư̆m ưh pă đei, yua kơ kơplah noh năr tôch truh bơih.
Khul Bơngai Lui kơ Kră Yang dang ei athei adrin jang ră roi tơdrong Kră Yang dŏng pơklaih kon bơngai kơplah oei đei jơ năr trŏ, jơ năr oei tam.Yua kơ ‘bok Pôl bơngai jơ̆ng ‘bang đei tơbăt ăn kơ lu bơ̆n băt thoi âu: “Ning-mônh đei lơ bơngai ưh pă wă mơ̆ng tơdrong ‘Bok Kei-Dei. Đe wă kiơ̆ gah tơdrong kư̆ kă sư kơdih đĕch, na lu sư chă bơngai bơtho sư kiơ̆ kơ sư wă mơ̆ng đĕch, ưh pă kiơ̆ tơdrong ‘Bok Kei-Dei dơ̆ng” (II Timôthê 4:3).
Bơ̆n kư̆m băt kơ tơdrong hơgei dang ei đei ti vi, điên thoăi .v.v… pơdah pơđông rup, nơ̆r pơma ră roi wă kơ jơ̆p lăm teh đak âu mă tơ anih ataih atŏ, anih kueng ngơngei kư̆m gơh kơtơ̆ng Tơdrong ’Nao ’Lơ̆ng. Kră Yang Yêsu khan gô ‘bơ̆t lu jơhnơr wă jê̆ năr tôch kơnh, lu bơngai lui bơtho Tơdrong ’Nao ’Lơ̆ng Sư jơ̆p-jang kơ teh đak. Na jơhnơr bơ̆n oei hơtai arih dang ei ’nâu wă jê̆ truh ngơngei bơih jơ năr mă Tơdrong ’Nao ’Lơ̆ng lu bơngai lui gô bơtho jơ̆p jang kơ teh đak noh. Bơ̆n kăl kơ adrin, nŏng ră roi Tơdrong ’Nao ’Lơ̆ng pơih să Dêh char’Bok Kei-Dei, bơ̆n kư̆m kăl kơ hiơ̆k dŏng lu bơngai lui bơih ră mă-lei oei rơdu tơrăn, bơ̆n bơwei, tơ’blŏk kơ lu sư khan: “Bơ̆n ‘nĕ kơ lê̆ tơdrong akŭm, thoi lu đe mơ’nah mă lê̆ dang ei. Yua kơ dang ei wă jê̆ truh khei năr Yêsu Krist wă jur boih, na bơ̆n athei adrin pơlung băl gah tơdrong ‘noh rai dêh.” (Hêbrơ 10:25). Yua kơ bơ̆n băt hơđăl kơ mưh jơhnơr chăl, jơ năr Kră Yang mơnat noh tôch bơih lei ưh pă tam bơih.
Ơ Kră Yang mă’mêm mơnat, apinh Ih ăn kơ inh ‘mêm kơ Ih păng’mêm kơ lu bơngai jih’ma,apinh Ih tơgŭm inh păng Khul Lui pran kơtang ră roi Tơdrong ’Nao ’Lơ̆ng kơ lu bơngai tăp dăr kơ inh adrol kơ jơ năr tơdrong Ih mơnat tôch noh.Inh krao khan yua Anăn Kră Yang Yêsu Krist, Amen!
Bơ̆n hăm hơtai adrin jang ră roi Tơdrong ’Nao ’Lơ̆ng ưh?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Tơ’bôh 8.
Kênh Youtube BHKTHN:
