Klei Aê Diê Blŭ: Klei Mphŭn Dơ̆ng 4:25-26
Êlan kliăng: “Y-Set mâo mơh anak êkei leh anăn ñu bi anăn gơ̆ Y-Ênôs. Mơ̆ng ênuk anăn phung mnuih dơ̆ng iêô wah lač kơ anăn Khua Yang” (Klei Mphŭn Dơ̆ng 4:26)
Klei êmuh ksiêm mĭn: Klei Y-Ađam leh anăn H’Êwơ kkiêng kơ Y-Set ya klei yuôm mâo? Ti anôk mdê phung anak čô Y-Set hŏng phung anak čô Y-Kain? Hruê anei, si klei mĭn “phung anak čô Y-Kain” bi êdah?
Tơdah Y-Ađam, H’Êwơ ngă soh leh anăn tŭ klei bi kmhal, Aê Diê brei kơ digơ̆ sa klei čang hmăng kyuadah Ñu ƀuăn anak čô mniê srăng juă bi êka boh kŏ ala leh anăn dưi hŏng Satan (Klei Mphŭn Dơ̆ng 3:15). Sĭt nik, tơdah kkiêng kơ Y-Kain leh anăn Y-Aƀel digơ̆ hơ̆k mơak snăk kyuadah digơ̆ dôk čang guôn klei ƀuăn anăn dưi bi sĭt. Ƀiădah jih jang klei truh bŏ hŏng klei ênguôt. Anak khua bi mdjiê hĕ adei ñu pô. Y-Aƀel djiê leh, bi Y-Kain jing pô bi mdjiê mnuih si ngă ñu dưi mâo klei dưi hŏng Satan? Hlăm klei truh msĕ si luč jih klei čang hmăng anăn, Y-Ađam leh anăn H’Êwơ mă tŭ klei pap Aê Diê tơdah digơ̆ lŏ kkiêng kơ sa čô anak êkei mkăn. Digơ̆ thâo săng klă anei jing klei pap Aê Diê kyuanăn digơ̆ bi anăn kơ anak anăn jing Y-Set, lŏ mblang jing “klei Aê Diê brei” msĕ si klei H’Êwơ lač leh snei: “Aê Diê brei kơ kâo leh sa čô anak êkei mkăn hrô Y-Aƀel, pô Y-Kain bi mdjiê leh” (êlan 25). Klei kkiêng kơ Y-Set amâo djŏ jing knŏng lŏ mâo sa čô anak êkei mkăn ôh ƀiădah jing klei ƀuh klei pap Aê Diê hlăm klei hdĭp digơ̆ leh anăn digơ̆ lŏ ƀuh klei čang hmăng hlăm klei truh msĕ si luč jih klei čang hmăng.
Klei Aê Diê Blŭ čih “Y-Set mâo mơh anak êkei leh anăn ñu bi anăn gơ̆ Y-Ênôs. Mơ̆ng ênuk anăn phung mnuih dơ̆ng iêô wah lač kơ anăn Khua Yang” (êlan 26). Boh blŭ “iêô wah lač” hlăm klei blŭ phŭn lŏ mblang jing hưn. Phung anak čô Y-Set jing phung găp djuê duah Khua Yang, hưn Anăn Khua Yang. Êjai phung anak čô Y-Kain mĭn kơ klei mkŏ mjing čiăng bi mđĭ kyar klei dhar kreh, tia mjing mnơ̆ng yua kơ klei hdĭp ƀiădah klei hdĭp amâo mâo klei kpă ênô ôh, snăn phung anak čô Y-Set jing phung duah Khua Yang. Kyuanăn yơh klei čang hmăng kơ klei sa čô mnuih kkiêng mơ̆ng phung anak čô mniê leh anăn dưi hŏng Satan amâo srăng tloh kdriêl ôh. Aê Diê jing Pô sĭt suôr.
Hruê anei, drei ƀuh klei mĭn “phung anak čô Y-Kain” lu snăk hlăm lăn ala anei. Klei dhar kreh mnuih ƀrư̆ hruê ƀrư̆ đĭ kyar hĭn, leh anăn knhâo mbruă hĭn nanao, ƀiădah klei kpă ênô hroh trŭn nanao amâo mdei ôh. Mnuih ngă tui si klei kđeh pô tluh leh anăn knŏng čiăng bi mđĭ pô đuč. Hlăm klei truh mmăt tĭt anăn, Khua Yang ăt sĭt suôr. Kyua klei Ñu pap, Ñu ruah leh anăn dưm Phung Sang Aê Diê, jing phung Ñu bi tui leh hŏng êrah Yêsu Krist, brei iêô wah lač, mpŭ mni leh anăn hưn Anăn Ñu kơ lăn ala.
Drei ƀuh kơ drei dôk hdĭp tui si klei mĭn phung anak čô Y-Kain hĕ amâodah phung anak čô Y-Set, sa phung găp djuê duah Khua Yang?
Wah lač: Ơ Khua Yang, kâo bi mni kơ Ih kyuadah hŏng klei Ih pap Ih brei kâo jing anak Ih, jing anak čô klei ƀuăn leh anăn jing phung găp djuê iêo wah lač leh anăn mpŭ mni kơ Anăn Ih. Đru kâo hdĭp djŏ hŏng klei jing anak klei pap čiăng kơ hŏng klei hdĭp kâo, Anăn Ih mâo klei guh kơang, Ƀuôn Ala Mtao Ih mâo lu mnuih duah. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êskiêl 14-15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
