I Pêtrôs 3:16
Trong tơm: “Thoi noh bơ̆n athei pơm ‘lơ̆ng tơpăt ling lang, wă kơ lu bơngai mă pơjăm bơ̆n kiơ̆ tơdrong Yêsu, sư jing mơlâu yua kơ sư ưh kơ ‘bôh tơdrong bơ̆n pơm yoch kiơ.” (I Pêtrôs 3:16)
Nơ̆r jet tơchĕng pơwao:
– Jơhngơ̆m lăm to thoi yơ? (lăng lăm Rôm 2:14-15)?
- Pơm thoi yơ wă kơ đei bơngai lăm to ‘lơ̆ng?
– Bơngai lăm to ‘lơ̆ng đei lơi yua kiơ kơ plah bơ̆n tơ ‘bơ̆p tơdrong pơmat truh yua kơ bơ̆n ră roi tơdrong ‘Bok Kei-Dei?
“Bơngai lăm to” lăng nơ̆r Rôm khan “conscientia” “con” wă khan “hơdai” hăm “scientia” wă khan “băt”. Thoi noh, bơngai lăm to noh jơ̆ tơdrong băt lăm jơhngơ̆m kon bơngai “hơdai băt” wă khan drơ̆ng hơdai dah chrih tơ ‘bôh đơ̆ng tơdrong bơ̆n đei pơm. Tơdrong ‘nâu ‘Bok Pôl đei tơblang kơplah pơma gah tơdrong wă phak lu bơngai ‘nguaih kơ lu bơngai Israel lu sư ưh kơ đei “khôi juăt” (Rôm 2:14-15). Kăl kơ hơlen bơngai lăm to ưh kơ gơh dan hơtŏ hăm nơ̆r pơma ‘Bok Kei-Dei kŭm dai ưh kơ dan hơtŏ hăm tơdrong juăt trŏ, mă lei bơ̆n ưh kơ gơh lê̆ tơdrong mă bơngai lăm to đei tơ’bôh kơ bơ̆n na hoei kơ đei tơdrong phak (I Timôthê 1:19).
Bơngai tơblang nơ̆r ‘Bok Kei-Dei Warren W Wiersbe đei pơma gah tơdrong bơngai lăm to lăm sơ̆p hla bơar Be Hopeful thoi âu “bơngai lăm to nhen thoi ‘măng ‘mŏk đei pơih sơng iŏk tơdrong hơdah đơ̆ng ‘Bok Kei-Dei. Tơdah lu bơ̆n ưh kơ chu yom, lei ‘măng ‘mŏk noh briuh drăm rai dêh na đunh kơnh jing ưh pă đei tơdrong hơdah lăm hnam yua kơ bruih brăm. Tơdrong âu jing “bơngai lăm to ‘mê̆ ‘mach” (Tit 1:15)”. Pơma kiơ̆ kơ Wiersbe, bơngai lăm to kiơ̆ kơ “hơdah pơchrang tơ lăm ‘măng ‘mŏk”. Wă kơ đei “bơngai lăm to ‘lơ̆ng” lei bơ̆n kăl kơ đei lơ tơdrong hơdah noh jơ̆ nơ̆r Kră Yang ‘Bok Kei-Dei pơchrang lăm chăl arih bơ̆n. Wă kơ đei thoi noh lei bơ̆n kăl kơ pơnam kơ pơhrăm nơ̆r ‘Bok Kei-Dei păng pơm kiơ̆ nơ̆r ‘Bok Kei-Dei. Rai jê̆ hăm nơ̆r ‘Bok Kei-Dei, lu bơ̆n gô rai hlôh kơ tơdrong ‘Bok Kei-Dei wă hloh loi, bơngai lăm to bơ̆n gô tĕnh hrĕnh băt kơ tơdrong ‘lơ̆ng dah tơdrong kơ nê̆. Hloh kơ noh dơ̆ng, lu bơ̆n kăl kơ pơtơ̆p ăn kơ bơngai lăm to bơ̆n pran jăng păng ‘lơ̆ng rơgoh nhen thoi ‘Bok Pôl dơ̆ng bơ̆t a-năp ‘Bok Kuan Phê-lit (Tơdrong Jang 24:15-16). Athei ling lang bơwei jơhngơ̆m bơ̆n ‘lơ̆ng rơgoh, kăl kơ tơbral tơdrong yoch hăm Kră Yang hloi đơ̆ng rŏng kơ bơ̆n pơm yoch, nhen thoi ‘măng ‘mŏk ‘lơ̆ng rơgoh wă kơ đei hơdah pơchrang ‘lơ̆ng ăn kơ lăm hnam.
Yua kơ kiơ bơ̆n kăl kơ đei Jơhngơ̆m ‘Lơ̆ng Rơgoh tơgŭm bơ̆n yak hlôi đơ̆ng dôm tơdrong pơlong lăng kơplah bơ̆n ră roi ăn kơ Kră Yang Yêsu? Yua kơ bơngai lăm to ‘lơ̆ng tơgŭm thim ăn kơ bơ̆n pơ̆n nuih băt kơ bơ̆n tơpăt ‘bơ̆t anăp Kră Yang ‘Bok Kei-Dei hăm bơngai nai, tơgŭm bơ̆n hơđơ̆ng lăm jơhngơ̆m kơplah đei tơ’bơ̆p tơdrong hiơ̆k bơngơ̆t păng ưh kơ đei ngĭl ngŭl kơ plah đe nai đei “pơma roi sa”, nhen thoi kơchăl dang ei đei yua iŏk đơ̆ng mang (Internet) mă lơ tơdrong ưh kơ tơpăt đei pơdah. Apinh Kră Yang ‘Bok Kei-Dei tơgŭm bơngai lăm to bơ̆n đei tơdrong ‘lơ̆ng rơgoh wă tơgŭm bơ̆n yak hlôi đơ̆ng tơdrong pơlong lăng kơ plah bơ̆n ră roi tơdrong ‘nao ‘lơ̆ng Kră Yang.
Lu bơ̆n hăm wei jơhngơ̆m bơ̆n ‘lơ̆ng rơgoh wă kơ bơ̆n jing minh ‘nu bơngai pơm kơdranh kơ tơdrong ‘nao ‘lơ̆ng đei yua ăn kơ Kră Yang ưh?
Ơ Kră Yang, inh bơnê kơ ih yua kơ Ih ăn kơ inh Yang Bơhngol ‘Lơ̆ng mơ̆t oei lăm jơhngơ̆m inh, păng ăn kơ Nơ̆r Ih noh jơ̆ tơdrong tơpăt sĭt wă chông hơ nhăk inh. Apinh Yang Bơhngol ‘Lơ̆ng yua nơ̆r Ih pơchrang hơdah lăm jơhngơ̆m hăm tơdrong tơchĕng inh wă kơ bơngai lăm to inh ‘lơ̆ng, đơ̆ng noh pơm kơdranh kơ anăn Ih đei yua. Yua anăn Kră Yang Yêsu Krist, Amen.
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 9
Kênh Youtube BHKTHN:
