Pajlug 22:10-11
Nqe cim:
“Ntiab cov neeg khavtheeb tawm mus thiaj tsis muaj kev sib cav sib ceg lossis kev xyav luag moo tsis zoo ntxiv lawm.” (Pajlug 22:10)
Lus nug rau sawvdaws xav:
– Tus uas khavtheeb muaj tus yamntxwv li cas?
– Vim li cas yuav tsum “ntiab” tus neeg khavtheeb tawm?
– Peb cheemtsum ua li cas kom muaj kev sib haum, sib hlub, koom siab hauv peb cov thiab Pawg Ntseeg?
Vajntxwv Xalumoos qhia paub qhov kev tswj hauv ib npoj neeg, cia li ntiab tus uas khavtheeb tawm thiab txais tos tus neeg muaj lub siab dawbhuv, hais lus haum tibneeg. Raws li hauvpaus lus, lo lus “khavtheeb” muaj lub ntsiab tias “tsis meej pem lossis siab coj tsis zoo”. Tus neeg khavtheeb yog tus uas khav txiv, thuam neeg, lub siab ua li nws qhov kev khav txiv (Pajlug 21:24). Tus neeg khavtheeb yog tus uas ua kom sawvdaws tsis sib haum, faib ua pab pawg xwb. Tus neeg khavtheeb tsis muaj tus Tswv txojkev txawj ntse, txawm yog nrhiav los tsis tau (Pajlug 14:6), rau qhov kawm qhov tseeb ntawm Vajtswv yuav tau txo hwjchim thiab mloog lus. Twb tsimnyog hais kom sib haum los nws tseem nrhiav kev kub ntxhov, tus neeg khavtheeb tsis lees yuav qhov tseeb, ua raws siab nyiam.
Tus neeg khavtheeb nws tsis tso tseg txojkev ua kom lwm tus sib cav sib ceg, faib ua pab pawg thiab ua rau pab pawg txajmuag heev, yog li lub tswvyim yog muab “ntiab” tawm hauv sawvdaws mus. Cia kom ib tug neeg tawm hauv ib npoj neeg mus yog qhov uas peb tsis xav kom muaj, tiamsis yog tus neeg ntawd pheej tsis hloov siab niaj hnub khavtheeb ces yuav ua rau sawvdaws sib cav thiab txajmuag. Hais txog seem zoo, Vajntxwv Xalumoos txhawb txhua tus lub zog tias cia li “ua siab dawb” lossis “hlub” cov neeg uas muaj lub siab dawbhuv, paub sib hlub, ncaj ncees thiab nyob sib haum nrog txhua tus, thiab hais lus mos muag rau lawv (nqe 11).
Tus uas sau tsab ntawv Yakaunpaus hais rau Vajtswv cov menyuam ib leeg ua rau ib leeg los ntawm txojkev txawj ntse Vajtswv pub: “Yog muaj kev sib ntxub thiabmuaj neeg ntshaw ua tus hlob, yeej yuav muaj kev kub ntxhov thiab yuav muaj ntau yam kev phem. Tiamsis lub tswvyim uas los saum ntuj los yog lub uas zoo kawg nkaus. Lub tswvyim ntawd tsis ntau ncauj, paub cai, hais lus zoo, nrog luag ua phoojywg, hlub lwm tus, muab siab rau ua haujlwm zoo, tsis xaiv leejtwg ntsejmuag thiab tsis zais siab.” (Yakaunpaus 3:16-17). Peb txhua tus cia li ua tib zoo ua raws li tus Tswv Txojlus qhia, rau qhov hauv peb cov, txij tus thawjcoj mus rau cov ntseeg, tus neeg twg kuj muaj peevxwm ua tau neeg khavtheeb yog hais tias peb coj lub siab qub thiab khav txiv. Tswv Yexus zaj lus qhia saum roob: “Cov uas ua rau neeg nyob sib haumxeeb, cov ntawd tau koob hmoov; Vajtswv yuav hu lawv hais tias, lawv yog Vajtswv cov menyuam!” (Mathais 5:9). Cia siab tias txhua tus nyob hauv peb cov thiab Pawg Ntseeg koom ua ib lub siab, sib hlub, nyob sib haum, ua neej dawbhuv thiab hais lus mos muag kom txhim kho tau Pawg Ntseeg, ua rau Vajtswv tau ntsejmuag thiab coj tau neeg los ntseeg.
Thov Vajtswv,
Vajtswv, thov Koj pab kom nyuam yaus muaj lub siab hlub, txo hwjchim, ua kom nyob sib haum hauv Pawg Ntseeg. Thov Koj pab kom nyuam yaus txo hwjchim mloog lwm tus tej lus ntuas, hloov kev ua neej tshiab raws li tus Tswv nyiam, nyob hauv sawvdaws thiab ua rau Vajtswv tau ntsejmuag. Nyuam yaus tuav Tswv Yexus lub npe thov, Amees.
Peb puas mob siab txog qhov ua kom nyob sib haum hauv peb cov thiab hauv Pawg Ntseeg?
Nyeem Vajluskub hauv peb lub xyoo: Yausuas 9
Kênh Youtube BHKTHN:
