Tĭt 1:15-16
Trong tơm: “Bơngai bu đei đon ‘lơ̆ng tơpăt, sư huay kơ tơchĕng kơ tơdrong giĕng ôh yua kơ sư pơm tôm tơdrong ‘lơ̆ng tơpăt ngăl…” (Tĭt 1:15a)
Nơ̆r jet tơchĕng pơwao:
– Pơm thoi yơ wă kơ đei tơdrong arih rơgoh ‘lơ̆ng?
– Lăng lăm tơdrong kiơ gơh băt tơdrong kiơ mơgrĭ ‘mê̆ dah tơdrong kiơ rơgoh ‘lơ̆ng?
– Lu bơ̆n kăl kơ pơm thoi yơ wă kơ tơdrong arih rơgoh ‘lơ̆ng đơ̆ng đon tơchĕng truh lăm jơhngơ̆m?
Pôl ơei tơblang gah tơdrong rơgoh ‘lơ̆ng păng mơgrĭ ‘mê̆. Nơ̆r “ mơgrĭ ‘mê̆” wă tơ’bôh gah bơngai kơnê̆, hiong răm, ưh kơ chu lui. Tơdrong mă sư oei ră roi bơtho kơ tơdrong arih khul bơngai lui rơgoh ‘lơ̆ng, minh tơdrong noh đĕch đon lui gơnang kơ pham Kră Yang Yêsu Krist ưh kơ đơ̆ng tơdrong jang kĕ gơ̆t mă đơ̆ng Kră Yang pơjing tôm tơdrong ‘lơ̆ng. Mă-lei hăm lu bơngai bơtho hơlĕnh, lu sư yua iŏk anăn khan bơngai lui, ưh kơ lui kơ Kră Yang tơpă mă khan sư kĕ gơ̆t, arih pơgŏ pơđep akâu kơdih, kư̆m ưh kơ gơh pơm ăn kơ lu sư rơgoh ‘lơ̆ng. ‘lơ̆ng rơgoh ‘bơ̆t năp Kră Yang ‘Bok Kei-Dei. bơngai ‘noh mă sư kiơ̆ tơdrong giĕng mă ưh, sư ưh kơ đei layơ pơm tơdrong ‘lơ̆ng, kơlih kơ đon sư lơ kơnê̆ tơpă (trong 15).
Tơdrong jang lăng wă kơ băt tơdrong kiơ mơgrĭ ‘mê̆ dah rơgoh ‘lơ̆ng đơ̆ng lăm tơdrong arih bơngai mă lăng tơdrong noh, yua kơ đơ̆ng blŭng a “Tôm tơdrong ‘Bok Kei-Dei pơjing ‘lơ̆ng ngăl, bơ̆n gơh sa đĭ đăng, mă-lei bơ̆n athei krao khan bơnê kơ ‘Bok Kei-Dei ‘mơ̆i.” (I Timôthê 4: 4). Tơdrong yoch mơ̆t bơih lăm teh đak mă-lei Kră Yang Yêsu ‘mong ăn keh bơih kơpal ‘long pơglang. Wă kơ băt bơngai bu rơgoh ‘lơ̆ng dah mơgrĭ ‘mê̆ lu bơ̆n ưh kơ lăng gah ‘nguaih đĕch. “ kon bơngai lăng gah ‘nguaih; mă-lei Kră Yang lăng ‘bôh lăm jơhngơ̆m” (ISamuel 16: 7). Lu bơngai đơ̆ng lăm jơhngơ̆m ưh kơ rơgoh ‘lơ̆ng bơngai noh đei pơtrut đơ̆ng lăm tơdrong kơnê̆… ngăl Adrin pơm gah ‘nguaih nhen ‘lơ̆ng rơgoh gah ‘nguaih, khan sư kơdih hlôh băt gah Kră Yang, pơma lăm nơ̆r Kră Yang nhen trŏ, pơjing tơdrong kiơ kiơ̆ kơdih wă, sư khan tơdrong noh rơgoh ‘lơ̆ng, tơdrong to kơnê̆ ‘mê̆ ‘mach, mă-lei yua kơ đon tơchĕng păng lăm jơhngơ̆m sư rai răm ‘bơ̆t anăp Kră Yang, sư noh bơngai pơm pơ rŏ gah ‘nguaih đech. “ sư khan sư lui kơ ‘Bok Kei-Dei boih mă-lei sư ưh kơ kiơ̆ tơdrong ‘Bok Kei-Dei wă. Đon lu sư thoi noh, bơ̆n băt lu sư tam mă lui tơpă. ‘Bok Kei-Dei ưh kơ lăp đon kơ tơdrong lu sư pơm ôh. Lu sư bơngai kơnê̆ krưp ưh kơ chu. Lu sư ưh kơ đei pơm minh tơdrong kiơ ‘lơ̆ng thoi yơ” (trong 16).
Thoi noh, wă kơ đei tơdrong arih rơgoh ‘lơ̆ng kiơ̆ trŏ thoi tơdrong hơgăt đơ̆ng ‘Bok Kei-Dei, rim ‘nu kăl kơ băt păng đơ̆ng lăm jơhngơ̆m lui sơng iŏk Kră Yang Yêsu tơpă, pham ‘Bok Krist ưh kơ đei yoch gô chhut đĭ tơdrong yoch lu bơ̆n. athei đei măt păng đon tơchĕng ‘lơ̆ng rơgoh lăng tôm tơdrong lăm tơdrong ‘lơ̆ng rơgoh păng băt bơnê kơ Kră Yang. Mă-lei, khul bơngai lui ưh kơ gơh yua iŏk tơdrong rơngei wă druh kiơ̆ kơ sĕch akar kơdih wă, mă “ Bơ̆n athei pơm mă ‘lơ̆ng thoi bơngai jang kơ’năr, ‘nĕ pă et sik suai hli kơ pơm kư̆ kă; drŏ-nglo drŏ-kăn kư̆m ‘nĕ kơ ngôi kư̆ kă; ‘nĕ pơjah pơjăng păng đe, ‘nĕ kơ ‘nhĕng đe” (Rôm 13: 13). Dah tơ’bơ̆p hăm “ Dah tơdrong glăi iĕm săi tŭk.” (ITêsalônik 5: 22).
Lu bơ̆n pơkă arih thoi yơ wă kơ rơgoh ‘lơ̆ng truh năr tơ’bơ̆p Kră Yang?
Kơkuh kơ Ih ơ Kră Yang, apĭnh ih tơgŭm inh hlôh băt păng lui kơ Ih tơpă. Hơpơi apĭnh Kră Yang tơgŭm inh gơh iŏk păng băt bơnê kơ ih lăm tôm tơdrong đơ̆ng Ih ăn. Apĭnh Yang Bơhngol ‘Lơ̆ng ăn thim jơhngơ̆m pran wă kơ inh bơwei đon lui păng đei tơdrong arih rơgoh ‘lơ̆ng wă kơ Ih lăp đon yưa anăn Kră Yang Yêsu Krist, Amen.
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 28
Kênh Youtube BHKTHN:
