Klei Aê Diê Blŭ: II Klei Yăl Dliê 8:12-16
Êlan kliăng: “Snăn sang Yêhôwa leh leh” (II Klei Yăl Dliê 8:16b).
Klei êmuh ksiêm mĭn: Ya mnơ̆ng Mtao Y‑Salômôn myơr kơ Aê Diê ti knưl ñu rŭ mdơ̆ng leh? Si ngă knuih ñu mâo hŏng klei myơr hlăm Sang Yang? Ya ngă tinei lŏ mñă wĭt bruă rŭ mdơ̆ng Sang Yang leh leh? Ya bruă drei ngă leh thâo asei mlei pô jing Sang kơ Yang Mngăt Jăk?
Trăn Klei Aê Diê Blŭ hruê anei brei ƀuh dŭm klei gĭr ktưn mơ̆ng Mtao Y‑Salômôn hlăm bruă mkŏ dăp klei kkuh mpŭ ti Sang Yang. Ñu dlăng myuôm snăk bruă myơr mnơ̆ng ngă yang. Ñu myơr leh mnơ̆ng myơr čuh kơ Yêhôwa Aê Diê ti knưl ngă yang ñu rŭ mdơ̆ng leh ti anăp ƀăng mŭt Sang Yang. Ñu amâo lăm lui ôh ya klei myơr mnơ̆ng ngă yang hlăm Sang Yang wăt tơdah anăn jing klei ngă yang aguah leh anăn tlam grăp hruê amâodah hlăm dŭm hruê Saƀat, hruê sa grăp mlan leh anăn hlăm tlâo knăm prŏng grăp thŭn. Djăp klei kkuh mpŭ kơ Aê Diê hlăm Sang Yang mâo Mtao Y‑Salômôn dăp bi jăk grăp hruê leh anăn nanao hlăm thŭn.
Hlăm êlan 16b ăt lač kơ Sang Yang bi leh rŭ mdơ̆ng, “Snăn sang Yêhôwa leh leh”. Ƀiădah boh sĭt, anei jing tal dua hdruôm hră II Klei Yăl Dliê lač kơ bruă bi leh rŭ mdơ̆ng Sang Yang. Tal sa jing hlăm II Klei Yăl Dliê 7:11 “Snăn Y‑Salômôn bi ruê̆ leh bruă sang Yêhôwa leh anăn bruă sang mtao” leh ñu bi leh bruă rŭ mdơ̆ng Sang Yang hŏng bruă mprăp dŭm kdrăp mnơ̆ng hlăm lam leh anăn leh ngă klei myơr prŏng yuôm bhăn. Klei anăn brei ƀuh bruă mkŏ mjing Sang Yang knŏng dưi dlăng jing bi leh jăk leh anăn kluôm ênŭm leh Mtao Y‑Salômôn mkŏ dăp djăp mta bruă kơ klei kkuh mpŭ hlăm Sang Yang. Sang jing čiăng êdei čiăng mkŏ mjing sa boh Sang Yang ƀiădah sang anăn knŏng klă sĭt jing Sang Yang tơdah mâo klei kkuh mpŭ bi mni kơ Aê Diê.
Leh tŭ mă tŭ Krist jing Khua Yang kơ klei hdĭp pô, asei mlei drei jing Sang kkuh mpŭ kơ Yang mngăt Jăk (I Kôrantô 6:19). Khădah snăn, tơdah drei kƀah klei kkuh mpŭ, amâo myơr ôh kơ Aê Diê dŭm mnơ̆ng myơr hlăm grăp hruê, grăp hruê kăm, grăp mlan, grăp thŭn… nanao đrông hlăm jih klei hdĭp pô snăn asei mlei drei ăt ka jing Sang kkuh mpŭ djŏ ôh. Khua ƀĭng kna Y‑Pôl mtô kơ phung đăo: “myơr bĕ asei mlei diih jing mnơ̆ng ngă yang hdĭp, doh jăk, bi mơak kơ Aê Diê. Klei anăn jing klei kkuh mpŭ djŏ kơ Aê Diê…” (Rôm 12:1). Hruê anei, drei amâo myơr ôh mnơ̆ng myơr čuh ƀiădah hlăm Sang kkuh mpŭ mrâo anei kơ Yang Mngăt Jăk, brei drei myơr klei yuôm bhăn hĭn, bi mơak kơ Aê Diê hĭn, jing klei hdĭp pô kơ Aê Diê nanao grăp hruê. Hlăm knăm juh drei myơr drei pô kơ klei kkuh mpŭ leh anăn mă bruă kơ Aê Diê; dŭm hruê hlăm hruê kăm, drei myơr kơ Aê Diê drei pô hŏng klei hdĭp bi mơak kơ Aê Diê hlăm sang pô leh anăn anôk mă bruă. Anăn jing klei kkuh mpŭ djŏ Aê Diê čiăng. Klei kkuh mpŭ mơ̆ng Sang Yang đưm dih ăt jing pŏk rup kơ klei kkuh mpŭ jăk siam hĭn ară anei.
Drei myơr mơ̆ “mnơ̆ng myơr hdĭp leh anăn doh” kơ Aê Diê hlăm grăp hruê?
Wah lač: Ơ Khua Yang, akâo kơ Ih đru kâo myơr kơ Aê Diê klei hdĭp kâo hlăm klei kkuh mpŭ, mă bruă kơ Aê Diê leh anăn hlăm klei blŭ tlao nao hriê, dôk dơ̆ng ƀơ̆ng huă grăp hruê msĕ si sa mta mnơ̆ng myơr bi mơak kơ Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 23:28 – 24:20
Kênh Youtube BHKTHN:
