Khiavdim 35:10-19
Nqe cim:
“Tagnrho nej cov uas muaj tswvyim ua txhua yam yuav tsum tuaj thiab ua tej uas tus Tswv samfwm tseg no” (Khiavdim 35:10).
Lus nug rau sawvdaws xav:
– Mauxes hu leejtwg tuaj nrog koom tes ua lub tsev ntaub?
– Cov tuaj ua tsev ntawd yog cov muaj peevxwm zoo li cas?
– Peb ua li cas thaum tau Vajtswv hu los koom tes ua Vajtswv tes haujlwm?
Mauxes mloog tus Tswv lus samfwm, nqua hu tej pejxeem fij khoom qhov txhua chaw thiab dag zog tuaj koom ua lub tsev ntaub (Khiavdim 25:1-9; 35:4-9), nws nqua hu hais tias “Tagnrho nej cov uas muaj tswvyim ua txhua yam yuav tsum tuaj thiab ua tej uas tus Tswv samhwm tseg no” (nqe 10). Cov uas tuaj ua lub tsev ntaub yog haiv neeg Yixalayees uas raug xaiv hauv lawv cov kom muaj tswvyim thiab txawj ua haujlwm tuaj ua. Lawv cov ntawd yuav tau ua txhua yam raws nraim li tej uas tus Tswv twb taw qhia uas yog: cov vov, cov xov, cov khawb, cov nqaj, cov tab, cov puab thiab cov tiag taw, lub phijxab, daim hau, daim ntaub thaiv, lub rooj, cov ceg tagnrho tej khoom siv hauv lub tsev ntaub, tej ntxaij, tej tais ntxuav, daim ntaub thaiv rooj vag thiab tej tsoos tsho uas cov Povthawj hnav ua haujlwm hauv chav Dawbhuv… (nqe 11-19). Lawv yog cov txivneej lossis pojniam txawj ua tej haujlwm, nchuav nyiaj, kos duab, ntos ntaub, xaws thiab tov tshuaj tsw qab. Thaum tuaj ua lub tsev ntau, lawv faib ua tej pab raws li nyias txawj ua tes haujlwm twg, muaj cov ua thawj coj tej pab ntawd. Yog li ntawd, thaum tuaj ua tes haujlwm rau lub tsev ntaub yuav tsum yoog tus cai tswj, muaj kev sib koom siab kom tes haujlwm tiav rau qhov zoo raws li uas tau txib.
Raws li Mauxes tej lus nqua hu, txhua tus muaj tswvyim, peevxwm li tau hais, yuav cim civ siv lawv tej kev txawj tuaj koom tes ua tus Tswv lub tsev ntaub. yog cov noob muaj lub siab fij khoom qhov txhia chaw, Cov kws tshajlij no yuav fij dag zog, kev txawj ntse ntawm tus kheej tas siab thiab txaus siab.
Niaj hnub nimno, thaum tus Tswv hu mus ua Nws tes haujlwm, muaj ntau tus ntseeg npaj nroos teb tus Tswv lub suab hu mus ua haujlwm rau tus Tswv. Lawv cov ntawd paub meej hais tias, lawv lub neej nyob hauv tus Tswv kev npaj tseg uas zoo thiab lawv zoo siab vim tau tus Tswv siv ua tus Tswv haujlwm. Tiamsis kuj muaj qeeleej ua xyem xyav, khuv xim lawv lub tswvyim lossis tsuas txhawj rau lawv kev ua noj ua haus lawm xwb. Ib yam uas muaj tseeb dhau los, muaj ntau leej vim ua tus Tswv haujlwm, tau tus Tswv pub koob hmoov ua rau nws yeej tsis tsawg ib yam dab tsi hauv lub neej. Thaum tau tus Tswv hu peb mus ua Nws tes haujlwm, tus Tswv yeej yuav nyob nrog, pub peevxwm, pub dag zog thiab pab kom peb ua tau haujlwm tiav rau qhov zoo li Nws txib. Tsis yog peb xwbtim tshwm nyob hauv tsev neeg lossis xwbtim los koom ib pawg ntseeg twg thiab ntawm ib thaj chaw ua haujlwm twg. Peb txhua tus ntseeg yog tus Tswv cov tub txib uas Nws yuav txib mus rau hauv nras liaj, ua ib tes haujlwm uas tus Tswv txib kom ua. Cia li ua Vajtswv tsaug rau lub peevxwm uas tus Tswv twb muab pub rau peb lawm, kom peb nco tus Tswv txiaj ntsig thiab rau siab ua Nws haujlwm.
Thov Vajtswv,
Tus Tswv, thov Koj pub kom nyuam yaus muaj lub qhov ntsej sab ntsujplig to zoo, hnov Koj lub suab hu, ua siab sib thiab zoo siab hlo teb ua raws Koj hu, kom ua lub neej muaj qab hau rau Koj. Amees.
Peb puas hnov tus Tswv hu thiab teb Nws lawm tau?
Nyeem Vajluskub hauv peb lub xyoo: Malakaus 4
Kênh Youtube BHKTHN:
