Chivkeeb 4:25-26
Nqe cim:
“Xej muaj ib tug tub, thiab Xej muab tis npe hu ua Enauses. Txij thaum ntawd los neeg txawm pib tuav tus Tswv lub npe pehawm tus Tswv” (Chivkeeb 4:26)
Lus nug xav:
– Qhov uas Adas thiab Evas yug Xej muaj lub ntsiab zoo li cas?
– Muaj yam dabtsi tsis sib thooj ntawm Xej thiab Ka-ees cajces?
– Nimno, lub siab hais txog “Ka-ees cajces” qhia tshwm li cas?
Thaum Adas, Evas ua txhaum thiab raug txim, nkawd tau Vajtswv pub kev cia siab yog Nws coglus yuav cia tus pojniam cajces tsuj nab lub taubhau, kovyeej Xatas (Chivkeeb 3:15). Yog li thaum uas yug tau ob tug tub uas yog Ka-ees thiab Anpees nkawd, Adas nkawd zoo siab thiab tos rawv cov lus cog tseg ntawd tiav. Tiamsis tej ntawd tshwmsim mob siab kawg nkaus, tus tub hlob muab nws tus kwv tua povtseg. Ka-ees raug suav hais tias yog tus uas tua neeg, yuav ua li cas kovyeej Xatas? Nyob rau lub tsamthawj tas kev cia siab no, Adas, Evas thiaj tau saj Vajtswv txoj koob hmoov hlub uas yog nkawd rov muaj dua ib tug tub. Nkawd zeem paub tias nov yog Vajtswv txoj koob hmoov hlub, yog li nkawd tis npe rau tus metub hu ua Xej, lub npe no txhais tau tias “pub rau” raws li Evas lo lus hais: “Vajtswv pub kuv muaj dua ib tug tub los sawv Anpees, tus uas Ka-ees muab tua lawm chaw.” (nqe 25). Qhov uas Xej yug los tsis yog muaj dua ib tug tub xwb tiamsis yog Vajtswv txojkev hlub pub rau thiab ua kom muaj kev cia siab thaum tas kev cia siab.
Vajtswv Txojlus qhia tias “Xej muaj ib tug tub, thiab Xej muab tis npe hu ua Enauses. Txij thaum ntawd los neeg txawm pib tuav tus Tswv lub npe pehawm tus Tswv” (nqe 26). Lo lus “tuav tus Tswv lub npe” raws li hauvpaus lus Henplais hais muaj lub ntsiab tias tshaj tawm. Xej cajces yog cajces uas nrhiav tus Tswv, tshaj qhia Vajtswv lub npe. Ka-ees cajces ces rau siab ntso ua kom vammeej, ua kom muaj yam ub yam no ntau tiamsis tsis ua zoo, Xej cajces ces nrhiav tus Tswv. Yog li, qhov kev cia siab rau cajces ntawm tus pojniam thiab kev kovyeej Xatas lub hwjchim yuav poob mus. Vajtswv yog tus uas hais li cas Nws ua li ntawd.
Nimno, peb pom lub siab zoo li “Ka-ees cajces” ua, lub neej vammeej. Tibneeg txojkev ua neej yim vammeej, yim nce siab ces qhov kev ua zoo poob qis. Tej neeg sawvdaws caum tej kev nyiam ntawm tus kheej thiab xav kom tau qhuas. Nyob rau lub tsamthawj tsaus ntuj nti no, Vajtswv kuj ua raws li Nws hais. Vim txoj koob hmoov, Vajtswv xaiv thiab cia Pawg Ntseeg uas yog cov neeg tau cawm dim hauv Tswv Yexus cov ntshav los thov thiab qhuas, qhia Nws lub npe rau neeg ntiajteb.
Thov Vajtswv,
Vajtswv, nyuam yaus ua tsaug vim txojkev hlub Koj pub tau los ua Koj menyuam, yog cajces ntawm tej lus cogtseg, cajces nrhiav thiab qhuas Vajtswv. Thov pab kom nyuam yaus paub ua neej raws li txoj koob hmoov tawm hauv kev ua neej. Koj lub npe thiaj tau qhuas, Koj lub tebchaws nthuav dav. Nyuam yaus tuav Tswv Yexus lub npe thov, Amees.
Peb pom yus tabtom ua neej muaj lub siab ua raws li Ka-ees cajcees los yog ua raws li Xej cajces nrhiav tus Tswv?
Nyeem Vajluskub hauv peb lub xyoos: Exekees 14-15
Kênh Youtube BHKTHN:
