III Yôhan 1:1-4
“Ưh pă tơdrong kiơ mă hiôk hloh dang tơdrong âu: Inh kơtơ̆ng lu bơngai lui kơ ‘Bok Kei-Dei đơ̆ng inh bơtho lu sư oei lui kơjăp khŏm khŏm.” (III Yôhan 1:4)
Nơ̆r jet tơchĕng pơwao:
– ‘Bok Yôhan krao khan tơdrong kiơ kơ bơngai lui mă sư wei lăng?
– Tơdrong mă sư chơt hiôk hloh ‘noh kiơ?
– Đei tơ’blŏk kơ bơ̆n tơdrong kiơ lăm năr ‘Blŏk kơ Mĕ ‘Bă sơnăm ‘nâu?
Yôhan chih kơthơ kơ Guơs buăl sư, bơngai lui mă sư ‘mêm kơeng. Sư pơih nơ̆r pơma hăm nơ̆r ‘mêm hmach: “Inh ‘mêm kơ ih tơpă”. Pơtrơp dơ̆ng ‘noh nơ̆r krao khan tơgŭm kơ Guơs liĕm akâu lăm tôm tơdrong, “Ăn kơ inh liĕm akâu păng wei lăng ih tôm tơdrong, thoi sư ăn kơ ih lui kơjăp dang ei” nơ̆r Krao khan ‘nâu tơ’bôh Yôhan sư ‘măn adrol hloh ‘noh sư lăng tơdrong pran gah bơhngol gĭt hloh kơ tơdrong pran gah sĕch akâu akar dah mă tơdrong kĕ jei lăm chăl âu.
Yôhan sư chơt hiôk yua kơ băt kơ Guơs “Lu sư khan ih kiơ̆ tơdrong ‘Bok Kei-Dei tơpă. Inh băt mơ̆n ih kiơ̆ tôm tơdrong ‘Bok Kei-Dei” (trong 3). “Kiơ̆ tơdrong ‘Bok Kei-Dei” wă khan arih trŏ, chu kiơ̆ nơ̆r Kră Yang, păng pơdah ‘Bok Krist lăm tơdrong arih rim năr. Hăm Yôhan, tơdrong tơpăt ưh kơ sĭ khan tơdrong lui trŏ đĕch ôh na kư̆m minh tơdrong arih đei yua đơ̆ng Tơdrong ‘Nao ‘Lơ̆ng. Kơlih kơ thoi noh, Yôhan đei chih hơpong tơpăt tơpă: “Ưh pă tơdrong kiơ mă hiôk hloh dang tơdrong âu: Inh kơtơ̆ng lu bơngai lui kơ ‘Bok Kei-Dei đơ̆ng inh bơtho lu sư oei lui kơjăp khŏm khŏm.” (trong 4).
Yôhan pơma dơnuh hăm Guơs nhen thoi minh ‘nu bơngai lui, păng nơ̆r sư pơma kư̆m tơ’bôh hơpơi đơ̆ng bơngai mĕ ‘bă mă lui yom. Mĕ ‘bă ayơ kư̆m hơpơi wă kơ kon hơ’lơ̆p bơ̆n liĕm akâu, kĕ jei, hơđơ̆ng păng chơt hiôk. Mălei tơdrong gĭt kăl hloh ‘noh liĕm akâu hiôk hian gah bơhngol. Kon hơ’lơ̆p lu bơ̆n oei arih lăm minh teh đak ‘bĕnh tơdrong arih ưh kơ trŏ. Mĕ ‘bă kăl kơ pơm kơmĭl arih ‘lơ̆ng păng hiơ̆k bơtho kơ kon hơ’lơ̆p gah tơdrong tơpăt trŏ đơ̆ng nơ̆r Kră Yang. Đon lui đei ‘yoi ‘moi ‘lơ̆ng hloh ưh kơ sĭ đơ̆ng tơdrong bơtho tơ’bôh na kư̆m đơ̆ng tơdrong arih pơm kơmĭl. Kơplah kon hơ’lơ̆p ‘bôh mĕ ‘bă yak năm lăm tơdrong tơpăt sĭt: Pơma tơpăt tơpă, băt mơnat, adrin krao khan, tơnăp bơ̆jang…, lu sư gô pơhrăm iŏk ‘bai pơhrăm gah đon lui ‘noh thoi yơ.
Lăm năr ‘Blŏk kơ Mĕ ‘Bă sơnăm ‘nâu, apinh Kră Yang ăn kơ mĕ ‘bă băt hiơ̆k tơdrong arih gah bơhngol kơ kon hơ’lơ̆p lơ hloh. Jing bơngai kon hơ’lơ̆p, bơ̆n athei ‘bôh jơhngơ̆m hơpơi wă đơ̆ng mĕ ‘bă, ‘nĕ kơ druh kiơ̆ tơdrong kon bơngai gah ‘ngaih. Kăl kơ ‘blŏk, kon hơ’lơ̆p dang ei gô jing mĕ ‘bă tơ anăp ning mônh. Athei pơyom, ‘mêm mơnat păng pơm tơdrong ‘lơ̆ng hloh wă kơ mĕ ‘bă chơt hiôk. Kư̆m ‘nĕ kơ hiơt krao khan gah tơdrong arih gah bơhngol kư̆m thoi jơhngơ̆m liĕm akâu mĕ ‘bă wă kơ Kră Yang ăn kơ mĕ ‘bă liĕm akâu gah bơhngol kư̆m thoi jơhngơ̆m pran gah sĕch akâu akar. Apinh Kră Yang ăn kơ hnam dơnŏ bơ̆n jing minh pôm hnam dơnŏ pŭn hiôk păng bơngai nai gô ‘bôh Kră Yang đơ̆ng lăm tơdrong arih hnam dơnŏ bơ̆n.
Ơ Kră Yang apinh Ih ăn kơ bơhngol inh gơh hiôk hian lăm Ih, păng yak năm lăm tơdrong tơpăt sĭt Ih đĭ chăl arih. Apinh Ih tơgŭm inh, mĕ ‘bă păng kon hơ’lơ̆p, hiơ̆k tơgŭm dih băl wă kơ hnam dơnŏ inh ling lang pơm hơdah Anăn Kră Yang. Krao khan yua anăn Kră Yang Yêsu Krist, Amen.
Bơ̆n pơm kiơ kơ mĕ ‘bă lăm năr ‘Blŏk kơ Mĕ ‘Bă sơnăm ‘nâu?
Đŏk Sơ̆p hla bơar ‘Bok Kei-Dei lăm pêng sơnăm: Hơriso 96-97
Kênh Youtube BHKTHN:
