Tơdrong Pơđơ̆k 27:3-4
“Tơmo trăp, chuơh kư̆m trăp, Mă-lei đei pơdrŭt lu bơngai kơtul kơwao noh trăp hloh kơ ‘bar noh.” (Tơdrong Pơđơ̆k 27:3)
Nơ̆r jet tơchĕng pơwao:
– Tơdrong kiơ trăp hloh kơ tơmo păng chuơh?
– Pŭ trăp gah lăm jơhngơ̆m đei ‘bơm thoi yơ hăm lu bơ̆n?
– Pơm thoi yơ wă kơ wei rong tơdrong băt bơnê păng lăp jơhngơ̆m wă kơ kĕ jei đơ̆ng dôm tơdrong trăp lăm chăl arih?
Bơngai chih hla bơar Tơdrong Pơđơ̆k tơweh kơ minh pôm rup pŭ trăp lăm jơhngơ̆m. Mă bu bu đei tơchĕng kơ tơmo păng chuơh trăp thoi yơ. Mă khan lei ră, nơ̆r Kră Yang tơ’blŏk kơ lu bơ̆n kư̆m đei lu tơdrong nai trăp hloh dơ̆ng, noh tơdrong ơh blĕk, tơdrong hil mĭl, đei ơh klaih lăm jơhngơ̆m.
Nơ̆r pơma kơ “Tơdrong blĕk klai lu bơngai kơtul kơwao” đei roi tơ’bôh tơdrong ơh blĕk dêh, blĕk klai lu bơngai kơtul kơwao kơplah đei bơngai che bơle, tơdrong blĕk ưh kơ đei kĕ ĕnh gơ̆t kơtĭt trăp lăm jơhngơ̆m, pơm kơ bơngai kơtul kơwao ưh kơ đei kĕ chơ̆n păng pơm tơwih kiơ̆ kơ jơhngơ̆m blĕk “Tơdrong ơh blĕk” lăm nơ̆r Grĕk wă khan lăm jơhngơ̆m iung hloi tơ’bôh gô lĕch nơ̆r pơma păng pơm hloi ưh kơ đei tơchĕng kiơ păng năm tơ anăp tơ teh băl hloi tuch luch kơnh jing hmach. “Tơdrong hil mĭl” dah mă “Hil trăp tơpă” pơma jăng ‘biơ̆, ‘noh wă khan tơdrong ơh blĕk tơtŏ thoi ŭnh lăm đon tơchĕng păng pơm kơ bơngai nai ơh sơ’ngon, lăm ‘bar tơdrong noh “Ơh blĕk” păng “Hil mĭl” tă kơ pơrăm lu tơdrong tơ’bưh dih băl păng pơm kơ jơhngơ̆m bơngai ‘noh jing blĕ tơpă.
Mălei, nơ̆r Kră Yang pơma jrŭ hloh dơ̆ng: “Bu kĕ dơ̆ng ‘bơ̆t anăp tơdrong hil gar”? ‘Nâu bơih tơdrong trăp jrŭ hlơp hloh. Jơhngơ̆m “gar areh” lăm nơr Grĕk wă khan “tơtŏ jơhngơ̆m yua kơ ‘nhĕng gar” Sư ưh kơ đei hrơ̆ng hreng thoi khĕnh hơwĕng, mălei sư sa gah lăm. ‘Nhĕng gar pơm kơ bơ̆n ‘bônh kơ pơting khan bu hloh ‘biơ̆ kơ bu pơthi pơjei băl păng blĕk dêh mưh ‘bôh đe hloh kơ bơ̆n. Bơngai juăt kơ blĕk klai ưh kơ đei layơ chơt hiôk kơ dôm pŭn hiôk ‘nhŏng oh bơ̆n păng pơm ưh kơ hơdah gah tơdrong hiôk ‘lơ̆ng Kră Yang. Nơ̆r Kră Yang tơbăt: “Jơhngơ̆m hiôk-hian tơkan ba tơdrong arih kơ akâu jăn. Mă-lei areh hơrĕnh pơm kơting tĕnh kơ bŭk.” (Pơđơ̆k 14:30) Areh hơhrĕnh nhen thoi tơdrong jĭ sa lăm đunh khei sơnăm, ding bŭk lăm jơhngơ̆m dah bơ̆n ưh kơ pơjao ăn kơ Kră Yang wă kơ gơh klaih.
Dôm tơdrong trăp tih hloh lăm chăl arih bơ̆n ưh kơ trŏ tơmam ôh, mălei lăm jơhngơ̆m păng tơdrong mơn. Tơmo bơ̆n gơh tung, chuơh bơ̆n gơh tŏng, mălei jơhngơ̆m gar areh arĕnh gô thoi tơmam trăp kơtĭt hơnơ̆ng ding truh bơ̆n năm dan ‘bơ̆t anăp Kră Yang. Kră Yang Yêsu khan: “Ơ lu bơngai mă oei pŭ trăp, năm tơ Inh bĕ, lê̆ Inh tơgŭm iĕm pŭ hơiơch.” (Mathiơ 11:28). Lăm Kră Yang đĕch, lu bơ̆n chă ‘bôh jơhngơ̆m rơhơi, kơplah bơ̆n pơyơ̆r jơhngơ̆m trăp kơ Kră Yang. Kră Yang gô tơplih tơdrong noh hăm tơdrong ‘mêm Sư. Jơhngơ̆m kĕ chơ̆n păng băt bơnê. Bơngai hơgei gô pơhrăm iŏk tơl tơwih hăm nơ̆r krao khan, păng chơt hiôk kơplah bơngai nai đei tơdrong pŭn. Jơ noh jơhngơ̆m bơ̆n hơđơ̆ng, jơhngơ̆m chhơp hơiơch, ưh pă đei pŭ trăp kơ tơdrong ‘nhĕng gar păng ơh blĕk.
Ơ Kră Yang, apinh Ih tơgŭm inh hŭt lê̆ dôm tơdrong ơh klai, păng jơhngơ̆m ‘nhĕng gar lăm jơhngơ̆m. Apinh Yang Bơhngol ‘Lơ̆ng tơplih inh hăm tơdrong hiôk hơđơ̆ng, ‘mêm mơnat păng băt bơnê, wă kơ inh chơt hiôk hơdai hăm bơngai nai đei pŭn lăp đon dôm tơdrong Kră Yang ăn, krao khan yua anăn Kră Yang Yêsu Krist, Amen.
Lu bơ̆n arih hăm tơdrong ‘mêm, kĕ chơ̆n păng băt bơnê kơ Kră Yang thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Tơ’bôh 21
Kênh Youtube BHKTHN:
