Markôs 1:32-35
“Lăp pơgê hrôih năr đơ̆ng rŏng, Yêsu lĕch hloi đơ̆ng pơlei ei năm tơ anih kueng kơdrô̆, Sư krao khan kơdrô̆ Sư tơ ei.” (Markôs 1:35)
Nơ̆r jet tơchĕng pơwao:
– Kră Yang Yêsu hlôi bơ̆jang hlôi minh năr thoi yơ?
– Kră Yang năm tơ anih kơdrô̆ đơ̆ng hrôih wă pơm kiơ?
– Anih kơdrô̆ lu bơ̆n tơ yơ?
Lăm sơ̆p Hla bơar ‘Bok Kei-Dei âu wă tơ’bôh kơ Kră Yang Yêsu, lăm minh năr gleh lap lăm tơdrong jang tơ pơlei Kapernum. Truh kơsơ̆ măng lăp pơkeh năr Sa’bat, lơ bơngai jĭ jăn păng yang kơnê̆ mơ̆t năm tơ Sư, na Markôs mah khan “Đĭ đăng lăm pơlei akŭm ‘bơ̆t ‘măng”. Sư ‘măn jơ wă pơklaih lơ bơngai jĭ jăn păng pơpuh yang kơnê̆ đơ̆ng akâu bơngai.
Kơplah đei lơ bơngai jang păng gleh lap, Kră Yang Yêsu oei ‘măn jơ năm tơ anih kueng kơdrô̆ tơ’bưh hăm Kră Yang ‘Bok Kei-Dei. Mă khan Sư Kon ‘Bok Kei-Dei ră mălei kơplah hrŭk iŏk akâu bơngai, Kră Yang “Achăng lê̆ akâu kơdih, jur jing thoi đĭch đam păng jing thoi kon bơngai.” (Philip 2:7). Lăm akâu jăn kon bơngai, Kră Yang kăl kơ đei jơhngơ̆m pran đơ̆ng Yang ‘Bă đơ̆ng plĕnh ti. ‘Bok mă wơh Sư jur tơ ala teh âu. Yua kơ thoi noh mă khan akâu jăn mă gleh lap dang yơ hĭ, lei Kră Yang kơplah pơge oei hrôih tam mă hơdah, Kră Yang hơđơ̆r, năm tơ anih kueng kơdrô̆ wă kơ krao khan. Kră Yang Yêsu ‘măn jơ adrol hloh lăm năr wă năm hăm Yang ‘Bă. Tơ anih kueng kơdrô̆ noh, Kră Yang ‘măn jơ oei hreh tơ’bưh hăm Yang ‘Bă. Kră Yang pơma dơnuh hăm ‘Bă Sư. Lu nơ̆r lăm trong 35 “Sư iung” “lĕch năm” “tơ anih” “Krao khan” ‘noh wă tơ’bôh bơ̆n lăng kăl dêh jơ krao khan. Mă khan akâu jăn gleh lap kăl kơ tep, mălei đơ̆ng pơge hrôih Kră Yang iung đơ̆ng tep, lĕch đơ̆ng giơng, năm tơ anih kueng kơdrô̆ tơ’bưh hăm Yang ‘Bă. Tơ anih kueng kơdrô̆ noh, Kră Yang Yêsu oei minh drô̆ wă pơyơ̆r ăn kơ ‘Bă nơ̆r krao khan. Tơ anih noh ưh kơ đei pơhrơ̆k Sư, ưh kơ đei tơpôl wă hmĕt hmot Sư, ưh kơ đei pơm kơ tơdrong tơ cheng ‘bar pah lăm tơdrong jang păng ưh kơ đei wă hiơ̆k bơngơ̆t kơ tơdrong kăl yua kơ bơngai nai. Tơ anih noh, Kră Yang đei thim jơhngơ̆m pran ‘nao đơ̆ng rŏng kơ minh năr đei bơ̆jang gleh lap. Păng kư̆m tơ anih noh, Kră Yang đei thim jơhngơ̆m pran wă kơ gơh pơm tôm tơdrong kiơ̆ thoi Kră Yang ‘Bă lăp đon.
Tơdrong arih lăm teh đak, plơ̆ng plơ̆ng dang ei pơm kơ tơdrong kăl yua kon bơngai rai pran hloh, tơdrong arih ưh kơ wăn pơm kơ lơ bơngai lăng ‘bôh bơ̆n kơdih nhen ưh kơ đei jơ năr wă pơm pơkeh tơdrong jang. Mă thoi ei, athei lăng kơmĭl Kră Yang Yêsu, rim ‘nu lu bơ̆n kăl kơ ‘măn jơ adrol hloh gơh tơ’bưh hăm Kră Yang tơ anih kueng kơdrô̆ dang ei ưh kơsĭ khan anih ưh kơ đei bơngai oei ‘noh wă khan anih ưh kơ đei bu pơm hrơ̆ng hreng kơ bơ̆n, ưh kơ đei yă kiơ pơm kơ bơ̆n hŭl hơl, wă kơ bơ̆n gơh tơ’bưh hăm Kră Yang kơdrô̆, lăp Kră Yang hăm bơ̆n đĕch.
Đei lơ tơdrong anat anot lăm tơdrong arih, lu bơ̆n hăm ‘măn jơ chă anih kueng kơdrô̆ wă tơ’bưh hăm Kră Yang ưh?
Ơ Kră Yang, apinh Ih tơgŭm inh wă kơ gơh tơklah weh đơ̆ng anih hrăt hrot ưh kơ wăn, đơ̆ng anih tơpôl na năm tơ anih kueng chơngue gơh tơ’bưh hăm Ih. Apinh Ih tơgŭm inh ling lang ‘blŏk kăl kơ Ih ăn đei jơhngơ̆m pran gơh arih, păng awih awăn kơplah năr oei tơ teh đak âu. Yua anăn Kră Yang Yêsu Krist, A-men!
Đŏk Sơ̆p hla bơar ‘Bok Kei-Dei lăm pêng sơnăm: Tơdrong Pơđơ̆k 16.
Kênh Youtube BHKTHN:
