Klei Aê Diê Blŭ: Klei Bi Hriêng 22:10-11
Êlan kliăng: “Suôt hĕ mnuih kreh mưč leh anăn klei bi mneh msao srăng ruê̆, klei bi tăng leh anăn klei dlao wač srăng tuč.” (Klei Bi Hriêng 22:10)
Klei êmuh ksiêm mĭn: Ya knuih bi êdah mơ̆ng phung kreh mưč? Ya ngă brei “suôt” phung kreh mưč mơ̆ng êpul êya? Si drei ngă čiăng ba klei bi sa ai, bi khăp, bi mguôp hlăm êpul leh anăn Sang Aê Diê?
Mtao Y‑Salômon bi êdah sa klei hưn mthâo ktang kơ bruă bi kpĭ mjuăt hlăm êpul êya, brei suôt phung kreh mưč leh anăn drông phung mâo ai tiê êngeh leh anăn blŭ hŏng klei pap. Hlăm boh blŭ phŭn, boh blŭ “kreh mưč” jing “amâo mâo sĭt leh anăn mgao”. Phung kreh mưč jing phung ngă krưh mgao, blŭ hrăm bi êdah klei mđĭ kơ pô (Klei Bi Hriêng 21:24). Phung kreh mưč jing phung ba klei amâo thâo bi djŏ, ngă bi kah mbha hlăm êpul êya hrô kơ ba klei êđăp ênang, sa ai. Phung kreh mưč srăng amâo mâo ôh klei thâo mĭn mơ̆ng Aê Diê, wăt tơdah tui duah dưn (Klei Bi Hriêng 14:6), kyua tui hriăm klei sĭt nik Aê Diê brei mâo ai tiê klei mĭn luă gŭ leh anăn klei mĭn gưt asăp. Hrô kơ kpă ênô bi trông čiăng duah hdră msir klei mâo hlue si Klei Aê Diê Blŭ, phung kreh mưč srăng hngah kơ klei soh, ngă hlue si klei pô čiăng.
Tơdah phung kreh mưč amâo mdei ba klei bi tăng, amâo thâo bi djŏ, kah mbha hlăm êpul êya leh anăn ba klei jhat kơ êpul, snăn hdră msir knhal tuč jing “suôt” mơ̆ng êpul. Čiăng kơ sa čô mnuih kbiă đuĕ mơ̆ng êpul jing klei amâo mâo pô hlăm phung drei čiăng ôh, ƀiădah tơdah pô anăn amâo bi mlih ôh ƀiădah djă pioh nanao knuih mnuih kreh mưč, snăn êpul êya srăng mâo nanao klei bi mneh msao leh anăn arăng mưč mač. Kơ klei jăk, Mtao Y‑Salômôn mđĭ ai grăp čô mnuih hlăm êpul êya brei “khăp” amâodah “khăp čiăng” kơ hlei pô mâo ai tiê êngeh, thâo ba klei khăp, kpă ênô leh anăn klei thâo bi djŏ srăng ba kơ grăp čô mnuih, leh anăn ăt mâo klei blŭ hŏng klei pap (êlan 11).
Pô čih hră Y‑Yakơ mñă kơ phung ƀuôn sang Aê Diê brei hdĭp hŏng klei thâo mĭn mơ̆ng dlông brei: “Kyuadah ti anôk mâo klei nač leh anăn klei čuôt klih, tinăn srăng mâo klei rŭng răng leh anăn djăp mta bruă jhat. Ƀiădah klei thâo mĭn kbiă hriê mơ̆ng dlông êlâo hĭn jing êngeh, leh anăn êđăp ênang, êdu êun, thâo guôp, bŏ hŏng klei pap mñai leh anăn boh jăk, amâo mâo dlăng ti êngao amâodah ai ngăm ôh” (Y‑Yakơ 3:16-17). Grăp čô drei brei răng hdĭp djŏ hlue si klei Aê Diê Blŭ, kyua grăp čô hlăm phung drei, mơ̆ng khua gĭt gai truh kơ phung đăo, grăp čô ăt srăng jing phung kreh mưč tơdah drei brei klei mĭn pô leh anăn ai tiê mgao kgŭ êlâo hĭn. Khua Yang Yêsu mtô leh hlăm Klei Mtô ti dlông čư̆: “Jăk mơak yơh phung đru brei klei êđăp ênang hdơ̆ng mnuih, kyuadah Aê Diê srăng pia diñu phung anak Aê Diê!” (Y‑Mathiơ 5:9). Čang hmăng grăp čô hlăm êpul leh anăn Sang Aê Diê srăng sa ai, bi khăp, thâo bi djŏ, hdĭp doh jăk leh anăn thâo pap čiăng hrăm mbĭt mkŏ mjing Sang Aê Diê, bi guh kơang Anăn Khua Yang leh anăn lu mnuih thâo Khua Yang.
Drei mđing răng kriê klei êđăp ênang kơ êpul leh anăn Sang Aê Diê mơ̆?
Wah lač: Ơ Khua Yang, akâo kơ Ih đru kâo mâo klei khăp, klei luă gŭ, ba klei êđăp ênang hlăm Sang Aê Diê. Akâo kơ Ih đru kâo luă gŭ mđing hmư̆ klei pô mkăn mtô lač, bi mlih knuih hdĭp bi mơak kơ Aê Diê, ba klei tŭ dưn kơ êpul êya leh anăn bi guh kơang Anăn Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôsuê 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
