Daniyees 6:1-10
Nqe cim:
“Qhov uas xaus zoo dua qhov uas pib” (Tej Lus Qhia 7:8a).
Lus nug rau sawvdaws xav:
- Ncua sijhawm hais hauv ntu Vajluskub Daniyees muaj tsawg xyoo lawm?
- Tej haujlwm Daniyees ua tau ntaus nqi licas?
- Daniyees yuav tsum muaj kev xaiv licas thaum vajntxwv sau ntawv txwv tsis pub thov lwm vajtswv?
- Daniyees ua licas thaum ntsib yam yuav tsum xaiv li ntawd?
- Yuav ua licas thiaj muaj lub siab npuab tus Tswv thiab ua Nws tes haujlwm?
Ib tsoom cov mloog txhua tus,
Thaum tseem hluas, Daniyees ua siab tawv qhawv thov zaub noj, thov dej kom ua tau neeg dawbhuv, los txog thaum hnubnyoog muaj 80 ntau xyoo nws puas tseem muaj lub siab kub lug ua neej ntseeg thiab nrog tus Tswv mus? Daniyees 6:1-10 qhia paub ncua sijhawm no Daniyees kuj tseem yog ib tug neeg muaj koob nto npe tshaj ntawm peb tus neeg uas tuav meejmom tseemceeb hauv lub vajntxwv lub tebchaws (nqe 2). Daniyees yog ib tug neeg “ua haujlwm zoo”, “muab siab npuab”, “nws tsis ua tej uas txhaum kevcai thiab tej uas tsis ncaj hlo li” (nqe 3-4). Hais mus lwm seem, Daniyees tseem tuav tau txojkev ncaj ncees thiab ua zoo los ntawm nws lub dag zog.
Tshuav sab kev ntseeg Daniyees ho zoo licas? Lub sijhawm ntev mus, cov ntseeg ib txhia tsis nco tus Tswv cov ntshav tsimtxiaj, Nws Txojlus muaj fwjchim thiab tsis txaus siab rau qee yam hauv txojkev ntseeg zuj zuj. Txawm yog li ntawd, los Daniyees yeej tseem tsis tau qaug zog thov Vajtswv, tsis yog ib hnub thov Vajtswv ib zaug xwb tiamsis yog ib hnub thov peb zaug (nqe 10). Tsis yog li ntawd xwb, thaum sawv tabmeeg ntawm txojkev xaiv thov Vajtswv yuav raug kev tuag lossis tsis thov Vajtswv kom tau ciaj ua neej, Daniyees muaj lub siab tawv qhawv qhib qhovrooj lug thov Vajtswv (nqe 10). Daniyees tsis qaug zog rau txojkev ntseeg tus Tswv, nws txaus siab hlo ua txhua yam vim txojkev ntseeg.
Nyob hauv phau Vajluskub, muaj dua ib tug neeg hnubnyoog 85 xyoos tiamsis nws kuj tsis txajmuag tuaj ntsib Yausuas: “hnub no kuv tseem muaj zog khov kho ua taus rog thiab ua taus haujlwm ib yam li thaum Mauxes txib kuv mus soj tebchaws. Nimno, thov koj muab cheebtsam uas ua laj roob rau kuv raws li tus Tswv tau coglus tseg rau kuv... Tej zaum tus Tswv yuav nrog nraim kuv, thiab kuv yuav raws tau lawv tawm ib yam li tus Tswv tau coglus tseg lawm” (Yausuas 14:11-12). Tus tub rog ntawd yog Kalej. Thaum Kalej hnubnyoog 85 xyoos, nws tseem muaj lub siab kub lug mus ntaus rog vim tus Tswv cov lus cog tseg rau nws haivneeg, thiab txaus siab hlo ntiab tej neeg uas yog lwm haivneeg khiav tawm hauv lawv lub tebchaws mus ib yam li Nws cog lus yuav pub rau lawv.
“Qhov uas xaus zoo dua qhov uas pib” (Tej Lus Qhia 7:8a). Kalej thiab Daniyees muaj txojkev ntseeg zoo thaum pib mus txog thaum xaus. Nkawd muaj lub siab tawv qhawv ua neej pub rau tus Tswv thaum tseem hluas, thiab tseem kub siab lug mus txog thaum hnubnyoog laus. Tiamsis yuav ua licas thiaj tuav tau txojkev ntseeg thaum lub ntiajteb no muaj tej kev dag ntxias ua kom peb tsis kub siab rau sab ntsujplig thiab tsis muaj kev hlub zoo li thaum chivthawj? Tej zaug yog vim ntau lub vimchiv. Txawm yog li ntawd, los yeej muaj ib yam tsis poob li yog yam uas Daniyees twb ua los lawm uas tsis vim ib yam kev khwv twg lossis lub tsamthawj zoo phem, nws muab kev thov Vajtswv tso tseg. Kev thov Vajtswv yog lub zog ntawm sab ntsujplig ua kom peb cog ruaj khov ntawm Vajtswv tus uas tsis hloov.
Thov Vajtswv,
Tus Tswv, nyuam yaus thov nrog Koj mus ibtxhis, txawm yog raug txomnyem, los nyuam yaus yuav nrog Koj mus txog hnub kawg. Muaj qee zaus nyuam yaus qaug zog los thov Koj pab kom nyuam yaus ua taus siab ntev nrog Koj mus tsis nrug li. Amees.
Ib tsoom cov mloog uas hmov thiab tshua,
Peb puas tseem kub siab lug rau tus Tswv zaj ib yam li thaum chivthawj thiab? Yam dabtsi tabtom ua kom peb txias zuj zus?
Nyeem Vajluskub hauv peb lub xyoo: Nehemis 3:20-4:14
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
