Klei Aê Diê Blŭ: Klei Yap 11:1-3
Êlan kliăng: “Ngă bĕ jih jang bruă amâo blŭ dŭñ dŭñ amâodah kĭ kơ̆ ôh,” (Philip 2:14)
Klei êmuh ksiêm mĭn: Ya mta klei soh phung ƀuôn sang ngă leh? Ya klei Aê Diê ngă leh hŏng mta klei soh anei? Mơ̆ng ya klei Aê Diê mdei hĕ ai ngêñ Ñu? Ya klei hưn êlâo kơ drei brei răng kơ mta klei soh anei?
Khua pô mtô Warren W. Wiersbe čih: “Kyua mơ̆ng klei soh yơh ai tiê mnuih hung kơ wơr bĭt hĕ klei pap Khua Yang, amâo mđing uêñ ôh kơ Klei Blŭ Ñu ƀuăn leh, leh anăn tui duah klei kƀah hlăm klei Ñu mprăp”. Klei čih anei djŏ sĭt hŏng klei yăl dliê hlăm trăn Klei Aê Diê Blŭ hruê anei, hlăk phung ƀuôn sang Israel mrâo kbiă đuĕ mơ̆ng čư̆ Sinai mrâo tlâo hruê, diñu ngă soh blŭ dŭñ dŭñ hŏng Aê Diê leh yơh.
Drei amâo thâo ôh mơ̆ng ya phŭn knhal diñu blŭ dŭñ dŭñ, Klei Aê Diê Blŭ knŏng hưn snei, “tơdah Yêhôwa hmư̆ klei anăn” tơl “Ñu čuh ai ngêñ”. Boh blŭ “blŭ dŭñ dŭñ” čiăng lač kơ klei ktrŏ ai tiê, blŭ ƀuah, ur krao (Klei Čŏk Hia 3:39) leh anăn bi êdah knuih amâo mơak ai tiê, amâo thâo hdơr knga, mbĭt hŏng klei ăl krêñ. Lu mnuih mĭndah snei, “blŭ dŭñ dŭñ” jing klei khăng bhiăn lŏ wĭt ngă, ƀiădah lĕ, mta klei soh anei yơh ngă kơ Aê Diê čuh ai ngêñ hŏng phung ƀuôn sang Israel. Kyuadah klei blŭ dŭñ dŭñ amâo djŏ knŏng blŭ ƀuah hŏng pô, hŏng arăng ôh, ƀiădah klei yuôm hĭn jing hŏng Aê Diê. Aê Diê bi kmhal leh phung ƀuôn sang hŏng yua pui “čuh ti krah diñu leh anăn ƀơ̆ng ti knhal wăl” (êlan 1). Hŏng klei bi kmhal hŏng pui, ñu čiăng mñă kơ phung ƀuôn sang hdơr, kmeh pui jing klei bi knăl kơ klei khăp uêñ răng mgang diñu (Klei Yap 9:15-16), tơdah blŭ dŭñ dŭñ jing diñu hngah kơ klei jăk, klei kiă kriê, klei Aê Diê răng mgang diñu, leh anăn tơdah Aê Diê amâo răng mgang diñu, snăn pui anăn yơh srăng čuh ƀơ̆ng diñu.
Tlă anăp hŏng klei Aê Diê bi kmhal, phung ƀuôn sang Israel êran nao “ur kơ Y-Môis; Y-Môis wah lač kơ Yêhôwa, leh anăn pui mdei hĕ” (êlan 2). Phung ƀuôn sang ngă soh hŏng Aê Diê ƀiădah knŏng thâo nao ur kwưh hŏng Y-Môis, kyuadah diñu amâo thâo ôh klei blŭ dŭñ dŭñ jing klei soh, anăn yơh jing phŭn knhal diñu ngă soh leh lu blư̆ klei soh anăn.
Tơdah tuôm hŏng klei dleh dlan, klei amâo ư ai, drei khăng wơr bĭt hĕ dua mta klei yuôm anei: Tal sa, jih jang klei drei dôk tlă anăp knŏng jing bhiâo êjai leh anăn jing yuôm čiăng kơ drei hriăm đăo knang kơ Aê Diê leh anăn bi knal sa hdră jăk Ñu pioh brei kơ drei. Tal dua, wơr bĭt hĕ jih jang klei jăk jing mơ̆ng Aê Diê dôk brei kơ drei, leh anăn klei jhat srăng truh tơdah Ñu hrui wĭt klei jăk anei. Aê Diê jing Pô dôk mđing hmư̆ drei, snăn si ngă drei amâo myơr ôh kơ Ñu ya klei drei čiăng ƀiădah blŭ dŭñ dŭñ lĕ? Brei drei răng kơ klei drei blŭ dŭñ dŭñ, kyuadah Aê Diê hmư̆, thâo jih. Klei blŭ dŭñ dŭñ ngă kơ lu phung đăo hruê anei bi ênguôt kơ Aê Diê, diñu amâo hưn bi sĭt klei jăk kơ arăng ôh, leh anăn knŏng dlăng kơ klei dleh dlan, yap pô yơh jing phŭn, kyuanăn diñu hdĭp amâo mâo klei mơak ôh leh anăn dluh lĕ hlăm klei mă bruă kơ Aê Diê leh anăn kơ arăng.
Ya klei brei drei ngă hĕ, čiăng tlaih kơ klei soh blŭ dŭñ dŭñ?
Wah lač: Ơ Khua Yang, pap brei kơ kâo kyuadah lu blư̆ kâo amâo hdơr knga ôh kơ jih klei jăk Khua Yang brei, leh anăn kâo ngă bi ênguôt Ih kyua klei blŭ dŭñ dŭñ mluk mgu. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
