2 Xwmtxheej Vajntxwv 8:12-16
12 Xalumoos muab khoom hlawv rau saum lub thaj uas nws ua rau ntawm hauv ntej lub Tuamtsev fij rau tus Tswv. 13 Nws muab khoom hlawv fij raws li Txoj Kevcai uas Mauxes sau tseg hais txog tej hnub so li no: Hnub Xanpataus, Hnub ua Kevcai Hli Xiab, Hnub ua Kevcai Noj Ncuav Tsis Xyaw Keeb, Hnub ua Kevcai Sau Qoobloo thiab Hnub Kevcai Nyob Tsev Pheebsuab uas yuav tsum tau niaj xyoo ua. 14 Nws ua raws li txojkev tswjhwm uas nws txiv Daviv tau hais tseg lawm, nws faib haujlwm rau cov povthawj, thiab cov Levis uas yog cov hu nkauj thiab pab cov povthawj ua haujlwm txhua hnub. Nws muab cov uas zov lub Tuamtsev faib ua tej pab ua lawv tej haujlwm ntawm roojvag txhua hnub raws li Daviv uas yog Vajtswv tus neeg tau hais tseg lawm. 15 Thiab lawv ua txhua yam raws li Daviv tej lus uas nws hais rau cov povthawj thiab cov Levis txog tej tsev rau khoom thiab lwm yam huv tibsi. 16 Txhua yam uas Xalumoos ua puavleej tiav tas rau lub sijhawm no, tsis hais thaum pib ua tus Tswv lub Tuamtsev thiab tej khoom siv hauv lub Tuamtsev.
Nqi cim:
“Txhua yam uas Xalumoos ua puavleej tiav tas rau lub sijhawm no, tsis hais thaum pib ua tus Tswv lub Tuamtsev thiab tej khoom siv hauv lub Tuamtsev.” (2 Xwmtxheej Vajntxwv 8:16).
Lus nug rau sawvdaws xav:
- Vajntxwv Xalumoos muab dabtsi fij rau Vajtswv hauv lub Tuamtsev?
- Xalumoos muaj tus cwjpwm li cas thaum fij khoom rau Vajtswv hauv lub Tuamtsev?
- Vim li cas ntu Vajluskub no rov qab hais txog kev ua lub Tuamtsev dua?
- Thaum paub hais tias yus lub cev yog Vaj Ntsujplig lub tuamtsev lawm peb yuav ua licas?
Ntu Vajluskub hnub no qhia paub Xalumoos rau siab ntso npaj kev pehawm Vajtswv nyob hauv lub Tuamtsev. Xalumoos saib qhov uas muab khoom fij rau Vajtswv tseemceeb heev, nws ua kevcai hlawv khoom fij rau tus Tswv saum lub thaj ntawm hauv ntej lub Tuamtsev. Nws ua txhua yam kevcai fij khoom hauv lub Tuamtsev tsis hais thaum sawv ntxov thiab tsaus ntuj, lossis tej hnub so xws li: Hnub
Xanpataus, Hnub ua Kevcai Hli Xiab, Hnub ua Kevcai Noj Ncuav Tsis Xyaw Keeb, Hnub ua Kevcai Sau Qoobloo thiab Hnub Kevcai Nyob Tsev Pheebsuab uas yuav tsum niaj xyoo ua. Vajntxwv Xalumoos ua tib zoo teeb kev pehawm Vajtswv hauv lub Tuamtsev rau txhua hnub thiab txhua lub xyoo kom zoo.
Hauv nqi 16 hais txog ua tiav lub Tuamtsev, “Txhua yam uas Xalumoos ua puavleej tiav tas rau lub sijhawm no, tsis hais thaum pib ua tus Tswv lub Tuamtsev thiab tej khoom siv hauv lub Tuamtsev”. Qhov tseeb tiag, zaum no yog zaum tim ob uas phau ntawv 2 Xwmtxheej Vajntxwv hais txog kev uas ua tiav lub Tuamtsev. Zaum tim ib yog nyob hauv 2 Xwmtxheej Vajntxwv 7:11: “Vajntxwv Xalumoos ua lub Tuamtsev, lub loog thiab txhua yam uas nws npaj siab ua tiav tas lawm”, thaum ua tiav lub Tuamtsev nrog rau txhua yam nyob hauv ces Xalumoos ua kevcai fij lub Tuamtsev rau Vajtswv. Qhov no qhia paub hais tias tes haujlwm ua lub Tuamtsev tiav tagnrho thiab txaus txhua yam rau thaum Xalumoos teeb muaj txhua yam kev pehawm nyob rau hauv lub Tuamtsev. Lub tsev yog kev cheemtsum ua, tiamsis lub tsev ntawd yuav tsheej ib lub Tuamtsev tiag yog thaum muaj kev pehawm Vajtswv nyob hauv xwb.
Thaum txais yuav Yexus Khetos los ua yus tus Tswv Cawmseej, ces peb lub cev dhau los ua Vaj Ntsujplig lub Tuamtsev (1 Kauleethaus 6:19). Tiamsis yog peb tsis muaj kev pehawm Vajtswv, tsis muab yus lub neej ua qhov chaw fij khoom rau tus Tswv txhua hnub, txhua lub limtiam, txhua lub hlis, txhua xyoo… ces peb lub cev yeej tsis tau yog ib lub Tuamtsev rau Vajtswv tiag tiag. Timthawj Paulus qhia kom cov ntseeg Yexus yuav tsum “muab nej lub cev fij rau Vajtswv kom dawbhuv thiab haum Vajtswv siab. Yog nej ua li ntawd, thiaj yog nej pehawm Vajtswv raws li Vajtswv siab nyiam” (Loos 12:1). Nimno, peb tsis tua tsiaj hlawv fij rau Vajtswv lawm, tiamsis lub Tuamtsev tshiab uas Vaj Ntsujplig nyob no, peb yuav tsum fij yam uas muaj nqis tshaj plaws, haum Vajtswv siab uas yog fij peb lub neej pub rau tus Tswv txhua hnub. Hnub kaj fij peb tus kheej los pehawm Vajtswv thiab ua nws tes haujlwm; txhua hnub hauv lub limtiam, fij peb tus kheej rau Vajtswv los ntawm qhov uas peb ua neej haum nws siab nyob hauv peb tsevneeg thiab qhov chaw peb ua haujlwm. Ua li no thiaj yog peb pehawm Vajtswv raws li nws siab nyiam. Txojkev pehawm hauv lub Tuamtsev thaum ub kuj yog tus qauv ntawm txojkev pehawm uas zoo ntawm cov ntseeg Yexus lub neej niaj hnub nimno thiab.
Peb lub cev puas yog lub “dawbhuv thiab haum Vajtswv siab” uas peb muab fij rau nws txhua hnub?
Thov Vajtswv:
Vajtswv, nyuam yaus txaus siab muab lub neej no fij pub rau koj los ntawm kev pehawm, ua koj tes haujlwm thiab ua neej raws li koj lub siab nyiam txhua hnub. Ameeg.
Email: kawmvajluskubtxhuahnub@gmail.com
Kênh Youtube BHKTHN:
