Klei Aê Diê Blŭ: Klei Bi Hriêng 27:3-4
Êlan kliăng: “Boh tâo jing ktrŏ leh anăn čuah jing ktrŏ mơh, ƀiădah klei mnuih mluk ngêñ jing ktrŏ hĭn kơ jih dua” (Klei Bi Hriêng 27:3)
Klei êmuh ksiêm mĭn: Ya klei ktrŏ hĭn kơ boh tâo leh anăn čuah? Si klei ktrŏ hlăm ai tiê srăng hmăi kơ drei? Si ngă čiăng rông ba klei hdơr knga leh anăn klei hơ̆k mơak čiăng dưi hŏng klei ktrŏ hlăm klei hdĭp?
Pô čih hră Klei Bi Hriêng čih kơ sa pŏk rup klă mngač kơ klei ktrŏ hlăm ai tiê. Grăp čô thâo sơăi klei ktrŏ boh tâo leh anăn čuah. Khădah snăn, Klei Aê Diê Blŭ mñă lŏ mâo klei ktrŏ hĭn, anăn jing klei ngêñ leh anăn klei keh nač hlăm mngăt ai tiê.
Pruê̆ blŭ “klei mnuih mluk ngêñ” lač kơ klei đĭ ai ngêñ snăk mơ̆ng phung mluk tơdah arăng mčhur. Klei ngêñ kƀah klei dưi ksiêm dlăng bi ktrŏ kơ mngăt, ngă kơ phung mluk amâo dưi hơĭt ai tiê ôh leh anăn ngă bruă kƀah klei dưi ktuê dlăng hlăm ai tiê. “Klei ngêñ” hlăm klei Hêbrơ jing klei ai tiê đĭ, khăng bi êdah hŏng klei blŭ amâodah bruă ngă kƀah klei mĭn leh anăn klei ngă jhat truh êdei anăp srăng lŏ hƀlŏk.
“Klei ăl” amâodah “klei ngêñ” jing ktang hĭn, anăn jing klei đĭ ai ngêñ ktang snăk, klei mĭn amâo dưi mkhư̆ leh anăn bi êka kơ pô mkăn. Jih dua “klei ngêñ” leh anăn “klei ăl” srăng bi rai sơăi klei bi mguôp leh anăn ngă kơ ai tiê mnuih jing phĭ.
Khădah snăn, êlan Klei Aê Diê Blŭ lŏ mblang kbưi hĭn: “ƀiădah hlei pô dưi tŭ klei nač?” Anei jing klei ktrŏ êlam hgăm hĭn. Ai tiê “keh nač” hlăm klei Hêbrơ jing “hlơr ai tiê kyua nač”. Ñu amâo êdah msĕ si klei ngêñ ôh, ƀiădah hŏng klei hgăm bi rai ai tiê. Klei keh nač ngă kơ drei bi msĕ dưi hŏng amâo dưi, bi lông, leh anăn đĭ ai ngêñ tơdah ƀuh arăng hĭn kơ pô. Mnuih keh nač amâo mơak ôh hŏng klei jăk ayŏng adei, leh anăn bi hgăm hĕ klei thâo săng kơ klei jăk mơak Aê Diê brei kơ pô. Klei Aê Diê Blŭ hưn brei răng: “… klei nač jing iêng ƀơ̆ng klang” (Klei Bi Hriêng 14:30). Bi nač msĕ si sa klei ruă mâo hlăm lam, bi rai mngăt ai tiê tơdah drei amâo jao jih kơ Aê Diê čiăng dưi bi hlao.
Dŭm klei ktrŏ hĭn mơ̆ng klei hdĭp drei amâo djŏ jing mnơ̆ng ôh ƀiădah jing ai tiê leh anăn klei bi ƀuh hlăm ai tiê. Boh tâo dưi pŭ, čuah dưi mă mơh, ƀiădah ai tiê keh nač leh anăn ngêñ srăng bi ktrŏ nanao tơl drei dưm ñu ti jơ̆ng Khua Yang. Khua Yang Yêsu lač: “Hriê bĕ kơ kâo, Ơ jih jang mnuih êmăn leh anăn gui ktrŏ, leh anăn kâo srăng brei diih mdei.” (Y-Mathiơ 11:28).
Knŏng hlăm Krist, drei mâo klei êđăp ênang hlăm mngăt ai tiê. Tơdah myơr klei ktrŏ hlăm ai tiê kơ Khua Yang, Ñu hrô klei anăn hŏng klei khăp, klei gĭr leh anăn klei hdơr knga. Mnuih thâo mĭn srăng hriăm klei lŏ wĭt ngă hŏng klei mčhur hŏng klei êdu êun, hrô kơ klei ngêñ hŏng klei wah lač, leh anăn hơ̆k mơak ti anăp klei jăk mơak pô mkăn. Hlăk anăn ai tiê drei êđăp ênang, ai tiê hdjul, amâo lŏ ktrŏ kyua klei keh nač amâodah đĭ ai ngêñ ôh.
Si drei hdĭp leh hlăm klei khăp, klei gĭr leh anăn klei hdơr knga kơ Khua Yang?
Wah lač: Ơ Khua Yang, akâo kơ Ih đru kâo lui jih klei ngêñ leh anăn ai tiê nač hlăm mngăt ai tiê. Akâo Yang Mngăt Jăk mlih mrâo kâo hŏng klei êđăp ênang, klei khăp leh anăn hdơr knga, đru kâo hrăm mbĭt mơak hŏng klei jăk mơak pô mkăn leh anăn hơ̆k mơak hlăm klei jăk Aê Diê brei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Êdah 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
