Klei Aê Diê Blŭ: Y‑Đaniel 6:1-10
Êlan kliăng: “Klei knhal tuč sa klei jing jăk hĭn kơ klei mphŭn dơ̆ng,” (Khua Pô Mtô 7:8a).
Klei êmuh ksiêm mĭn: Hlăk wưng anei, dŭm thŭn leh Y‑Đaniel mâo? Si arăng ksiêm ƀuh ñu hlăm bruă ngă? Ya klei Y‑Đaniel čuăn ruah êjai tlă anăp hŏng klei mtrŭn kăm ghă? Hŏng si knuih ñu wĭt ngă ti anăp klei truh? Si drei ngă čiăng dưi djă pioh nanao klei hur har hŏng Khua Yang leh anăn hlăm klei mă bruă kơ Ñu?
Tơdah hlăk dôk êdam, Y‑Đaniel jhŏng akâo knŏng ƀơ̆ng djam, mnăm êa ngač čiăng pioh ñu pô doh jăk, snăn ară anei tơdah jing leh sa čô aê mduôn êbeh kơ 80 thŭn si ngă Y‑Đaniel adôk djă pioh mơ̆ mngăt ai tiê hur har čiăng ăt dôk kjăp nanao hŏng Khua Yang hlăm knhuah hdĭp leh anăn klei đăo? Y‑Đaniel 6:1-10 brei ƀuh tơl truh kơ ară anei Y‑Đaniel ăt jing sa čô êdah kdlưn hĭn hlăm tlâo čô khua prŏng hĭn hlăm jih ƀuôn ala mtao (êlan 2). Arăng ksiêm ƀuh ñu “mâo klei mngăt myang hĭn”, “sĭt suôr”, “amâo dưi mâo klei kčŭt amâodah ƀuh klei wê hlăm ñu ôh” (êlan 3-4). Blŭ mdê, ñu ăt djă pioh klei kpă jăk hlăm knuih hdĭp leh anăn klei knhâo knhăk hlăm bruă mă.
Bi kơ klei đăo si ngă? Thŭn mlan găn gao, phung tui hlue Khua Yang khăng hrŏ ƀrư̆ ƀrư̆ ai tiê hur har hŏng Klei Aê Diê Blŭ wăt klei ksŭng drŭng săn asei kyua klei đăo msĕ si ênuk hlăk ai. Ƀiădah lĕ, Y‑Đaniel ăt hur har wah lač amâo djŏ knŏng grăp hruê ôh, ƀiădah grăp hruê tlâo blư̆ (êlan 10). Ñu amâo bi luč ôh ai tiê hur har hŏng Khua Yang, ăt kăp săn asei kyua klei đăo kơ Khua Yang msĕ si ênuk hlăk ai mơh.
Hlăm Klei Aê Diê Blŭ, mâo sa čô mkăn 85 thŭn leh ƀiădah ăt kăn mâo klei kĭ kơ̆ rei čŏng čuăn nao lač hŏng Y‑Yôsuê: “Hruê anei kâo ăt jing ktang mơai msĕ si hruê Y‑Môis tiŏ nao kâo;… Snăn ară anei, brei bĕ kơ kâo čư̆ anei, … Năng ai Yêhôwa srăng dôk mbĭt hŏng kâo, leh anăn kâo srăng suôt diñu tui si Yêhôwa lač leh.” (Y‑Yôsuê 14:11-12). Sa čô kahan bi blah anăn jing Y‑Kalep. Hlăm thŭn 85, ñu ăt djă pioh ai tiê bi blah jhŏng ktang kyua klei Aê Diê ƀuăn kơ phung ƀuôn sang ñu, ăt prăp hmiêt bi blah suôt phung prŏng dlông đuê̆ mơ̆ng lăn čar Aê Diê ƀuăn brei leh kơ phung ƀuôn sang Ñu.
“Klei knhal tuč sa klei jing jăk hĭn kơ klei mphŭn dơ̆ng,” (Khua Pô Mtô 7:8a). Y‑Kalep leh anăn Y‑Đaniel mâo leh klei mphŭn dơ̆ng leh anăn klei knhal tuč huĭ mpŭ. Diñu jhŏng hdĭp kơ Khua Yang êjai thŭn mlan bluh mơai ênuk hlăk ai, leh anăn diñu ăt djă pioh ai tiê hur har nanao hŏng Khua Yang hlăm thŭn mlan mduôn khua msĕ mơh. Ƀiădah si ngă čiăng kơ pui hlơr mngăt ai tiê dưi trơ̆ng nanao tơdah thŭn mlan bi êdu ai tiê hur har leh anăn klei khăp tal êlâo? Năng ai klei anăn kbiă hriê mơ̆ng lu mta klei. Ƀiădah lĕ, mâo sa mta klei sĭt nik amâo kƀah ôh Y‑Đaniel ngă leh tinei: Amâo mâo lui klei wah lač ôh thâodah ya mta klei truh dưn. Klei wah lač yơh jing phŭn klei ktang myang kă kjăp drei hŏng Aê Diê amâo mâo mgei ôh.
Si ngă drei ăt dôk hur har hŏng Khua Yang msĕ si ênuk mphŭn dơ̆ng mơ̆? Ya mta klei dôk ngă bi êăt drei?
Wah lač: Ơ Khua Yang Pô Bi Mtlaih, kâo čiăng tui hlue Ih amâo mdei ôh, wăt găn klei dleh knap, kâo ăt akâo tui hlue Khua Yang tơl tuč klei hdĭp. Wăt tơdah lu blư̆ ai tiê kâo rŭng ênguôt lu, ăt sĭt suôr tui hlue Ih amâo ktlah ôh.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y‑Nêhêmi 3:20-4:14
Kênh Youtube BHKTHN:
